Sabi 22 - Hdi

Zlahuha ta ghəŋa nghapta ka skwa mndu

¹ « Ka lagha lu ka ksaftá ghali ta zlra həga girviɗik, ka dzə lu ka mtutá tsi ná, haɗ usa tsa ghali ya ma dzva tsa mndu ta dzata ya wa.

² Ala, ka nda ghada tsaɗa vli ta dzatá lu ta tsa ghali ya katsi, ma dzva tsa mndu ta dzata ya usa tsa ghali ya. Dzaʼa play ghali ta skwi ghalaf tsi. Ka haɗ skwa ni wu, dzaʼa skwap skwa lu ka vuʼa ta ghala ni.

³ Ama ka slaf sla lu ta tsa skwi ghalaf tsi ya ma dzva ni ta nda hafu katsi, dər sla tsi, dər kəɗih tsi, dər rina fisik a tsi, ka skwi his dzaʼa plata tsa ghali ya ta tsa skwi ya.

⁴ Ka lagha mndu ka zlanaghatá rina ni ta ghəŋa vwaha nimaya, ka vwaha inaba sana mndu a tsi ka zuta katsi, dzaʼa plana pla tsa mndu ya nda nimaya, ka inabi a tsi ya ɗina ta vwaha ni.

⁵ Ka lagha mndu ka viŋtá vu ka ksatá tsi ta mtak, ka sliʼaftá tsa vu ya ka driŋtá ghwatá alkama sana mndu ta ŋzanata, ka nzakwa ni ta vwah ta kul ndəhaku a tsi, ka vwah a tsi, tsa mndu ta fiŋtá vu ya ná, dzaʼa plana pla taɓta tsa skwi fiŋ tsi ya.

⁶ Ka lagha mndu ka vlaŋtá tsedi, ka sana skwa ni a tsi ta sana mndu ŋa ŋanata, ka lagha ghali ka ghalaghata ga taŋ, ka ksaf ksa lu, his dzaʼa plata tsi.

⁷ Ala ka ksaf a lu ta tsa ghali ya wu katsi, lagha tsa daŋahəga ya ta kəma Lazglafta ŋa grafta kazlay ka ksaŋ a dzva ni ta skwa tsa mndu ya wu kəʼa.

⁸ Wya skwi ŋa magay ta ghəŋa inda skwi ta zlərɗ mnduha his ta wi ta ghəŋa ni dər sla tsi, dər kəɗih tsi, dər rina fisik tsi, dər lgut tsi, dər mndəra wati ma skwi tsi ta zwaɗuta, ka mnə mnduha kazlay ŋa ɗa ya ka ya, ŋa ɗa ya kəʼa ya katsi, sliʼafta tsa mnduha ya his his ka lagha ta kəma Lazglafta. Ka wa dzaʼa mnanata Lazglafta kazlay ŋa gha dmaku kəʼa ya, his dzaʼa plata tsi ta tsa skwi ya ŋa tsa sani ya.

⁹ Kawayaka skwi, lagha mndu ka vlaŋtá sana mndu ta kəɗiha ni, dər sla ni, dər rina fisika ni a tsi, dər wati ma skwi nda səla a tsi ŋa nghay, ama ka mtutá tsa skwi nda səla ya, ka ɓlu nda ɓla a tsi, ka gənda a tsi ta klaghata, haɗ sana mndu ta nghiŋta wu katsi,

¹⁰ waɗata tsa mndu ya nda hga Yawe kazlay ksaŋ a dzva ɗa ta tsa skwa na mndu na wu kəʼa. Dzaʼa zlghaf zlgha tsa mndu nda skwa ni ya ta tsa waɗu ya. Tsaya tama, haɗ skwi dzaʼa tsa mndu ya plata wa.

¹¹ Ama, ka ga tsa mndu ya ghalaghata lu ta tsa skwi nda səla ya katsi, tsaya ná, dzaʼa plana pla taɓta skwa tsa mndu ya.

¹² Ka tsuɗay ta ksata katsi, kladaghata tsa mndu ya ta pɗakwa ni ŋa grafta. Tsaya tama, haɗ sana skwi dzaʼa plata tsa mndu ya wa.

