Азых чоох 11 - Наа Молҷағ

Ікі киречі

¹ Анаң мағаа узун тайах осхас синеҷең ағас пирілген паза чоохталған: – Пар, Худай храмын паза тайығ салҷаңны синебіс, пазырарға килген кізілерні дее санабыс.

² Че храм сиденінің істін синебе. Ол Худай пілбинчеткен чоннарға пирілген. Олар ызых саарны 42 ай типсирлер.

³ Мин Позымның ікі киречіме кӱс пирербін, олар, хара кӧгенек кизіп, 1260 кӱн ухаанҷылирлар.

⁴ Ол киречілер – чир ӱстӱнің Худайының алнында турчатхан ікі олива ағазы паза ікі чарытхы.

⁵ Пірее кізі ол киречілерні хомзындырарға харасса, оларның ахсыларынаң чалыннығ от сых киліп, ыырҷыларын чох идібізер. Пірее кізі оларны хомзындырарға итсе, ағаа ӧл парарға килізер.

⁶ Ухаанҷылапчатхан туста наңмыр чағбазын тіп, оларға тигірні чабызарға ӱлгӱ пирілген. Оларға хынған сай, суғларны ханға айландырып, чирдегілерні аймах ағырығларнаң, саайларнаң чох идерге ӱлгӱ пирілген.

⁷ Олар ухаанҷылирын тоос салзалар, тӱбі чох чирдең аң сых килер. Ол пу киречілернең харбазар, анаң оларны чиңіп, ӧдір салар.

⁸ Оларның сӧӧктері илбек саарның орамазында чадарлар. Ол саар, позының адынаң адалбин, ӧнетін «Содом» алай «Египет» тіп адалған. Анда Хан-пигібіс хазаттырт салған.

⁹ Аймах чоннарның, тӧллернің, тіллернің паза уйаларның кізілері оларның сӧӧктерінзер ӱс кӱн чарым кӧрерлер, сӧӧктерні, тізең, чыырға чаратпастар.

¹⁰ Пу ікі ухаанҷы чир ӱстӱндегі кізілерні иреелееннер, аннаңар кізілер оларның ӧліміне ӧрінерлер, ӱлӱкӱннирлер, удур-тӧдір сыйлазарлар.

¹¹ Че ӱс кӱн чарым ирт парғанда, Худайдаң килген паза чуртас пирчеткен хут пу киречілерзер кір парған. Олар, тізең, тур килгеннер. Оларны кӧр турчатхан кізілер уғаа тың хорых парғаннар.

¹² Пу ікі киречее тигірзертін ӧтіг ӱн истілген: – Ӧӧрлеңер пеер! Олар, пулутха кіріп, тигірзер кӧдіріл парыбысханнар. Оларның ыырҷылары пу нимені прай кӧргеннер.

¹³ Олох туста чир тың тітіри тӱскен, саарның онынҷы чардығы иңзеріл парған. Чир тітіреенге читі муңҷа кізі ӧл парған. Пасхалары, тың хорых парып, Тигірнің Худайын саблааннар.

¹⁴ Ікінҷі хыйал ирт парыбысты, че мына ӱзінҷі хыйал табырах киліп одыр.

Читінҷі пырғының тапсааны

¹⁵ Читінҷі ангел пырғы тартыбысханда, тигірде ӧтіг ӱннер истіле тӱскеннер: – Чир ӱстӱ ӧӧркі Чайаачыбыстың паза Аның Мессийінің хан-чирі пол парды. Мессий, тізең, хаҷан даа ӱлгӱ тудар!

¹⁶ Худайның алнындағы ӱлгӱ сіреелерінде одырчатхан чибіргі тӧрт ах сағал, тӱңдере тӱзіп, Худайға пазырғаннар.

¹⁷ Олар чоохтанғаннар: – Ӧӧркі Чайаачы, Син полған, полчатхан паза килер Прай нимедең кӱстіг Худайыбыссың. Илбек ӱлгӱні алып, Хан полыбысханың ӱчӱн, Сині алғыстапчабыс.

¹⁸ Худайы чохтар чабаллан сыхханнар, Синің дее ӧкпеленер тузың читті, ӧліглерні чарғылир тузың читті. Позыңның нымысчыларыңны, ухаанҷыларыңны, ах-арығ кізілеріңні, Сині улуғлапчатхан олаңай паза саблығ кізілерні сыйыхтир тузың читті. Чирні чох итчеткен кізілерні чох идер тузың читті.

¹⁹ Андада тигірде Худайның храмы азыл парған. Храмда Аның молҷағлығ абдыразы кӧрін килген. Тигір чалыннап, табыстар истілгеннер, кӱгӱрт кӱзӱреп, чир тітіри тӱскен, улуғ миндір чаап сыххан.