3 Иоанның 1 - Наа Молҷағ

¹ Мин, Ах сағал, сағаа, аарлығ Гаий, улуғ чолабит ысчам. Син сыннаң минің прай чӱреемнең хынчатхан кізімзің.

² Хынғаным! Синің худың хайдағ амыр-хазых, прай позың андағох чахсы паза амыр-хазых пол тіп, Худайдаң сурынчам.

³ Харындастар, киліп, синің киртінізіңнеңер искіргеннер. Синің Сынға хынчатханыңнаңар паза аны толдырчатханыңнаңар истіп, мин уғаа ӧрін парғам.

⁴ Мағаа палаларымның Сынға киртінчеткеннерінеңер истердең артых ӧрініс чоғыл.

⁵ Хынғаным! Харындастарға, таныс нимес тее харындастарға, полызып, пістің киртініс ӱчӱн ізестіг хылынчазың.

⁶ Харындастарыбыс синің хынызыңнаңар тигірибде киречілееннер. Оларны, Худай чӧпсінер иде чолға тимнеп, ӱдес салзаң, чахсы идерзің.

⁷ Олар, Христосты сабландырар ӱчӱн, Худай пілбинчеткеннердең пір дее полызығ албин, чолға сыхханнар.

⁸ Аннаңар піс, сыннаң оларнаң хада тоғынар ӱчӱн, андағ кізілерге полызарға кирекпіс.

⁹ Мин тигіриб чонына пасхам, че пастых поларға хынчатхан Диотреф пістің сӧстерібіске хайығ салбинча.

¹⁰ Аннаңар, килзем, пісті хомайлап, чабал иткенінеңер, прайзына, чазырбин, кӧні чоохтап пирербін. Ол пісті хомайлаанына даа тоспинча, харындастарны даа позына чағын кирбинче, пасхаларына даа чағын идерге пирбинче, чағын итчеткеннерні тигірибдең сығара сӱрче.

¹¹ Хынғаным! Хомай нимее кӧӧкпин, чахсы ниме ит. Чахсы ниме итчеткен кізі Худайни. Хомай ниме итчеткен кізі Худайны кӧрбеен.

¹² Димитрийдеңер прай чон даа, аның иткен киректері дее, чахсы киречілепчелер. Піс тее іди киречілепчебіс. Пістің киречілеенібістің сын полчатханын сірер дее пілчезер.

¹³ Кӧп нимедеңер сағаа пазарҷыхпын, че черниланаң чаҷында пазарға хынминчам.

¹⁴ Тӱрчедең сағаа тоғазып, кӧстең кӧске чоохтазып аларыма ізенчем.

¹⁵ Амыр-хазых пол. Арғыстар даа сағаа чолабит читірчелер. Позыңның арғыстарыңа, полғанына ла, чолабит читір. Аминь.