1 Петрның 3 - Наа Молҷағ

Ипчілер паза ирлер

^1-2 Сірер, ипчілер, ідӧк ирлеріңнің сӧзінең сыхпаңар. Андада Худай сӧзін испинчеткен хай пірее ирлер, ипчілерінің чуртастары пастыра ла, артых чоохтаспин, Худайға хозыл парарлар. Сірернің арығ сағыстығ, Худайдаң хорығып чуртапчатханнарыңны кӧрзелер, оларға пір дее ниме чоохтирға кирек чох полар.

³ Сірерні састы сіліг ӱрінгені, алтын чазағларны алай кеен кип-азахты кискені нимес,

⁴ че чӱректең тӧріпчеткен нымзах, амыр кӧңніңернің уурабас сілии чазазын. Худай анзын аарлапча.

⁵ Хаҷан-да Худайға ізенчеткен ах-арығ ипчілер дее, ирлерінің сӧзінең сыхпин, постарын іди чазаҷаңнар.

⁶ Іди Сарра, Авраамны хан-пиг адап, аның чооғын исчең. Сірер чахсы ниме итчеткен ползар, паза пір дее нимедең хорыхпинчатсар, Сарраның палалары полчазар.

⁷ Сірер дее, ирлер, ипчілеріңнең чуртап, піліңер: олар порт ідіс осхастар. Оларны улуғлаңар: ипчілер чуртас сыйиин ирлерінең хада аларлар. Андада, пазырчатса, сірерге пір дее ниме харығ полбас.

Чахсы киректернің ӱчӱн ирееледерінеңер

⁸ Ол оңдайнаң сірер прайларың пір сағыстығ, кізее ачынаачы, харындас-пиҷее хынаачы, паарсах, чалахай, пазымнығ поларға кирексер.

⁹ Чабалға чабалнаң, хырызынысха хырызыныснаң нандырбаңар, че алғас аларға хығыртылғаннарыңны піліп, кізілерні улам алғапчадыңар.

¹⁰ Кем чуртасха хынча паза чахсы кӱннерні кӧрері килче, ол кізі ахсын чабал сӧстердең, тілін чой чоохтардаң тудынып одырзын.

¹¹ Чабал нимедең хыйа полып, чахсы ниме итчет. Амырға тартылчат, ағаа харас.

¹² Худайның харахтары ах сағыстығ кізілерзер кӧрчелер. Аның хулахтары пазырчатханнарны тыңнапчалар. Че чабал ниме итчеткен кізілерні, чир-чарыхтаң чох идібізерге тіп, Худай оларға тоғыр кӧрче.

¹³ Чахсы нимее кӱстенчетсер, сірерге пірее кізі хомай идер бе?

¹⁴ Че сын нименің ӱчӱн ирее кӧрчетсеңер, сірер часкалығзар. Олар хорыхчатхан нимедең хорыхпаңар паза сағыссырабаңар.

¹⁵ Хан Худайны чӱректеріңде ах-арығ ал чӧріңер. Сірернің нимее ізенчеткеннеріңні сурчатхан ноо даа кізее нандырығ пирерге хаҷан даа тимде полыңар. Пазымнығ кізілерні, улуғлап ала, нандырчадыңар,

¹⁶ арығ сағыстығ полыңар. Андада сірерні чабал тіпчеткен, Христоста иптіг чуртапчатханнарыңны сӧклепчеткен кізілер постары уйатха кірерлер.

¹⁷ Чабал киректернің ӱчӱн ирее кӧргенҷе, Худайның кӧңнінҷе чахсы киректернің ӱчӱн иреелензе артых полар.

¹⁸ Христос пір хати пістің ӱчӱн иреелен парған. Орта чуртапчатхан Позы сайбағҷыларның ӱчӱн ирееленген. Ол анзын пісті Худайзар ағыларға тіп иткен. Христос кізі чіли ӧдірт салған, че Худынаң тіріл парған.

¹⁹ Ол пиктегдегі хуттарзар Хуттаң пастыра тӱзіп, ӱгреткен.

²⁰ Ол Худайның чооғын испинчеткен кізілер полған. Ной керіп пӱдірчеткен тустардох Худай оларға ӱр тыстанған. Ол керіпте кӧп нимес, сигіс кізі суғдаң арачыланып алған.

²¹ Амды піс тее суғ пастырох кіреске тӱсчебіс. Че анзы кізінің идінің кірін арығланғаны нимес. Ол Худайзар арығ чӱректіг айланғанын таныхтапча. Іди кіреске тӱскені Иисус Христостың тірілгені пастыра сірерні арачылапча.

²² Иисус Христос Худайның оң холында одырча. Хаҷан Ол тигірзер ӧӧрлебіскеніңде, Аның чооғын ангеллер паза ӱлгӱлер паза кӱстер ис сыхханнар.