2 Фессалониктегілерге 3 - Наа Молҷағ

Пістің ӱчӱн пазырыңар

¹ Ол оңдайнаң пістің ӱчӱн пазырыңар, харындастар. Худай сӧзі, сірердӧк чіли тарир паза сабланар ӱчӱн,

² піс, тізең, чабал, чой кізілердең озар ӱчӱн, пазырыңар. Прайзында ла киртініс чоғыл нооза.

³ Хан-пигібіс, тізең, киртістіг. Ол сірерні киртіністе пик турғызар паза сайтаннаң арачылир.

⁴ Піс чахаанны сірер толдырчатханыңарға паза толдырарларыңа Худайыбыс пісті ікінҷілес чох киртіндірче.

⁵ Хан-пигібіс, тізең, чӱрееңерні Худайның хынызынзар паза Христостың тыстанызынзар айландырзын.

Ниме итпин, тик чӧрерінең китеніңер

⁶ Хан-пигібіс Иисус Христостың адынаң чахыпчабыс: арғаас, піс пирген кибір хоостыра чуртабинчатхан харындастаң хыйа парыңар.

⁷ Сірер пістің хоостыра поларға кирек тіп пілчезер. Піс, сірернің араңарда полғанда, арғаастанмаабыс нооза.

⁸ Піс пірдеезінің халазын тик чібеебіс, пірдееңерге аар-чӱк полбасха тіп, хараа-кӱнӧрте майыхханҷа тоғынғабыс.

⁹ Ӱлгӱбіс чохтаңар нимес, че позыбыс сірерге кӧзідім поларға сағынып, іди тудынғабыс.

¹⁰ Піс сірернең хада полғаныбыста іди чахаабыс, хайза: тоғынминчатхан кізі чібеске кирек.

¹¹ Че піс ис халчабыс, сірернің хай піреелері арғаастанчалар, пір дее ниме итпинчелер, прай нимее кірісчелер.

¹² Андағларға піс Хан-пигібіс Иисус Христостың адынаң айланчабыс паза чахыпчабыс: артых суулабин, тоғынып, халастарын чізіннер.

¹³ Сірернің, тізең, харындастар, чахсы киректерні итчетсеңер, кӧңніңер тӱспезін.

¹⁴ Пу пічиибістегі сӧзібіске тообаан кізіні, тізең, хайыға алып, аны уйаттырар ӱчӱн, аннаң хыйа полыңар.

¹⁵ Че аны ыырҷаа санабаңар, харындасты чіли, ӱгредіп одырыңар.

Алғааны

¹⁶ Амыр пирчеткен Хан-пиг Позы, тізең, прай киректерде хаҷан даа амыр кӧңніліг поларға пирзін сірерге. Хан-пигібіс прайзыңарнаң хада!

¹⁷ Минің, Павелнің, пічиимнің тании – позым холымнаң пасхан алғыстас. Мин піди пасчам:

¹⁸ Хан-пигібіс Иисус Христостың паарсазы сірернең прайзыңарнаң хада. Аминь.