1 Коринфтегілерге 15 - Наа Молҷағ

Христостың тірілерінеңер

¹ Харындастар, мин сірерге чарлаан паза сірер, посха алынып, анда пик турыбысхан Чахсы Хабарны сағыстарыңа кирчем.

² Сірер минің ӱгреткенім хоостыра Чахсы Хабарны сағыстарыңда тутчатсаңар паза ағаа киртіністерің тик-хуруғ полбинчатса, Чахсы Хабарнаңох арачыланып аларзар.

³ Мин позым аны пастабох хайди алынғам, сірерні ағаа іди ӱгреткем нооза: Худай Пічии хоостыра Христос пістің чазыхтарыбыс ӱчӱн ӧл парған.

⁴ Худай Пічии хоостыра Ол, тыхтал парып, ӱзінҷі кӱнінде тіріл парған.

⁵ Соонаң Аны Кифа кӧр салған, анаң он ікі ӱгренҷізі.

⁶ Анаң пір туста пис чӱс артиинаң харындастарыбыс Аны кӧр салғаннар – оларның кӧбізі пу тусха теере изен, че хайзылары ӱреп парғаннар.

⁷ Анаң Иаков, ідӧк прай илҷілер Аны кӧр салғаннар.

⁸ Прайзының соонаң, тізең, тузында тӧрібеен кізі полып, мин Аны кӧргем.

⁹ Мин илҷілернің иң кічиибін, илҷі тіп адаларға даа турыстығ нимеспін. Мин Худай тигірибін сӱргем нооза.

¹⁰ Ам кем полчам, мин Худай паарсазы сылтаанда пол парғам. Худай паарсазы, тізең, тик полбаан. Мин пасха илҷілердең кӧп тоғынғам. Итсе, сынында пу минің тоғызым нимес, че миннең пастыра пирілчеткен Худай паарсазы.

¹¹ Ӧӧні мында: минің ӱгредиим пасха илҷілернің ӱгредиинең пір. Пу ӱгредіге сірер прайзыңар киртін парғазар.

Пістің тірілерібістеңер

¹² Христос ӧліглердең тіріл парған тіп ӱгреділчеткенде, ноға сірернің хай піреелерің ӧліглер тірілбинчелер тіпче полҷаңнар.

¹³ Ӧліглер тірілбинчетселер, Христос таа тірілбеенге килісче.

¹⁴ Христос тірілбеен полза, тізең, пістің ӱгредиибіс тик, киртіністерің дее сірернің тик.

¹⁵ Ағаа хоза, піс тее Худайдаңар чой киречі пол парчабыс. Піс Худай Христосты тірілдірібіскен тіп киречілепчебіс нооза. Ӧліглер тірілбинчеткенде чи зе, Худай Христосты тірілдірбеен пол парча.

¹⁶ Ӧліглер тірілбинчеткеннеңер, Христос таа тірілбеен пол парча.

¹⁷ Христос тірілбеен полза, киртіністерің тик ниме паза сірер алындағыох чазыхтарыңда чӧрчетчезер.

¹⁸ Христосха киртініп ӧлгеннері дее чох пол парғаннар.

¹⁹ Піс Христосха пу ла чуртаста ізенчетсебіс, кізілер пісті прайзынаң тың айирға киректер.

²⁰ Сынында Христос ӧліглердең тірілдіріл парған. Іди Ол соонаң тірілерлернің пастағызы пол парған.

²¹ Ӧлім пір кізінің сылтаанда килген, ӧліглердең тірілері дее пір кізініңӧк сылтаанда пирілген нооза.

²² Прайзы Адамның тӧлі полчатханнаңар ӧл парча. Че Христостың тӧлі полчатханнары прайзы тіріл парар.

²³ Полғаны ла позының тузында. Пурнада прай нименің пазы полчатхан Христос, анаң, Ол хатабох килер туста, Христостың чоны.

²⁴ Андада прай нименің тоозылғаны полар. Христос прай пастыхтарны, ӱлгӱлерні, кӱстерні чиңіп алар паза Позының хан-ӱлгӱзін Худай-Пабаа пир салар.

²⁵ Ағаа, прай ыырҷыларын Позының азаа алтына тастабысханынҷа, хан-ӱлгӱзін тударға кирек.

²⁶ Христос чиңен тӱгенҷі ыырҷызы ӧлім полар.

²⁷ Худай Пічиинде чоохталча нооза: «Прай нимені Христостың азаа алтына сал пирер». Че «прай нимені» теені Худайдаңар чоохтабинчатханы пілдістіг. Худай Позы прай нимені Христостың азаа алтына сал пирер нооза.

²⁸ Хаҷан прай ниме Христостың ӱлгӱзінде полза, андада, Оолғы Позын даа Худайның холына пирібізер. Худай андада прай нимее хан-ӱлгӱзін тудар.

²⁹ Ӧліглернің орнына кіреске тӱсчеткен кізілер нимее чидерге сағынча полҷаңнар? Ӧліглер тірілбинче тіпчеткеннері сын полза, нимее олар ӧліглернің орнына кіреске тӱсче полҷаңнар?

