1 Фессалониктегілерге 5 - Наа Молҷағ

Иисус ікінҷізін килер тустаңар

¹ Хан-пигібістің килер тузы-тимінеңер, харындастар, сірерге пазарға кирек чоғыл.

² Постарың даа пілче нооңзар, Худай кӱні, хараа оғыр кіргендег, ус-санабас чиде салар.

³ Хаҷан «Ізестіг амыр паза хорығыс чох тус» тіпчетселер, пала таапчатхан ипчінің толғахтары пасталғанни, кинетін сайбағлар тузы чиде тӱзер – аннаң пірдеезі ос полбас.

⁴ Че сірер, харындастар, харасхыда нимессер, аннаңар пу кӱн сірерге, оғыр чіли, кинетін чағдабыспас.

⁵ Прайзыңар сірер чарыхтың паза кӱннің палаларызар – піс тӱн харааның даа, харасхының даа палалары нимеспіс нооза.

⁶ Аннаңар піс, киртінізі чохтар чіли, узуғлабааңар, че тимніг, сах чӧрееңер.

⁷ Узупчатханнар хараазын узупчалар, ісчеткеннер хараазын ізініп алчалар.

⁸ Піс, тізең, кӱн-чарыхтың оолларыбыс. Аннаңар піс, киртініс паза хыныс хуйағынаң чабынып, арачыланысха ізеністің пӧриин кизіп алып, сах чӧрееңер.

⁹ Худай пісті ӧкпезін читірерге тіп салбаан нооза, че Хан-пигібіс Христос Иисустың пастыра арачыланыс аларына салған.

¹⁰ Ол пісті уйғуда ба, тимніг чӧрзебіс пе, Анынаң хада чуртазыннар тіп, пістің ӱчӱн тынын пир салған нооза.

¹¹ Аннаңар сағам сірер хайди итчезер, ідӧк удур-тӧдір часхарызыңар паза ӱгредізіңер.

Тигірибде хайди тудынардаңар

¹² Харындастар, сірернің араңарда тоғынчатханнарны, сірернең устапчатханнарны, киртіністе чуртирға ӱгретчеткеннерні улуғлирға алданчабыс.

¹³ Тоғыстары ӱчӱн хынып, аарлааңар оларны. Пос аразында ынағ полыңар.

¹⁴ Харындастар, сах ідӧк арғаастарны сизіндіріңер, туртухчатханнарны кӧдіре алыңар, полынмастарға полыс турыңар, прайзынаң тыстанып тудыныңар.

¹⁵ Кӧріңер, пірдеезі чабалға чабалнаң нандырбазын, пос посха даа, пасхаларына даа чахсы итчедіңер,

¹⁶ сыбыра ӧріністіг полыңар,

¹⁷ сыбыра пазырыңар,

¹⁸ прай нименің ӱчӱн алғаңар: Христос Иисусха киртінчеткен ползаңар, Худайның сірерге андағ кӧңні.

¹⁹ Худай Худын ӱзірбеңер,

²⁰ ухаанҷыласты нимее салбин полбаңар.

²¹ Прай нимені сынаңар, чахсаа тудыныңар,

²² ноо даа чабал нимедең озыңар.

²³ Амыр пирчеткен Худайыбыс Позы сірерні тооза ах-арығ ит салзын. Хан-пигібіс Иисус Христостың килеріне сірернің худыңар, кӧңніңер, идіңер пырозы чох хайраллал халзыннар.

²⁴ Сірерні хығыртхан Худай киртініске турыстығдаңар аны ит полар.

Анымҷохтасханы

²⁵ Харындастар, пістеңер пазырыңар,

²⁶ прай харындастарны ах-арығ кӧңніңернең, охсанызап, алғаңар.

²⁷ Хан-пигібістің адынаң пу пічиимні прай ах-арығ харындастарыбысха хығыр пирерге алданчам.

²⁸ Иисус Христостың паарсазы сірернең хада. Аминь.