1 Фессалониктегілерге 2 - Наа Молҷағ

Павелнің Фессалониктегі тоғызы

¹ Постарың даа, харындастар, сірерзер килгенібістің тик полбаанын пілчезер.

² Че, сірер пілчезер, пастап Филипп саарда хыйал кӧріп, сӧклеттіріп, кӧп тоғырланыстарға хайбин, Худайның піске пирген илбек махачыланызынаң Худайның Чахсы Хабарын сірерге читірерге тідінібіскебіс.

³ Пістің ӱгредиибісте алҷаастаныс таа, хара сағыстар даа, кӧйтіктеніс тее чоғыл нооза.

⁴ Че Худай пісті Чахсы Хабар тарадарға турғысханда, піс, кізі кӧңніне кірерге нимес, че чӱреебісті сынапчатхан Худайның кӧңніне кірерге полып, чоохтапчабыс.

⁵ Пілче нооңзар, сірернің алныңарда чойырхос сӧстерін хаҷан даа чайбаабыс, кӧйтіктенмеебіс: Худай киречі!

⁶ Сірер дее, пасхалары даа пісті махтазыннар тіп сағынминчабыс.

⁷ Піс, Христос илҷілері полчадып, улуғ кӧӧліг чиде тӱзер полғабыс. Че піс, сірернің араңарда полғаныбыста, сірерге, іҷе палаларына чіли, сағыссыраабыс.

⁸ Піс сірерге хынчатханнаңар, сірерге Худайның Чахсы Хабарын на нимес, че чуртазыбысты даа пирерге тимде полғабыс. Іди сірер піске аарлығ пол пардыңар!

⁹ Сірер, харындастар, пістің ӱзе тоғынғаныбысты ундубаан поларзар: пірдеезіне аар-чӱк поларға хынмин, хараа-кӱнӧрте тоғынғабыс. Олох туста піс Худайның Чахсы Хабарын сірернің араңарда таратхабыс.

¹⁰ Сірернің, Худайға киртінчеткеннернің, алнында піс ах сағыстығ, арығ чӱректіг, кӧйтіктенмин тудынғанға сірер дее, Худай даа киречі.

^11-12 Пілче нооңзар, хайди піс полғаныңардаң, паба палаларынаң чіли, сурынғабыс, ӱгреткебіс паза алданғабыс: сірерні Позының хан-чиріне паза сабланызына хығыртхан Худайыбысха турыстыра тудыныңар тіп.

Павел сӧсті алынғаннарға ӧрінче

¹³ Аннаңар, сірер пістең искен Худай сӧзін, кізі сӧзін чіли нимес, че Худай сӧзін чіли алынғаннарың ӱчӱн, Худайыбысты сыбыра алғыстапчабыс. Ол сынынаң Худай сӧзі паза сірерге, киртінчеткеннерге, тееліп, сірерні алыстырча.

¹⁴ Сірер, тізең, харындастар, Иудей чиріндегі Иисус Христосха киртінчеткен Худай тигіриблерінің чолынҷа пар сыхтыңар: олар иудейлерге хыйыхтатханни, сірер дее пос чонынаң ирее кӧрдіңер.

¹⁵ Ол иудейлер Хан-пигібіс Иисус Христосты паза Аның ухаанҷыларын ӧдір салғаннар. Пісті дее сығара сӱрібіскеннер. Худайның кӧңнін толдырбин, прай даа кізілерге тоғырланчалар.

¹⁶ Олар піске Худайның Чахсы Хабарын чоннарға, арачыланзыннар тіп, тарадарға пирбинчелер. Іди полып, олар постарының чазыхтарының санын хосчалар. Че мына Худайның чарғызы оларға чидібӧк одыр.

Павелнің Фессалоник саарда хатап полып аларға сағынғаны

¹⁷ Харындастар! Піс сірердең ӱр нимеске ӧкіс хала парғаныбыста – итсе, чӱреебісте піс сірернең хаҷан даа чарылыспаабыс – сірерні кӧрерібіс уғаа тың килчеткеннеңер, сірерзер айланарға кӱстенгебіс.

¹⁸ Аннаңар піс, улам мин, Павел, сірерзер килерге пір ле хати сағынмаабыс, че піске сайтан харығ пол парған.

¹⁹ Сірернің ӱчӱн нимес пе, пістің ізеніс, ӧрініс пар паза Иисус Христос килген туста, Аның алнында Чахсы Хабарның чиңізінең махтанар оңдай пар?

²⁰ Сірер пістің сабланызыбыс паза ӧрінізібіс полчазар нооза.