Галат чиріндегілерге 4 - Наа Молҷағ

¹ Паза мындағ ниме чоохтирым: ӱлескен ӱлӱзін ээленчеткен кізі прай нименің ээзі полчатса даа, пала тузында хулдаң пір дее пасхалалбинча.

² Ол пабазы таныхтаан тусха теере аны кӧрчеткен, ибінең устапчатхан кізінің холында чӧрче.

³ Піс тее ідӧк, олған тузыбыста, пу тилекейні пӱдірчеткен кӱстернің ӱлгӱзінде полғабыс.

⁴ Че таныхтаан тузы чит килгенде, Худай Позының чалғыс Оолғын ысхан. Ол ипчідең тӧреен, чахығның холында полған.

⁵ Анзы чахығның холында чӧрген кізілер ахтанып алар ӱчӱн, піс, тізең, палалары полыбызар ӱчӱн иділген.

⁶ Сірер Аның палалары полчазар. Худай сірернің чӱректеріңе Позының Оолғының Худын ысхан. Ол Хут «Авва, Пабам» тіп хығырча.

⁷ Аннаңар син хул нимессің, оолғызың. Оолғы полчатханыңда, Иисустың пастыра Худайның ӱлеен ӱлӱзін ээленчеткен кізізі полчазың.

Павелнің галаттардаңар сағыссырааны

⁸ Че ол туста сірер, Худайны пілбин, пасха худайларға пазырғазар. Олар сынында худай ниместер.

⁹ Амды Худайны піліп алғазар, алай аннаң артых чоохтаза, Худай сірерні піліп алғанда, ноға хатап пу тилекейнің чазығ, уйан кӱстеріне айланчазар паза постарыңны ағаа хул идін саларға сағынчазар.

¹⁰ Кӱннерні, ай-чыл пайрамнарын паза пасха даа тустарны ӱлӱкӱннепчезер.

¹¹ Арса, сірернің ӱчӱн тикке ле тоғынғам тіп, сірердеңер сағыссырапчам.

¹² Харындастар, мин сірер осхаспын, сірер дее мин осхас полыңар тіп сурынчам. Сірер мині пір дее нименең хомзындырбаазар.

¹³ Мин пастап, сірерге Чахсы Хабарны таратхан туста, ағырығ полғам.

¹⁴ Минің ағыриим сірерге сынағ полған. Сірер, тізең, мағаа чіксінмеезер, че мині, Худай ангелін, Христос Иисусты чіли, удурлаазар.

¹⁵ Хайдағ часкалығ полғазар сірер! Сірердеңер киречілепчем: оңдай полған полза, сірер мағаа харахтарыңны даа, сығарып, пирібізер кӧңніліг кӧрінгезер.

¹⁶ Андағ полза, сынны чоохтапчатханым ӱчӱн, нӧӧс, мин сірерге ыырҷы пол пардым?

¹⁷ Чахсы Хабарны тискер чоохтапчатхан кізілер сірерге арығ сағыснаң хайбинчалар. Постарына хайзыннар тіп, сірерні пістең чарып аларға сіренчелер.

¹⁸ Чахсы киректерге хайғаны чахсы. Аны мин килген туста ла нимес, че сыбыра итчетсе, чахсы полар.

¹⁹ Палаларым, сірерде Христостың омазы іле кӧрін парбаанҷа, сірернің ӱчӱн мин, тӧрітчеткен чіли, пазох ирееленчем.

²⁰ Минің амды, сірерде полып, пасха чоохтазарым килче. Мин сірерде ниме полчатханын оңар полбинчам нооза.

Піс пос ипчінің палаларыбыс

²¹ Сірер, чахығның холында чӧрерге хынчатханнар, чоохтап пиріңердек мағаа: чахығ ниме чоохтапчатханын испинчезер бе?

²² Пазылых нооза: Авраамның ікі оол полған. Пірсі хул ипчідең тӧреен, пірсі пос ипчідең тӧреен.

²³ Хулның тӧлі – ол кізідең тӧреені. Пос ипчінің тӧлі – ол молҷағ хоостыра тӧреені.

²⁴ Пу кип-чоох. Пу ікі ипчі ікі молҷағны таныхтапча. Пірсі, Синай тағда алылғаны, Агарь полча. Аның палалары хул поларға тӧріпчелер.

²⁵ Агарь Арав чиріндегі Синай тағны таныхтапча. Сағамғы Иерусалим Агарьға тӧӧй. Ол позының палаларынаң хада хулда чӧрче нооза.

²⁶ Тигірдегі Иерусалим, тізең, пос. Ол піске прайзыбысха инебіс полча.

²⁷ Пазылых нооза: «Тӧлі чох, пала кӧрбеен ипчі, ӧрін! Пала таап, ирееленмеені, ӧрініп, хысхыр! Чалғыс ипчінің палалары уғаа кӧп. Ирліг ипчінинең хай-хай кӧп!»

²⁸ Піс, харындастар, Исаак чіли, Худай молҷаан хоостыра тӧреебіс.

²⁹ Че алында даа кізідең тӧреені Хуттаң тӧреенін сӱрген. Сағам даа ідӧк сӱрче.

³⁰ Худай Пічии ниме чоохтапча? Хул ипчіні паза оолғын сӱрібіс. Хул ипчінің оолғы пос ипчінің оолғынаң хада ӱлӱзін ээленмес нооза.

³¹ Ол оңдайнаң, харындастар, піс хулның нимес, пос ипчінің палаларыбыс.