1 Фессалониктегілерге 4 - Наа Молҷағ

Худайның кӧңніне кірчеткен чуртас

¹ Мының соонаң, харындастар, Христос Иисустың адынаң алданчабыс сірердең, хайди поларынаңар паза Худайның кӧңнінҷе ниме идерінеңер пістең кӧзідім алып, пу киректе маңнанысха чит турыңар.

² Пілче нооңзар, Хан-пигібіс Иисустаң хайдағ чахығларны сірерге читіргенібісті.

³ Худай кӧңні андағ: ах-арығ чуртас чуртирға, чӧреес хылыхха пастырбасха.

⁴ Полғаны ла позының ирепчі хонығында ах-арығ кӧңніліг ползын, удур-тӧдір аарлазып хылыныссыннар.

⁵ Худай пілбинчеткен чоннар чіли, сайбах сағыстарға салынмаңар.

⁶ Харындастарыңның хонығына чойнаң сыынып алып, аны сайбабаңар: Хан-пиг – піс анзын сірерге чоохтаан паза сизіндірген полғабыс – андағ нименің ӱчӱн хатығлир.

⁷ Худай сірерні кір-похсахха пастырбасха, ах-арығ чуртирға хығырған.

⁸ Пу ӱгредіге тоғырланчатханнар кізее нимес, че Худайға тоғырланчалар. Ол, тізең, сірерге Позының ах-арығ Худын пирче нооза.

⁹ Харындастар чіли хынызардаңар сірерге пазары даа кирек чоғыл, сірерні постарыңны даа Худай удур-тӧдір хынарға ӱгрет салған.

¹⁰ Сірер тиксі Македон чирінде дее харындастарыңа ідӧк хылынча нооңзар. Алданчабыс сірердең, харындастарыбыс, улам кӱстенерге:

^11-12 киртінізі чохтар алнында иптіг тудынар ӱчӱн паза пір дее нимедең хызылбас ӱчӱн, піс чоохтаанни, амыр чуртап, пос киреен идіп одырарға паза пос холынаң тоғынарға матап сіреніңер.

Хан-пигібістің ікінҷізін килері

¹³ Харындастар! Сірер, ізеніс чох кізілер чіли, чобалбас ӱчӱн, киртіністе ӱреен кізілернең ниме поларын пілзіннер тіп сағынчам.

¹⁴ Піс Иисус, ӧліп, тірілгеніне киртінчетсебіс, піс, Ол хатап айланза, Худай Анынаң хада Иисусха киртініп ӱрееннерні ағыларына ідӧк киртінерге кирекпіс.

¹⁵ Піс Худай ӱгредии хоостыра чоохтапчабыс нооза: піс, Хан-пигібіс килер тусха тіріг чӧрер кізілер, алында ӱреен кізілердең пурун Ағаа тоғаспаспыс.

¹⁶ Архангел ӱні истіл парза паза Худайның пырғызы тапсабысса, Хан-пигібіс Позы даа тигірдең тӱс килер, Христосха киртініп ӱрееннер пурун тіріл килерлер,

¹⁷ анаң піс, тіріг халғаннары, оларнаң хада-пірге пулуттарда чыыл парып, Хан-пигінең ӧӧре тоғас парарбыс. Соонаң Хан-пигінең сыбыра хада поларбыс.

¹⁸ Ана іди пу сӧстернең удур-тӧдір часхарызыңар.