³⁰ Піс тее нименің ӱчӱн хыйалда сыбыра чӧрчеткен полҷаңмыс.

³¹ Мин кӱннің дее сай ӧлімнең тоғасчам. Анзы, сірернең хада Хан-пигібіс Христос Иисуста чуртапчатханыма кееркезім осхас, сын киречілезім.

³² Кізі сағызы хоостыра кӧрзе, мин Ефес саарда аңнарнаң кӱрескенімде, ноо туза полған ол мағаа? Ӧліглер тірілбинчеткен полза, чеелер, ізеелер, таңда олох ӧл парарбыстар нооза.

³³ Пос посты алаахтырынмаңар: «чабал кізілернең нанҷыласханы чахсы хылыхтарны ардатча».

³⁴ Пос сағызын алыныңар паза чазых итпеңер. Уйатха, сірернің піреелері Худай пілбинчелер.

Ӧліглернің тірілерінеңер

³⁵ Итсе, піреезі тир: ӧліглер хайди тірілҷең полҷаңнар? Хайдағ ит-ханда чиде саларлар?

³⁶ Сағыс чохтар! Таарылған ӱрен, ӧл парбаанда, тірілбинче.

³⁷ Таарыпчатсаң, полар ӧзімні таарыбинчазың, ӱренні ле, пуғдайнин алай пірее пасхазын таарыпчазың нооза.

³⁸ Че Худай ағаа хынғанни наа кӧрім пирче, полған на ӱренге позынин.

³⁹ Ит-хан пір нимес: кізіни пір, мални, хусти, палыхти пасхох.

⁴⁰ Тигірдегі ит-хан пар, пу чирдегізі парох. Че тигірдегінің паза пу чирдегінің сілии пасха полча.

⁴¹ Кӱннің сілии пасха, айни пасхох, чылтысти пасхох. Чылтыс чылтыстаң сілиинең пасхалалыбохча.

⁴² Ідӧк ӧліглер тірілгені андағох полар: ӧлерге таарылча, ӧлбеске кӧдірілче.

⁴³ Уйан полып таарылча, сабланысха кӧдірілче, кӱс-саа чох таарылча, кӱзінде кӧдіріл килче.

⁴⁴ Тыннығ ит-хан таарылча, хуттығ ит-хан кӧдіріл килче. Тыннығ ит-хан полза, Худай хуттығ ит-хан полыбохча.

⁴⁵ Худай Пічиинде пазылых: пастағы кізі Адам чуртапчатхан тын полған, тӱгенҷі Адам, тізең, тірілдірчеткен хут полча.

⁴⁶ Че Хуттығ ит-хан нимес, тыннығ ит-хан пурнада полча. Хуттығ – соонаң пол парча.

⁴⁷ Пастағы кізі чирдең пӱткен, холнаң чайалған, ікінҷі кізі тигірдең тӱскен Хан-пиг.

⁴⁸ Чирдең пӱткен кізі хайдағ, чирдегілері андағох. Тигірде кізі хайдағ – тигірдегілері андағохтар.

⁴⁹ Піс тее чирдегі кізілернің омазында чӧргебіс, тигірдегі кізінин ал чӧрерӧкпіс.

⁵⁰ Че, харындастарым, мыны чоохтап пирим сірерге: ит паза хан Худай хан-чирін ал полбастар паза тӱген парчатханы мӧгі чуртасха чидін полбинча.

⁵¹ Мин сірерге чазыт ниме ас пирим: піс прайзыбыс ла ӧлбеспіс, че прайларыбыс алыс парарбыс.

⁵² Кинетін не, харах нууғанҷа, тӱгенҷі пырғы тапсабысса, ӧліглер мӧгі ит-ханнығ турыбызарлар, піс, тізең, алыс парарбыс.

⁵³ Ӧлімніг ит-хан мӧгі ит-ханға айлан парарға кирек. Ӧлер ит-хан ӧлбес ит-хан пол парарға кирек.

⁵⁴ Хаҷан ӧлімніг ит-хан мӧгі ит-ханға айланза паза ӧлер ит-хан ӧлбес ит-хан пол парза, андада Худай Пічиинде пазылғаны толар: «ӧлім чох иділ парған, чиңені полды».

⁵⁵ Ӧлім! Хайда синің чыдаң? Чир тӧбіні, хайда синің чиңізің?

⁵⁶ Ӧлімнің чыдазы, тізең, – чазых, чазыхтың кӱзі – Моисей Чахии.

⁵⁷ Че Хан-пигібіс Иисус Христостың пастыра чиңіс сыйлаан Худайға алғыс ползын.

⁵⁸ Аннаңар, хынған харындастарым, пик сағыстығ, тӧдір пазынмас полыңар. Хан-пигнің алнында сірер итчеткен кирееңер тик полбинчатханын пілчеткеннеріңде, Хан-пигнің киреенде маңнанысха чидіңер.