1 Иоанның 2 - Наа Молҷағ

Наа чахығ паза иргі чахығ

¹ Палаларым! Мин сірерге, чазых итпезіннер тіп, пу нимені пасчам. Че сірернің пірееңер чазых ит салза, Худай Пабаның алнында пістің алныбыс алҷаң Иисус Христос пар. Ол ах-арығ нооза.

² Ол пістің паза пістің не нимес, че прай чир ӱстӱндегі кізілернің чазыхтары ӱчӱн тайыға салдыртхан.

³ Худайны пілчеткенібісті хайди піліп алчабыс? Аның чахығларын толдырып.

⁴ Пірее кізі «Мин Худайны пілчем» тіпчетсе, че Аның чахығларын толдырбинчатса, ол чой кізі, анда сын ниме чоғыл.

⁵ Худайда полчатханыбысты хайди піліп алчабыс? Худайның сӧзін толдырчатхан кізіде Худайға хыныс пӧзиине чит парча. Анзын кӧріп, піліп алчабыс!

⁶ Худайда полчам тіпчеткен кізее Иисус Христос чіли чуртирға кирек.

⁷ Хынғаннарым! Мин сірерге наа чахығны нимес, че иргі чахығны пасчам. Пу пурунғы чахығ, сірер Христосха киртін сыххан тустох искен чахсы хабар.

⁸ Че мин пасчатхан чахығ наа чахығ полыбохча. Пу чахығ Иисус Христостың паза сірернің чуртазыңарда сыннаң пар. Аннаңар харасхы иртче, аның орнына сын чарых чарытча.

⁹ Позынаңар «Чарыхта полчам» тіпчеткен, че харындазын хырт кӧрчеткен кізі ам даа харасхыда чуртапча.

¹⁰ Харындазына хынчатхан кізі чарыхта чуртапча, аның чазых итчең сағыстар пір дее чоғыл.

¹¹ Харындазын хырт кӧрчеткен кізі, тізең, харасхыда чуртапча. Харасхы аның харахтарын туу чабысханнаңар, харасхыда чӧрче, іди чӧріп, хайдар парчатханын даа пілбинче.

Чир-чалбахтағыларның киректеріне хынмаңар

¹² Палаларым! Иисус Христостың ӧлгені ӱчӱн сірернің пыроңар тасталған, аннаңар сірерге пасчам.

¹³ Пабалар! Кемнің иң пастабох пар полғанын пілчеткенерің ӱчӱн, сірерге пасчам. Чииттер! Сайтанны чиңіп алғаннарың ӱчӱн, сірерге пасчам. Палаларым! Пабабысты піліп алғаннарың ӱчӱн, сірерге пасчам.

¹⁴ Пабалар! Кемнің иң пастабох пар полғанын піліп алғаннарың ӱчӱн, сірерге пас пирдім. Чииттер! Кӱстіг полчатханнарың ӱчӱн, Худай сӧзін толдырчатханнарың ӱчӱн, сайтанны чиңіп алғаннарың ӱчӱн, сірерге пас пирдім.

¹⁵ Сірер пу Худайы чох чир-чалбахха паза андағы нимелерге хынмаңар. Оларға хынчатхан кізінің Худайға хынызы чоғыл.

¹⁶ Чир-чалбахтағы нимелер: кізінің прай нимее хыҷыхтанғаны, тоспас харах полғаны, ӱлгее паза пайға поғдархааны Пабадаң ниместер, че чир-чалбахтилар.

¹⁷ Чир-чалбах паза аның хыҷыхтаныстары ирт парадыр, че Худайның кӧңнін толдырчатхан кізі хаҷан даа чуртидыр.

Антихрист – Христос ыырҷызы

¹⁸ Палаларым! Тӱгенҷі тус чит килді. Антихрист тилекейге килерінеңер сірер искезер. Амды кӧп антихристтер сых килгеннер, аның хоостыра піс тӱгенҷі тустың чит килгенін пілчебіс.

¹⁹ Олар пістің арабыстаң сыхханнар, че пістің киртінгенібіс чіли киртінмин, пісти полбааннар. Пісти полған ползалар, піснең хада халарҷыхтар. Че оларның пістең хыйа парыбысханы пісти нимес полчатханын кӧзітті.

²⁰ Худайның ах-арығ Оолғы, тізең, сірерге Худай Худын пиргеннеңер, сірер прай ниме пілчезер.

²¹ Мин сірерге сын ӱгредігні пілбинчеткеннерің ӱчӱн паспаам. Сірер ол ӱгредігні пілчезер. Ол ӱгредігдең пір дее чой ниме сыхпазын даа пілчезер.

²² Кемдір ол, чой? Иисусты Мессий Арачылағҷы полбинча тіпчеткен кізі нимес пе зе? Ол Худай Пабаа даа, Аның Оолғына даа киртінминчеткен антихрист полча.

²³ Худайның Оолғына киртінминчеткен кізі Пабазына даа киртінминче. Худайның Оолғына киртінчеткен кізі, тізең, Пабазына даа киртінче.

²⁴ Иисус Христосха киртініп пастаан тустох искен нимелер чӱрееңерде ползын. Ол тустох искен нимелер чӱрееңерде полза, сірер Оолғында даа, Пабада даа поларзар.

²⁵ Иисус Христос піске мӧгі чуртасты пирерге хынча нооза.

²⁶ Мыны мин сірерні алаахтырарға итчеткен кізілердеңер пас пирдім.

²⁷ Иисус Христостаң пирілген Худай Худы сірерде полча, аннаңар сірерні ӱгредерге кирек чоғыл. Ол Хут сірерні прай нимее ӱгретче. Ол сын, Анда чой ниме чоғыл. Аннаңар сірер Ол ӱгреткен оңдайҷа чуртаңар.

²⁸ Аннаңар, палаларым, Иисус Христосха киртініңер. Андада Ол килзе, піс чалтанмаспыс паза Аның алнында уйатпин турарбыс.

²⁹ Сірер, Аның орта итчеткенін пілчетсер, орта итчеткен полған на кізінің Худайдаң тӧреенін дее пілерге кирексер.