Ефестегілерге 4 - Наа Молҷағ

Пір кізі осхас полыңар

¹ Амды мин, Хан-пигібіс ӱчӱн харибде одырчатхан кізі, сірердең «Худай кізілері полып, Худай хығырған нимее турыстығ полыңар» тіп, алданчам.

² Постарыңны пазымнығ паза нымзах тудыныңар, тоозылбас тыстаныстығ полыңар. Удур-тӧдір, хыртыстаныспин, хыныс турыңар.

³ Худай Худы сірерні піріктір салған, аннаңар ыырласпин чуртаңар.

⁴ Пар пір ит-хан паза пір Хут, сах ідӧк Худай сірерні хығырған пір ізеніс,

⁵ пір Хан-пиг, пір киртініс, пір кіреске тӱзіс,

⁶ пір Худай паза прайзының Пабазы. Ол прайзынаң пӧзік, прайзынҷа иртче паза прайзыбыста пар.

⁷ Пістің полғаныбысха ла Христос айабин ӧнетін сыйых пирген.

⁸ Аннаңар Худайның пічиинде чоохталча: «Христос иң пӧзік ӧӧрлеп парыбысхан, ыырҷыларын, тудып, апара халған, кізілерге, тізең, сыйыхтар пирген».

⁹ «Ӧӧрлеп парыбысхан» теені чи нимені таныхтапча? Аның алында чир тӱбінзер тӱзіп, сыхханын таныхтапча нимес пе зе?

¹⁰ Кем тӱскен, Олох, прай тилекейні Позынаң толдырыбызар ӱчӱн, тигірдең хай-хай пӧзік ӧӧрлеп парыбысхан.

¹¹ Кем «кізілерге сыйыхтар пирген», Олох піреелерін илҷілер, піреелерін ухаанҷылар, піреелерін Чахсы Хабарның тарадығҷылары, піреелерін киртінчеткеннернің хадарҷылары, піреелерін ӱгретчілер ит салған.

¹² Христостың ит-сӧӧгі (тигіриб чоны) ӧзер ӱчӱн, ах-арығ кізілерін Худай киреенің нымысчылары ит салар ӱчӱн іди иткен Ол.

¹³ Пу оңдайнаң, Худай Оолғына киртінерінде паза Аны піліп аларында піс прайзыбыс хада пір сағысха чидіп аларға кирекпіс. Андада, Христостың поғда тузына чидіп, тигіриб улуғ кізі синіне чит парар.

¹⁴ Мыннаң мындар піс хайдағ ла полза ӱгредіг чиліне хаптыр парыбысчатхан алай алаахтырарға кӧнік парған кӧйтіктернің холларына кір парчатхан час палалар чіли полбасха кирекпіс.

¹⁵ Че Сыннаңар киречілеп, удур-тӧдір хынызып, піс ит-ханның пазы полчатхан Христостың синіне прай саринаң чидіп аларға кирекпіс.

¹⁶ Ол пу ит-ханның ал-алынҷа чардыхтарын прай піріктір салча. Аның чардыхтары, пик палғалыс парып, полған на чардых позының тоғызын толдырчатса, прай ит-хан даа, ӧзіп, хыныста тиліпче.

Христос пирген наа чуртас

¹⁷ Аннаңар, Хан-пигібістің адынаң алданып, Худайы чох чоннар чіли, пос оңдайынҷа хылынмаңар тіпчем сірерге.

¹⁸ Оларның сағыстары пӱлестел парған. Олар, хыйғалары читпинчеткеннеңер, чӱректері, тізең, хатығдаңар, Худай пирчеткен чуртастаң тастых чуртапчалар.

¹⁹ Олар, нимені нимее салбас пол парып, аймах-пасха чабал нимелер идіп тее, хыҷыхтарын хандыр полбин, оралызып чуртапчалар.

²⁰ Че пу – сірернің Христостаңар ӱгренген пілістерің нимес.

²¹ Сірер Аннаңар искезер, Аннаң хада полып, Аныңдағы сынны ӱгреніп алғазар.

²² Алындағы чуртаста оралысхах полып сірер постарыңны ардатхазар. Аннаңар, иргі чуртас кибірлерін хыйа тастап,

²³ постарыңның сағыстарыңны паза чӱректеріңні нааҷылабызыңар.

²⁴ Сыннаң орта паза ах-арығ чуртаста Худайның омазы хоостыра чайалған наа кізее айлан парыңар.

²⁵ Піс прайзыбыс пір ит-ханның чардыхтарыбыс, аннаңар сірернің полғаны ла позының чағынына, чойланмин, сынны чоохтап турзын.

²⁶ Тарынзаңар даа, чазых итпеңер: ӧкпеңер кӱн хонғанҷа тӱс парчатсын.

²⁷ Сайтанны постарыңа чағын кирбеңер.

²⁸ Алында оғыр иткен кізі, паза оғырлабин, хызылчатхан кізілерге пирҷең ниме пар ползын тіп, позының холларынаң тоғынзын.

²⁹ Ахсыңардаң пір дее хомай сӧс сыхпазын. Сірерні исчеткен кізілерге чахсы ползын тіп, киртініске ӱгредерге полысчатхан сӧстерні ле чоохтап турыңар.

³⁰ Худай Худын хомзындырбаңар. Позып алар кӱннің ӱчӱн сірер ол Хутнаң таныхтал парғазар.

³¹ Полған на ыдырғахтаныс алай ӧкпеленіс, тарыныс алай аахтас, чабалланып чоохтанған хомай сӧс сірерде чох ползын.

³² Хайди Худай, Иисус Христосха киртінгеннерің ӱчӱн, сірернің чазыхтарыңны позытхан, сірер дее ідӧк удур-тӧдір паарсазыңар, айазыңар паза пыроларыңны тастас турыңар.