Азых чоох 6 - Наа Молҷағ

Алты таңманы суурғаны

¹ Анаң Хурағанның читі таңманың пастағызын суурыбысханын кӧр салғам. Соонаң тӧрт аңның пірсінің, кӱгӱрт чіли кӱзӱреп, чоохтанғанын ис салғам: – Кил паза кӧр!

² Мин ах атты кӧр салғам! Атха мӱнген кізі ух-чаалығ паза чиңісчее пирілчеткен веноктығ полған. Ол, чиңісчі чіли, чиңіс тударға сыххан.

³ Хураған ікінҷі таңмазын суурыбысханда, ікінҷі аңның чоохтанғанын ис салғам: – Кил паза кӧр!

⁴ Анаң чигрен ат сых килген. Атха мӱн салған кізее, удур-тӧдір ӧдіріссіннер тіп, амыр хоныхты чир ӱстӱнең чох идібізерге ӱлгӱ пирілген. Ідӧк ағаа улуғ хылыс пирілген.

⁵ Хураған ӱзінҷі таңмазын суурыбысханда, ӱзінҷі аңның чоохтанғанын ис салғам: – Кил паза кӧр! Мин хара атты кӧр салғам. Атха мӱнген кізі холында весы тудын салтыр.

⁶ Анаң тӧрт аңның аразынаң истілчеткен ӱнні ис салғам: – Пір ле хиникс пуғдай алай ба ӱс ле хиникс ас пір динарийге, пір кӱннің чал ахчазына. Олива хайахтың паза хызыл арағаның паазын алыстырба!

⁷ Хураған тӧртінҷі таңмазын суурыбысханда, тӧртінҷі аңның чоохтанғанын ис салғам: – Кил паза кӧр!

⁸ Мин пора тӱктіг атты кӧр салғам. Атха мӱнген кізінің ады «Ӧлім» полған. Аның соонҷа «Чир тӱбі» тіп аттығ ниме парған. Чир ӱстӱнің тӧртінҷі чардығында – кізілерні хылыснаң, ӧзӧгіснең, ағырығларнаң паза ачын аңнарнаң чох идерге – ӱлгӱ пирілген ағаа.

⁹ Хураған пизінҷі таңмазын суурыбысханда, тайығ салҷаң орынның алтында Худай сӧзін киречілееннері ӱчӱн ӧдірткен кізілернің хуттарын кӧр салғам.

¹⁰ Олар тың хысхырысханнар: – Ах-арығ, сын Хан Худай! Ноға амға теере пістің ӧлімібіс ӱчӱн, чир ӱстӱнде чуртапчатхан кізілердең ӧс алып, оларны чарғылабинчазың?

¹¹ Оларның полғанына ла ах узун кӧгенек пирілген. Оларох чіли ӧдірт салар арғыстарының паза харындастарының саны толғанҷа, амырап, кӧмес сахтап аларға чахығ пирілген.

¹² Хураған алтынҷы таңмазын суурыбысханда, чир ӱстӱнің уғаа тың тітіри тӱскенін кӧр салғам. Кӱн хара кӧгенек чіли харал парыбысхан, ай, тізең, пӱкӱлее, хан чіли, хызыл пол парыбысхан.

¹³ Тигірдегі чылтыстар, ағастың читіре пыспаан чистектері улуғ чилге тоолапчатхан чіли, чирге тӱс парғаннар.

¹⁴ Тигір, чаҷын чіли, тӱріл парыбысхан, прай тағлар, олтырых чирлер, тізең, постарының орыннарынаң тибіреп парыбысханнар.

¹⁵ Чирнің ханнары, пиглері, чааҷылар пастыхтары, пайлар паза ӱлгӱдегілер, хуллар паза пос чуртапчатханнар – прай кізілер тағлар ӧзеннерінде паза хуюларда чазынғаннар.

¹⁶ Олар тағларға паза хайаларға хысхырғаннар: – Пістің ӱстӱбіске иңзеріліңер, ӱлгӱ сіреезінде одырчатхан Худайның паза Хурағанның ӧкпеленізінең пісті чазырыбызыңар!

¹⁷ Аның ӧкпеленҷең илбек кӱні чит килді нооза. Кем ағаа сыдас полар?