Иаковтың 1 - Наа Молҷағ

Алғас

¹ Иаков, Худайның паза Хан-пигібіс Иисус Христостың хулы, сірерге, тарадыл парып чӧрген он ікі сӧӧкке, пасчам. Изен-хазых полыңар!

Худай чолын пазып, ікінҷілебе

^2-3 Піліңер, сірернің киртіністеріңні сынааны тыстанысты тӧрітче. Аннаңар, харындастарым, аймах сынағларға кір парчатсаңар, анзын улуғ ӧрініске санаңар.

⁴ Сірер сағыс кір парған, толдыра, читпестер чох кізілер пол парар ӱчӱн, тыстаныс позының тоғызын ит саларға кирек.

⁵ Сірернің пірееңернің Худайдаң пирілген хыйғазы читпинчетсе, Аннаң сурынзын, ағаа пирілер. Худай прайзына, харанмин, уйаттырбин, пиредір нооза.

⁶ Че кӧмес тее ікінҷілебин, киртініп, сурынарға кирек. Ікінҷілеен кізі чилге сабылған талай салғағы осхас.

⁷ Андағ кізі Хан-пигібістең ниме аларына ізенмезін.

⁸ Ікі сағыстанған кізі ноо даа чолында пик турбас.

Кӧдірілгені паза пазынҷыхтатханы

⁹ Пазындыртчатхан харындас анзына кееркезін – Худай аны іди кӧдірче.

¹⁰ Пай, тізең, Худай аны пазынҷыхтапчатханына кееркезін. Ис-пай, чазы чахайағы чіли, салых парар, нооза.

¹¹ Кӱн сыхса, ізіг пол килче, кӱн ізиине от хурупча, чахайах салыхча, сілиин чідірче. Ідӧк пай кізі дее позының чолында салых парыбысча.

Сынааны паза хыҷаландыртханы

¹² Сынағ иртчеткен кізі часкалығ. Ол сынағларны турыстығ иртіп алза, Худай Позына хынғаннарға сыйиин – молҷаан чуртасты пирер.

¹³ Сынағларда пірдеезі «Худай мині хыҷаландырча» тібезін. Худай чабалға сабыла чоғыл, аннаңар Позы даа пірдеезін хыҷаландыртпинча.

¹⁴ Че позының хынығыстарына салынған кізі позын хыҷаландыртча.

¹⁵ Хыҷаланыс, тізең, чазых пазап салып, аны тӧрітче. Чазых, тізең, кӱзіне кір парза, ӧлімні тӧрітче.

Прай чахсы ниме Худайдаң

¹⁶ Хынған харындастарым, постарыңны алаахтырынмаңар.

¹⁷ Чахсы, толдыра ниме ӧӧртін, тигірдегі чарытхыларны чайаан Худайдаң килче. Ол Позы хаҷан даа алыспинча, алызар кӧлекті дее тастабинча.

¹⁸ Пісті Аның таллама чайаачызы ползыннар тіп сағынып, Ол пісті сынның сӧзінең тӧріт салған.

Худай сӧзін искені алай аны толдырғаны

¹⁹ Піліңер зе, хынған харындастарым, ноо даа кізі истерге чапчаң ползын. Чоохтанарға, ӧкпеленерге маңзырабас ползын.

²⁰ Кізі ӧкпезінең Худайның сыны тӧрир чоғыл нооза.

²¹ Аннаңар нинҷе пар чуртас похсағын, тооза чабалланысты хыйа идіп, сірерге пирілген сӧсті пазымнығ чӱрекнең алыныңар. Ол сірернің худыңарны арачылап полар.

²² Посты алаахтырып, сӧсті истееҷік полбаңар, че аны толдырчатхан кізі полыңар.

²³ Сӧсті истіп ле, че аны толдырбинчатхан кізі позын кӧріндестең кӧрінчеткен кізее тӧӧй:

²⁴ кӧрініп алып, хыйа пастырыбыстох ла, позы хайдағ полчатханын андох ундудыбысча.

²⁵ Сірерні пос итчеткен Худайның чахсы чахиин тирең ӱгреніңер, аны толдырчатсаңар паза искен нимені ундубинчатсаңар, Худай сірернің прай киректеріңні алғап пирер.

²⁶ Худайға орта пазырчам тіп сағынып ала, олох туста тіліңе сыданминчатсаң, син позың позыңны алаахтырчазың паза синің пазырғаның пір дее нимее турбинча.

²⁷ Худай Пабабысха арығ, пырозы чох пазырғаны – ол ӧкістердеңер паза чалғыс чарым халған ипчілердеңер сағыссырааны паза посты пу чуртастың хынығыстарынаң хайраллааны.