Азых чоох 4 - Наа Молҷағ

Тигірде пазырғаны

¹ Анаң мин, ӧӧр харах тастап, тигірде азыл парған ізікті кӧр салғам, пырғы табызы осхас, алындох искен ӱн, тізең, мағаа теен: – Сых пеер, мин сағаа, мының соонаң ниме пол парарын кӧзіт пирербін.

² Пір саңай Худайның Худы мағаа тол парыбысхан, тигірде, тізең, ӱлгӱ сіреезі турған, анда Кем-де одырчатхан.

³ Ол ӱлгӱ сіреезінде Одырчатханы аарлығ яшма паза сердолик тастар чіли чалтырапчатхан. Ӱлгӱ сіреезінің ибіре изумруд осхас тигір хуры полған.

⁴ Ол ӱлгӱ сіреезінің ибіре чибіргі тӧрт ӱлгӱ сіреезі. Анда ах кип-азахтығ чибіргі тӧрт ах сағал, пастарына алтын венок кис салып, одырған.

⁵ Иң ӧӧн ӱлгӱ сіреезінең чалыннар сағылысчатханнар, кӱгӱрт кӱзӱрепчеткен паза табыстар истілчеткеннер. Ӱлгӱ сіреезінің алнында читі чарытхы кӧйче. Ол Худайдаң сыххан читі хут.

⁶ Ӱлгӱ сіреезінің алнында кристалл осхас сӱлейке талай. Ӱлгӱ сіреезінің ортызында паза ибіре тӧрт аң. Аңнарның алныларында паза арғаларында харахтар.

⁷ Пастағы аң ала парысха тӧӧй полған, ікінҷізі – пуғаҷахха, ӱзінҷізі – кізі сырайлығ, тӧртінҷізі, тізең, учухчатхан хара хусха тӧӧй полған.

⁸ Тӧрт аңның полғанының на ибіре алтылар ханат паза істі-тастында харахтар полғаннар. Ол аңнар хараа-кӱнӧрте тохтабин хысхырысчалар: – Ах-арығ, ах-арығ, ах-арығ ӧӧркі Чайаачы, Прай нимедең кӱстіг Худай! Ол полған, пар паза килер!

⁹ Аңнар ӱлгӱ сіреезінде одырчатхан, хаҷан даа тіріг Худайға сабланыс, аарлас паза алғыс сӧстерін хысхырчатхан туста,

¹⁰ чибіргі тӧрт ах сағал, ӱлгӱ сіреезінде одырчатхан Худайның алнында, тӱңдере тӱзіп, хаҷан даа тіріг Худайға пазырчалар. Постарының веноктарын, Аның ӱлгӱ сіреезінің алнына салып, чоохтапчалар: –

¹¹ Ӧӧркі Чайаачы, Пу тилекейде прай ниме Синнең паза Синің кӧңніңҷе чайалғаннаңар, Син сабланысха, аарласха паза ӱлгее турыстығзың.