1 Коринфтегілерге 7 - Наа Молҷағ

Алызардаңар

¹ Сірер мағаа пасханнарың хоостыра, тізең, кізее, ипчі албаза, чахсы полар.

² Че чӧреес хылыхтығ полбас ӱчӱн, полғаны ла позының ипчізінең хонзын, полған на ипчі позының ирінең хонзын.

³ Ирі ипчізіне, ирі полып, пирерге кирегін пирзін. Ипчізі ідӧк иріне, ипчізі полып, пирерге кирегін пирзін.

⁴ Ипчі кізі позының идіне ээзі нимес, ирі аның ээзі. Ирі дее позының иді-ханына ээзі нимес, ипчізі ағаа ээзі.

⁵ Чара хонмаңар. Хада чоохтас салза ла, пазырарға алай ораза тударға итчетсеңер, чара поларға чарир. Соонаң, сайтан сірерні пос салынарға кӧктірбес ӱчӱн, пазох хада хончадыңар.

⁶ Итсе, ол чахығ нимес, че піди идерге хынзаңар, пу минің чаратханым полча.

⁷ Прай кізілерні мин осхас ползыннар тіп сағынчам. Итсе, полғанының позының Худай салғаны пар: пірсіни мындағ, паза пірсіни пасхох.

⁸ Хоных хонмааннарға паза чалғыс-чарым халған ипчілерге мин чіли чӧргені чахсы полар тіп чоохтапчам.

⁹ Ханнарын пазын полбинчатсалар, хоных хонзыннар. Хоных хонғаны ханнарын ойнатханнаң оларға артых полар нооза.

¹⁰ Хоных хон салғаннарға, тізең, ипчізіне ирінең чарылыспасха чахыпчам, мин дее нимес, Хан-пиг чахығ пирче.

¹¹ Чарылыс парза, тізең, чалғыс-чарым чӧрчетсін алай ирінең чарас салзын. Иріне дее ипчізінең чарылыспасха.

¹² Пасхаларына, тізең, Хан-пиг нимес, мин чоохтапчам: пірее харындастың ипчізі киртініс чох полза паза ол ипчі харындазыбыснаң чуртирға хынчатхан полза, ол кізі аны халғыспасха кирек.

¹³ Киртініс чох ирліг ипчі дее, хонғаны аннаң хада чуртирға хынчатса, аны халғыспасха кирек.

¹⁴ Киртініс чох ир киртіністіг ипчізінің пастыра Худайға чағыннапча. Киртініс чох ипчі киртіністіг ирінің пастыра Худайға чағыннапча нооза. Іди полбаан полза, палалар арығ полбасчыхтар. Амды, тізең, олар ах-арығлар.

¹⁵ Киртініс чох кізі, чарылызарға идібіссе, чарылыссын. Харындас алай пиҷе андағ киректе палғалых ниместер: Хан-пиг ынағ поларға хығыртхан пісті.

¹⁶ Ипчі, иріңні арачылап поларыңны хайдаң пілчезің? Алай син дее, ир, ипчіңні арачылап поларыңны хайдаң пілчезің.

Худай сірерге хайди салған, іди чуртап одырыңар

¹⁷ Худай полғанына хайди салған, Хан-пиг хайди хығырған, іди пол. Мин іди прай тигіриблер чонына чахыпчам.

¹⁸ Сӱннет кистіргені хығыртылған полза, чазынмазын, сӱннет кистірбеені хығыртылған полза, кистірбезін.

¹⁹ Кистірері дее пір тик ниме, кистірбезі дее андағох. Че иң ӧӧні – Худай чахығларын толдырары.

²⁰ Полғаны ла, кем полып хығыртылған, ідӧк халзын.

²¹ Хул даа полған ползаң, кирек халба, че пос пол полар ползаң, анзынаң тузаланып ал.

²² Хан-пигнең хада хығыртылған хул ол Хан-пигнің пос кізізі, че пос кізі полчадып, хығыртылғаны даа Христостың хулы полча нооза.

²³ Сірерні аарлығ пааға садызып алғаннарында, кізілернің хуллары полыбыспаңар.

²⁴ Харындастар, хығыртылғанда кем полғазар, Худайның алнында ідӧк ле халыңар.

Кізі теңмеен чӧрердеңер паза хоных хонардаңар

²⁵ Кізі теңмеен чӧрердеңер минде Хан-пигнің чахығлары чоғыл. Че Хан-пиге киртістіг поларға Аннаң ӧлҷей алған кізі чіли чӧп пирчем.

²⁶ Сидік тустар пасталыбыстылар. Аннаңар сағынчам: кем хайди чуртапча, ідӧк халзын.

²⁷ Ипчіңнең пірік парғазың ма? Чарылызарға кӱстенме. Ипчі чох хал пардың ма? Ипчі тілебе.

²⁸ Итсе, хоных хонзаң даа, чазых итпессің. Хыс таа ирге парза, чазых итпес. Че андағлар ит-ханнары пастыра чобағлығ пол парарлар. Мағаа, тізең, сірер айастығзар.

²⁹ Мин сірерге, харындастар, піди тирім: тус асхынах халча, аннаңар ипчіліглер ипчі чох осхас поларға киректер.

³⁰ Ылғапчатханнары ылғабинчатханнар чіли, ӧрінчеткеннері ӧрінминчеткеннер чіли, садызып алчатханнары албинчатханнар чіли,

³¹ пу ах чарыхтағы нимелерні тузаланчатхан кізілер тузаланминчатханнар чіли поларға киректер: піс пілген ах чарых иртісче нооза.

³² Мин, тізең, сірернің сағыссырастарың чох ползын тіп сағынчам. Ипчі албаан кізі Хан-пигнинеңер сағыссырапча, Хан-пигнің кӧңніне кірердеңер.

³³ Ипчіліг кізі, тізең, чуртастаңар сағыссырап, ипчізінің кӧңнінҷе пол пирерге кӱстенче. Ирліг ипчі дее хыстаң пасхалалча.

³⁴ Ир чоғы Хан-пигдеңер сағынча, Хан-пигнің кӧңніне кірердеңер. Иді-ханын даа, худын даа ах-арығ тудардаңар сағыссырапча. Ирліг ипчі, чуртастаңар сағыссырап, ирінің кӧңнінҷе пол пирерге кӱстенче.

³⁵ Сірергеӧк туза идерге тіп аны чоохтапчам. Сірерні хысти пазар ӱчӱн нимес, че Хан-пиге ойын пазы нимес, иптіг оңдайҷа, тохтадынмин чӧрінзіннер тіп чоохтапчам.

³⁶ Итсе, піреезі позының хызына, час чит парып хыс полып чӧрчеткеніне чарадынминчатса, хайди хынча, іди итсін, чазых ит салбас. Андағлар ирге парзыннар.

³⁷ Че кӱстетпин, пос кӧңнінең хоных хонмасха чарат салған кізі, пос хылиинаң аны итчетсе, ниме идерін чӱреенде пӧгін салза, сӧлескен хызынаң алыспазалар, чахсы идерлер.

³⁸ Аннаңар хызын ирге пирчеткен кізі орта итче, че ирге пирбинчеткені артых итче.

³⁹ Ипчі ирі изен чӧргенінҷе ӱлгӱ холынаң сыхпинча. Ирі ӱреп парза, тізең, кемге хынза, ағаа парарға чарапча, итсе, Хан-пигдегі кізее.

⁴⁰ Че минің чӧбімҷе ол ипчі чалғыс-чарым хал парза, часкалығ полар. Мин зе Худай Худы минде парох тіп сағынчам.