Азых чоох 2 - Наа Молҷағ

Ефестегі тигірибге пічік

¹ «Ефестегі тигірибнің ангеліне пас пир: Оң холында читі чылтыс тутчатхан паза читі алтын чарытхы аразында пас чӧрчеткен Иисус піди тіпче:

² Сірернің киректеріңні, аар тоғыстарыңны паза сыдасханнарыңны пілчем. Хомай кізілерні кӧр полбинчатханнарыңны, илҷілер тіп аданчатхан кізілерні сыныхтап, оларның чой полчатханнарын ілезіне сығарғаныңарны даа пілчем.

³ Сірер сыдас полчазар, Минің адым ӱчӱн кӧп чобағлар кӧргезер, че майыхпаазар.

⁴ Че сірердең тоғыр чооғым парох. Сірер постарыңның пастағы хыныстарыңны ундуп салғазар.

⁵ Хайди тӧбін тӱс парғаннарыңны сағысха киріп, пыросыныңар. Пыросынып, пастап иткен киректеріңні идіңер. Іди пыросынмазар, тӱрчедең сірерзер киліп, чарытхыңарны орнынаң хыйа ідібізербін.

⁶ Че, николаиттернің итчеткен киректерін хырт кӧрчеткеннерің чахсы. Мин дее оларны хырт кӧрчем.

⁷ Истіп пілчеткен кізі, Худай Худы тигіриблерге ниме тіпчеткенін, иссін. Чиңіс тутхан кізее Худай садының ортызында ӧсчеткен чуртас ағазының чистегін чіп кӧрерге пирербін».

Смирнадағы тигірибге пічік

⁸ «Смирнадағы тигірибнің ангеліне пас пир: Ӱреп, хатап тірілген, Пастағызы паза Халғанҷызы полчатхан Иисус піди тіпче:

⁹ Сірернің киректеріңерні, чобааңарны паза хызылчатханыңарны пілчем. Андағ даа полза, сірер пайзар! Постарын иудейге сананчатхан кізілер сірерні хайди сӧклепчеткеннерін дее пілчем. Сынында олар сайтан кізілері.

¹⁰ Сірерге тӱзер хыйаллардаң хорыхпаңар. Кӧрерзер, сайтан, сірерні сыныхтирға тіп, хай піреелеріңні харибге чаап салар. Сірер он кӱн ирееленерзер. ӧдірттеечетсер, Мағаа киртінерін тастабаңар, анаң Мин сірерге чуртастың сабланыс таниин – веногын, пирербін.

¹¹ Истіп пілчеткен кізі, Худай Худы тигіриблерге ниме тіпчеткенін, иссін. Чиңіс тутханнарға ікінҷі ӧлім хорғыстығ нимес!»

Пергамдағы тигірибге пічік

¹² «Пергамдағы тигірибнің ангеліне пас пир: Ікі саринаң чітіг хылыстың Ээзі піди тіпче:

¹³ Сірернің киректеріңні, сайтанның ӱлгӱ сіреезі полчатхан орында чуртапчатханнарыңны паза Минің алныма ізестіг турысханнарыңны пілчем. Анда, сайтанның чирінде, Минің сын киречім Антипаның ӧдірт салған кӱннерінде дее Мағаа киртінерінең хыйа полбааннарыңны даа пілчем.

¹⁴ Че сірердең тоғыр кӧмес чооғым парох. Сірернің араңарда ухаанҷы Валаамның ӱгредиинҷе парчатхан кізілер парлар. Хаҷан-да, Валаамның ӱгредиине тӧстеніп, Валак хан Израильнің чонын чазых чуртасха кирген. Іди ол чон, пасха худайларға салылған тайығ чиизін чіп, оралызып, ай пораан чуртаан.

¹⁵ Сірернің араңарда Мин хыртыстанчатхан николаиттернің ӱгредиинҷе парчатхан кізілер парлар.

¹⁶ Пыросыныңар! Пыросынмазар, Мин, тӱрчедең сірерзер киліп, хылыс осхас тілімнең оларнаң чаалазарбын.

¹⁷ Истіп пілчеткен кізі, Худай Худы тигіриблерге ниме тіпчеткенін, иссін. Чиңіс тутхан кізее тигірдең тӱскен чазырған тамахты чирге пирербін. Мин ағаа наа ат-сола пазыл парған ах тасты пирербін. Аны алған кізідең пасха ол ат-соланы пірдеезі пілбинче».

Фиатирдағы тигірибге пічік

¹⁸ «Фиатирдағы тигірибнің ангеліне пас пир: От чіли чалыннапчатхан харахтығ паза холадаң урылған осхас азахтығ Худай Оолғы піди тіпче:

¹⁹ Сірернің киректеріңні, хынызыңарны, тоғынғаныңарны, киртінізіңерні, прай нимее сыдасханыңарны паза халғанҷы киректерің пастағызынаң кӧп полчатханын пілчем.

²⁰ Че сірердең тоғыр кӧмес чооғым парох. Сірер позын ухаанҷаа сананчатхан Иезавель ипчідең тоғыр полбинчазар. Ол ипчі Минің нымысчыларымны, оралыстығ оңдайнаң чуртирға, пасха худайларға салылған тайығ ас-тамахты чирге ӱгредіп, алаахтырча.

²¹ Мин ағаа чӧреечі хылиин тастирға тус пиргем, че ол пыросынарға хынминча.

²² Ол ипчінің чолына кіріп, оралыс чӧрген кізілер пыросынмазалар, Мин оларны илбек чобаға кирербін. Ол ипчіні, тізең, чадыға кир саларбын.

²³ Мин аның палаларына ӧлім ызарбын. Кізілер чӱректерінің паза сағыстарының сыныхтағҷызы полчатханымны прай тигіриблер піліп аларлар. Сірерге, полғаныңарға ла, иткен киректерің хоостыра тӧлеп пирербін.

²⁴ Сірерге, тізең, ол ипчінің ӱгредиинҷе полбин, сайтанның „тирең чазыттары“ тіп адалчатхан нимені пілбеен Фиатирдағы кізілерге, чоохтапчам: „Мин сірерге пасха аар-чӱк артпаспын“.

²⁵ Че сағам, Мин килгенҷе, позыңардағы ла нимелерні хайраллаңар.

²⁶ Чиңіс тутхан паза Минің киректерімні тооза толдырған кізее чоннарнаң устаҷаң ӱлгӱ пирербін.

²⁷ Ол, тізең, тимір тайахнаң чоннарны хадарар; олар, той ідістер чіли, чара чачырирлар. Сах іди Мин Пабадаң ӱлгӱ алғам.

²⁸ Чиңіс тутхан кізее, тізең, иртенгі чылтысты пирербін.

²⁹ Истіп пілчеткен кізі, Худай Худы тигіриблерге ниме тіпчеткенін, иссін».