2 Коринфтегілерге 12 - Наа Молҷағ

Павелнің кӧспек кӧргені паза азых чооғы

¹ Сағам мағаа, тузазы чох таа полза, махтанарға кирек. Аннаңар Хан-пигдең пирілген кӧспектерімнеңер паза азых чоохтарымнаңар искір пирим.

² Мин Христосха киртінчеткен пір кізіні пілчем. Ол он тӧртче чыл мының алнында (таң сын позы, таң хутта полып – анзын Худай ла пілер) тигірнің иң ӧӧркі, ӱзінҷі тамына сығарылған.

³ Ол кізідеңер паза пір ниме пілчем. Ол (Худай пілер, таң сын позы алай худы ба)

⁴ Худай садынзар кӧдірілген. Анда ол кізі чоохтап таа полбас паза чоохтирға чарабас сӧстерні искен.

⁵ Андағ кізінең мин махтанарбын. Позымның нимеме махтанарбын? Читпестеріме ле.

⁶ Мин махтанарға иткен ползам, анзы алығ иткенім полбасчых. Сынны чоохтирҷыхпын нооза. Че піреелері миннең позымнаң кӧргеннерінең алай искеннерінең артых сағынмазыннар тіп, махтанмаспын.

⁷ Худай мағаа кӧп ниме азых чоохтаан. Анзына иртіре махтанмас ӱчӱн, Худай мағаа, идіме чымҷылға хазаан чіли, мині иреелезін тіп, сайтанның нымысчызын ысхан.

⁸ Аны хыйа идерге Хан-пигдең ӱс хатап сурынғам.

⁹ Че Ол мағаа теен: «Сағаа Минің паарсазым читкіҷе пирілче: кӱс-сағ чох кізіде Минің кӱзім пары артых кӧрінче нооза». Аннаңар, мағаа Христостың кӱзі артых кірзін тіп, кӱс-саам чоғына хынып махтанам.

¹⁰ Мин читпестеріме, сӧклеттіртчеткеніме, сидіксіністеріме, сӱрдірчеткеніме, Христостың ӱчӱн хыйыхтатчатханыма чӧпсінчем. Кӱс-сағ чох чӧрчетсем, андада мин кӱстігбін, нооза.

Павелнің коринфтегілердеңер сағыссырааны

¹¹ Мин махтанып, изім сыхча. Че мині сірер іди полдырғазар. Мин, нимее чарабаан даа ползам, сірернің улуғ илҷілеріңнең пір дее хомай нимеспін.

¹² Минің илҷі полчатханымның киречілестерін – минің тыстанызымны, кӧп хайхастарны, танығларны, таңнастығ киректерні – сірер кӧргезер. Мин оларны сірернің аразында тыстанып иткем.

¹³ Пасха тигіриблерде пар нименің піреезі дее сірерде чох полған ма? Сірерге аар-чӱк полып артылғаным сірерге читпин парған, арса? Мағаа пу пыроны тастирға сурынчам.

¹⁴ Ам ӱзінҷізін сірерзер парарға итчем. Кізі мойнына артылбаспын. Мин сірердең пір дее ниме аларға итпинчем, сірерні постарыңны кирексіпчем. Палалары нимес, паба-іҷе палаларына анығ чыынарға киректер.

¹⁵ Сірер арачылан халар ӱчӱн, мин сірерге позымны даа тӱгеде пир саларға тимдебін. Мин сірерге іди тың хынчатханымда, сірер ноға мағаа асхынах хынчатхан поларзар?

¹⁶ Хайдағ даа полза, мин сірерге, аар-чӱк полып, артылбаам. Сірер, хынза, мині, кӧйтікке санап, постарыңны алаахтырып, ахча алғам тирзер.

¹⁷ Мин сірерзер ысхан кізілернің пастыра пірее ниме сірердең алғам ма?

¹⁸ Мин Титті, алдап алып, пір харындаснаң хада сірерзер ызыбысхам. Ол, сірердең пірее ниме алып, тузаланды ба? Піс анынаң пір кӧңніліг полбаабыс па? Пір чоллығ полбаабыс па?

¹⁹ Арса, піс сірернің алныңарда ахтанарға итчебіс тіп сағынчазар. Чох, Худай киречі, піс Христостың кӧңні хоостыра чоохтапчабыс. Хынғаннарым! Прай пу нимені піс сірернің киртіністеріңні пиктир ӱчӱн чоохтапчабыс.

²⁰ Мин нимедең хорыхчам? Сірерзер килзем, минің кӧңніме кірбес кізілер пол парарларыңнаң хорыхчам. Минің дее тудынғаным сірернің кӧңнілеріңе кірбин парҷаң полбазын. Мин сірерге тоғассам, тартыстарны, істі чохтанысты, ӧкпеленісті, посха ла хынғанын, сӧклесчеткенін, чой чоохтар таратханын, кӧкеесімненісті, ай-пораан полчатханын кӧрерім килбинче.

²¹ Мин хатап килзем, Худайым, сірернің хайди полчатханнарыңны кӧзідіп, мині уйатха сухчаң полбазын. Алында чазых иткен паза арығ нимес хылынған, чӧреес, уйат пілбин тудынғаннарына Худайның алнында пыросынминчатхан кізілердеңер ылғирға киліс парҷаң полбазын.