Азых чоох 3 - Наа Молҷағ

Сардистегі тигірибге пічік

¹ «Сардистегі тигірибнің ангеліне пас пир: Худайның читі худын паза читі чылтысты тутчатхан Иисус піди чоохтапча: Мин сірернің киректеріңні пілчем. Сірердеңер тіріглер тіп чоохтасчалар, че сірер ӧлігзер.

² Худайымның алнында сірернің иткен киректеріңнің турыстығ полғанын кӧр таппинчам. Аннаңар сиргек полыңар паза пасхаларына, ӧлімге чағдап парғаннарға, кӱс киріңер.

³ Нимені искезер паза алып алғазар, аны сағысха киріңер, аны хайраллаңар паза пыросыныңар. Сынап сірер сиргек полбазар, Мин, оғыр ла чіли, кинетін килербін, хай туста килгенімні сірер сизінмин дее халарзар.

⁴ Че сірернің анда, Сардис саарда, постарының кип-азахтарын кірлебеен кізілер парлар. Олар Миннең хада ах кип-азахтығ чӧрерлер, олар ағаа турыстығлар нооза.

⁵ Чиңісчі ах кип-азахтығ полар, Мин аның адын чуртас пічиинең хаҷан даа сии тартпаспын. Пабамның паза ангеллернің алнында аннаңар киречілирбін.

⁶ Истіп пілчеткен кізі, Худай Худы тигіриблерге ниме тіпчеткенін, иссін».

Филадельфтегі тигірибге пічік

⁷ «Филадельфтегі тигірибнің ангеліне пас пир: Ол асхан нимені пірдеезі чаап полбас, Ол чапхан нимені дее пірдеезі ас полбас, Давид ханның клӱзін тутчатхан Сын паза Ах-арығ Иисус піди тіпче:

⁸ Мин сірернің киректеріңні пілчем. Мына кӧріңер, сірерге ізік ас пиргем, аны пірдеезі чаап полбас. Пілчем, кӱзіңер асхынах, че сірер сӧстерімні хайраллаазар паза Мағаа киртінерінең хыйа полбаазар.

⁹ Піс иудейлербіс тіп чоохтанчатхан кізілер сынында андағ ниместер, че сайтанда чой кізілер, ана оларны азахтарыңзар тӱзірербін, олар, тізең, сірерге хынчатханымны піліп аларлар.

¹⁰ Сыдамах полыңар тіп пирген чахиимны хайраллааныңар ӱчӱн, Мин дее сірерні сидік сыныхтағ тузынаң хайраллирбын. Ол сыныхтағ, чир ӱстӱндегі чоннарны сыныхтирға тіп, прай тилекейге ызылар.

¹¹ Мин тӱрчедең килербін. Чиңіс танииңарны – венокты, пірдеезі оғырлап парыбыспазын тіп, нинҷе пар нимеңерні пик тудыңар.

¹² Чиңіс тутхан кізіні Мин Худай храмында тірег ит саларбын, ол, тізең, храмнаң пір дее сых полбас. Мин ол тірегде Худайымның адын, Позымның наа адымны паза Худайымның саарының – наа Иерусалимнің адын пас саларбын! Пу саар, тізең, тигірдең, минің Худайымнаң, тӱзер.

¹³ Истіп пілчеткен кізі, Худай Худы тигіриблерге ниме тіпчеткенін, иссін».

Лаодиктегі тигірибге пічік

¹⁴ «Лаодиктегі тигірибнің ангеліне пас пир: Ады Аминь полчатхан орта паза сын Киречі, Худай чайаан нимелернің Пазы піди чоохтапча:

¹⁵ Сірернің киректеріңні пілчем. Сірер соох таа, ізіг дее нимессер. Соох алай ізіг полған ползар, хайдағ чахсы поларҷых.

¹⁶ Че сірер ізіг дее, соох таа нимессер, чылығзар ла, аннаңар Мин сірерні, кирексібин, суғны чіли тӱкӱрібізербін.

¹⁷ Сірер тіпчезер: „Мин пайбын, пайып пардым, мағаа пір дее ниме кирек чоғыл“. Че постарыңның хайдағ часка чох айастығ, тіленҷік, харах чох паза чалаас полчатханнарыңны сизінминчезер.

¹⁸ Аннаңар чӧп пирчем сірерге Миннең садып аларға: кӧйчеткен отнаң арығлалған алтынны пайир ӱчӱн; ах кип-азахты, кизіп алып, уйадыстығ хуба чалаазыңарны чабар ӱчӱн; имніг сӱрткіні, харахтарыңны сӱртіп, кӧрер ӱчӱн.

¹⁹ Кемге Мин хынчам, аны, пырозын ілезіне сығарып, хатығлапчам. Аннаңар, кӱстеніп, пыросыныңар.

²⁰ Мына Мин, ізік алнында турып, тохлатчам. Кем, ӱнімні ис салып, ізік ас пирер, Мин, андар кіріп, аннаң хада азыранарбын, ол даа Миннең хада азыранар.

²¹ Чиңіс тутхан кізее ӱлгӱ сіреемде Позымнаң хада одырар оңдай пирербін, Мин дее іди, чиңіс тудып, Пабамнаң хада Аның ӱлгӱ сіреезіне одырғам.

²² Истіп пілчеткен кізі, Худай Худы тигіриблерге ниме тіпчеткенін, иссін».