¹³ Ka lagha mndu ka ɗawaftá mahba skwi nda səla da mndu, ka ɓlutá tsi, ka mtu nda mta a tsi, kul haɗ tsa mndani ya hada katsi, dzaʼa plam pla tsa mndu ta ɗawafta ya taɓ tida.

¹⁴ Ama ka hada tsa mndani ya ta magaku tsi katsi, haɗ tsa mndu ta ɗawafta ya dzaʼa play wu. Ala ka si ka haya klafta tsi, tsa tseda haya ya kweŋkweŋ dzaʼa plata tsi. »

Sanlaha ma zlahuha ta ghəŋa tva nzaku

¹⁵ « Ka lagha mndu ka gataftá daghala makwa kul haɗ mndu ta dzugway ka hanata nda tsi katsi, vlata ni ta skwa wuma ŋa da ni ma tsa makwa ya, ka klay ni ta tsa makwa ya ŋa markwa taŋ.

¹⁶ Ama ka vla a yu ɗekɗek ta makwa ɗa ŋa ni wu ka da ni, vlata tsa mndu ta hanata nda tsa daghali ya ta tsedi ka gragra nda skwi prək ka wuma makwa.

¹⁷ Ma zlana kuni nda hafu ta marakw ta ga ɗəgha.

¹⁸ Mndu ya ta hanata nda rini, dzaʼa dza dza lu.

¹⁹ Dər wati ma mndu ta planatá ghəŋ ta sanlaha ma lazglaftaha, ka ŋa Yawe turtukwa ni a tsi wu ná, dzaʼa zaɗana zaɗa lu.

²⁰ Yaha kuni da tsaghutá mayəm ta nzaku mataba ghuni, yaha kuni da ganap tiri ta həŋ, kabga si ta ga mayəm kaghuni guli ta haɗika Masar.

²¹ Yaha kuni da walaŋta giri ŋa wadguha nda zwana tawakriha.

²² Ka ta giri kuni ŋa taŋ, dzaʼa hgiha hga həŋ ŋa kataŋtá həŋ. Iʼi, kahwathwata dzaʼa sna sna yu ta tawa taŋ.

²³ Dzaʼa gufaf gufa ŋuɗufa ɗa, ŋa pslata ɗa ta kaghuni nda kafay. Mantsa ya, ŋa nzakwa miʼa kaghuni ka wadguha, ŋa nzakwa zwana kaghuni guli ka zwana tawakriha.

²⁴ Ka lagha ghuni ka ɓlanaftá nzawa tsedi ta mnda ɗa ka pɗu mataba ghuni katsi, yaha kuni magay manda ŋa sanlaha ma gwal ta ɓla nzawa ŋa mndu. Yaha kuni da ɗawa imi ta ghəŋa ni.

²⁵ Ka lagha ghuni ka klaghutá lgut da mndu ka muluɗay katsi, vranavawa vra ta skwa ni ma kɗaku fitik dɗata,

²⁶ kabga tsaya yeya skwi ŋa bukwa ni, nda ya ŋa katá vgha ni. Ka haɗ tsi da tsi wu, ndaw dzaʼa bukwa tsi ta bukwa ni ta hani? Ka hgiha hga tsi ŋa kataŋta, dzaʼa snaŋ sna yu ta tawa ni, kabga iʼi ná, ta taway yu ta hiɗahiɗa ta mndu.

²⁷ Ma raz kuni ta Lazglafta, ma ksiʼi kuni ta mndu ka mali ta ghəŋa mnduha ghuni.

²⁸ Ma gərɗana kuni ta klaɗiktá mayaka ɗa ma skwiha ta tska kuni ta vwah, nda ima inaba ghuni. Dzaʼa vliha vla kuni ta zumaliha mataba zwana zgwana ghuni.

²⁹ Mantsa ya guli dzaʼa maga kuni nda taŋtaŋa zwaŋa sla, nda rina fisik, dzaʼa zlana zla lu ka fitik ndəfáŋ mista ma ni, baɗ matghasa fitik ya, dzaʼa vliha vla kuni.

³⁰ Dzaʼa nzakway kuni ka gwal nda fa ka ŋa ɗa. Yaha kuni da walaŋta za sluʼa rini ksa tsuɗay, vzanawa vza ta kri. »