Еврейлерге 13 - Наа Молҷағ

Тӱгенҷі ӱгредіг чоох

¹ Удур-тӧдір, харындастар чіли, хынызыңар.

² Иб-чуртыңарға чол чӧрчеткен кізілерні кирчедіңер. Піреелері, іди идіп, постары даа пілінмин халып, ангеллерні аалҷы иттірлер.

³ Харибдегі кізілердеңер сағыныңар. Постарың пиктегде полған чіли, оларға сағыссыраңар. Ирееленчеткен кізілердеңер сағыныңар. Оларға, постарың ідӧк ирееленген чіли, айаңар.

⁴ Ирепчі палғалызын аарлаңар. Ирлері дее, ипчілері дее киртістіг поларға киректер. Оралысха паза чӧрееске сабылғаннарны Худай позы чарғылапча.

⁵ Ахчаа сабылбаңар, пар нимее чӧпсініңер. Худай Позы теен, хайза: «Сині халғыспаспын, сині тастабаспын».

⁶ Аннаңар піске тідімніг чоохтанарға чарир: «Худай мағаа полысча. Мағаа пір дее нимедең хорығарға кирек чоғыл. Ыырҷы мағаа хайдағ чабал ниме ит полар?»

⁷ Устағҷыларыңнаңар сағыныңар. Олар сірерні Худайның сӧзіне ӱгреткеннер. Олар хайди чуртаанын паза ӱреенін сағынып, олар киртінген чіли киртініңер.

⁸ Иисус алыспинча: киҷее хайдағ полған, пӱӱн дее, хаҷан даа андағох.

⁹ Ӧң-пасха паза пасхаҷыл ӱгредіглерге сірерні сын чолдаң апарыбызарға пирбеңер. Ниме чирге алай чібеске тіп чоохтапчатхан ӱгредіглер нимес, Худай паарсазы чӱректеріңні пик итсін. Андағ ӱгредіглернең айғасчатхан кізілер олардаң пір дее туза албинчалар.

¹⁰ Иерусалимдегі храмның абыстарына пістің тайиибыстаң алған малның идін чирге чарабас.

¹¹ Кізілернің чазыхтарының ӱчӱн иң улуғ абыс тайыға салылған малның ханын иң ызых орынзар апарҷаң. Малның иді, тізең, аал тастында ӧртелҷең.

¹² Аннаңар Иисус таа саар тастында ӧлген. Іди Ол Позының ханынаң кізілерні ахтаан.

¹³ Саар тастынзар сығааңар паза Ағаа кӧрерге киліскен уйатты хада ӱлезееңер.

¹⁴ Мында, чир ӱстӱнде, піске сыбыра чуртаҷаң саар чоғыл. Піс пӱдірілер саарны тілепчебіс.

¹⁵ Иисустың пастыра Худайны сыбыра сабландырааңар. Піс Худайның адын саблирбыс. Анзы аастаң сыххан пістің тайиибыс полар.

¹⁶ Кізілерге чахсы идерге ундубаңар. Удур-тӧдір полызызыңар. Іди иткені Худайның кӧңніне кірчеткен тайығ полча нооза.

¹⁷ Устағҷының чооғын истіңер, ол теен нимені идіңер. Оларға сірернің ӱчӱн Худайның алнында нандырығ тударға кирек. Аннаңар олар сірернің арачыланызыңардаңар сыбыра сағынчалар. Оларның чооғын иссеңер, олар тоғыстарын ӧрініп ала итчедерлер. Чоох испезеңер, тоғыстарын мӧңіссіреп ала идерлер. Анзы сірернің тузаңарға полбас.

Сурыныстар паза алғастар

¹⁸ Пістің ӱчӱн пазырыңар. Піс хаҷан даа орта идерге кӱстенчебіс. Аннаңар пістің сағыстарыбыс пісті чарғылабинчалар.

¹⁹ Худай мині сірерзер табырах нандыра ыссын тіп, улам тың пазырыңар.

^20-21 Иисус Худайның мӧгі Молҷаан Позының ханынаң таңмалабысхан. Ол оңдайнаң Ол Позының хойларының Илбек хадарҷызы полыбысхан. Амыр пирчеткен паза Иисусты тірілдірібіскен Худай сірерні ноо даа чахсы кирекке пик итсін. Чахсы киректер идіп, сірер Аның кӧңнін толдырчазар. Ол, тізең, Иисус Христостың пастыра сірерде тоғыс апарып, Позының кӧңніне кірер иде сірерні алыстырча. Иисусха хаҷан даа сабланыс ползын! Аминь.

Тӱгенҷі сӧстер

²² Харындастар, мин сірерге пасхан сӧстерні чӱректеріңе алыңар тіп сурынчам. Пу пічиим тың узун нимес нооза.

²³ Піліңер, Тимофей харындазыбыс харибдең сыхты. Ол пу чағында минзер килзе, мин, сірернең тоғазарға парчатсам, аны хада алып аларбын.

²⁴ Сірернің устағҷыларыңа паза прай ах-арығ кізілерге изен читіріңер. Италий чиріндегі харындастар сірерге изен читірчелер.

²⁵ Сірерге прайзыңарға Худай паарсазы ползын. Аминь.