Sabi 15 - Hdi

Zləzləvay i Musa nda la Israʼila ta Yawe

¹ Ka fanaftá i Musa nda la Israʼila ta laha zləzləva Yawe, ka həŋ mantsa: « Dzaʼa zləzləvay yu ta Yawe nda laha, kabga za za ta ghwa katakata. Ka pghaghatá tsi ta plisha nda gwal tida tani ma drəf.

² Yawe mbrakwa ɗa, zalama ɗa ya. Tsatsi ta mbiɗifta, Lazglafta ɗa ya. Dzaʼa zləzləvay yu, Lazglafta da ɗa ya, dzaʼa ghubay yu.

³ Yawe ná, mnda vulu ya, Yawe hga ni.

⁴ Pghagha pgha da drəf, ta mwataha plisha Firʼawna, nda mnduha ta vulanatá vulu tani. Bikwira vula ni ɗagap tsi ná, sususʼufu susuʼufa həŋ ma drəfa Zaŋwafi.

⁵ Ka ndutá lata drəf ta həŋ. Ka rkaghata həŋ manda palaha da lata ni.

⁶ Ari Yawe! Zeghwa gha ná, maraŋ mara ta glakwa mbrakwa gha. Ari Yawe! Zeghwa gha ta huʼanaptá ghuma.

⁷ Nda glakwa mbrakwa gha, ta ŋara ka ta ghumaha gha. Ka sliʼaf sliʼa ɓasata ŋuɗufa gha ná, ta zuza ta həŋ manda ya ta vu nda kuzuŋ!

⁸ Nda hafa htsiŋa gha tsakavata imi, ka sladatá zala manda matsak, ka sgwaraftá imi ma huɗa drəf.

⁹ Ka ghumaha ŋni si mnata na: “Dzaʼa hwayiŋ hwaya ŋni həŋ, dzaʼa ksak ksa ŋni, ŋa dguv ta ŋni ta skwa zləɗa ŋni, ka malaghutá skwi ya zbaŋ ŋni da həŋ. Dzaʼa tsahagap tsaha ŋni ta kafayha ŋni ŋa zaɗanata ŋni ta həŋ nda dzva ŋni!” ka həŋ sizlay.

¹⁰ Ama kagha Yawe, ka vusladaptá ka ta hafa gha, ka ndutá drəf ta həŋ, ka rkaghatá həŋ tɗem manda kfur da mghama drəf.

¹¹ Ari Yawe, wa ya manda kagha mataba lazglaftaha na? Wa ya ta gara vgha nda kagha na? Ta ndərmima mndu na ghuɓatá kagha! Nda sgit ta kagha ma inda slnaha gha, nda ra ka ka vlaŋtá glaku, mamu ka nda mbrakwa maga inda skwiha!

¹² Ma tɗapta gha ta dzva zeghwa gha ná, ka ndutá haɗik ta ghumaha ŋni.

¹³ Ma zɗakwa gha, ka klə ka ta mnduha gha vara ka. Ka pghafta ka ta həŋ nda mbrakwa gha da vla nzakwa gha nda ghuɓa.

¹⁴ Ka snaŋtá sanlaha ma mndəra mnduha, ka ghudzaku həŋ ta ghudzaku, ka ksutá zləŋ ta la Filisti.

¹⁵ Ka ksutá zləŋ ta mghamha la Idum, ka ghudzaku maliha ta mbruta ma Muwav, ka tsutá ŋuɗufa inda gwal ta nzaku ma Kanʼana!

¹⁶ Ka slanaghatá mghama zləŋ nda ghudzaku ta həŋ. Ta kəma mbrakwa dzva gha, ka tsutá həŋ ka rgha manda pala, ha ka tsughwaɗadapta mnduha gha. Ari Yawe, ha ka tsughwaɗadapta mnduha klu ka ŋa gha.

¹⁷ Dzaʼa hlay ka ta həŋ ŋa ŋəɓatá həŋ ta ŋa gha ma ghwá, ma vli ya fa ka ŋa nzakwa gha a Yawe. Tsaya vli nda ghuɓa payana ka nda dzva gha a mghama ɗa.

¹⁸ Ari Yawe, dzaʼa gay ka ta mghama gha ŋa ɗekɗek ha ŋa kɗekedzeŋ! » ka həŋ.

¹⁹ Manda sliʼadamta plisha Firʼawna, nda mwata plisha ni, nda sludziha ni ta plis tani da drəf, ka mbəɗanaghatá Yawe ta ima tsa drəf ya ta ghəŋa taŋ, ama ta labi la Israʼila ma takataka ta drəf ta ghwalata vli.

²⁰ Miryam makuma ni ma Haruna ná, anabi ya. Ka klaftá tsi ta zwaŋa tim ma dzva ni ka dzay. Ka sliʼaftá inda miʼaha mista ni, nda zwana tim ka dzaʼa nda skalu.

²¹ Ka tsanatá Miryam ta laha ta həŋ: « Zləzləvawa Yawe nda laha, kabga zaza ta ghwa! Pghagha pgha ta plisha nda gwal tida tani da drəf! » kaʼa.

Imi ɗahɗaha ma Mara

²² Ka hlaftá Musa ta la Israʼila ma drəfa Zaŋwafi, ka laghu həŋ ta mtaka Sur. Hkən fitika taŋ ta mbaɗa ma tsa mtak ya, slaf a həŋ ta imi wa.

²³ Ɓhadaghata taŋ da Mara, laviŋ a həŋ ta sa imi ma hada wu, kabga ɗahɗaha. Tsaya ta kəl lu ka hga tsa vli ya ka Mara, manda mnay kazlay ɗah.

²⁴ Ka zlraftá mnduha ta ruruŋwaku ta ghəŋa Musa, ka həŋ mantsa: « Nahgani dzaʼa ŋni da say na? » ka həŋ.

²⁵ Ka wahu Musa ta wahu da Yawe, ka maranatá Yawe ta sana fu. Ka klaftá tsi ka vzamta da tsa imi ya, ka navaftá tsa imi ya zɗa. Ma tsa vli ya vlaŋta Yawe ta zlahuha ta həŋ, nda skwiha ya nda ra ŋa magay taŋ. Hada dzəghaŋta tsi ta həŋ guli.

²⁶ Kaʼa mantsa: « Ka fa fa kuni ta sləməŋ ɗina ka snatá gwaɗa Yawe, Lazglafta ghuni, ka ta magiha maga kuni ta skwi ta tɗukwa ta wa ira ɗa, ka ta fiha fa kuni ta sləməŋ ɗina ka sna skwiha ta mnaghunata yu, ka ta ŋana ŋa kuni ta zlahuha ɗa demdem katsi, haɗ yu dzaʼa vlaghunata ya dər turtuk ma tsa ɗaŋwaha ya vlaŋ yu ta la Masar ya wu, kabga iʼi Yawe ta mba kaghuni, » kaʼa.

²⁷ Ka ɓhadaghatá həŋ da Ilim. Hada, ka slanaghatá həŋ ta dzuɓayha ghwaŋpəɗ his, nda fwa dibinaʼuha ndəfáŋ mbsak. Ka fata həŋ ghuɓa taŋ hada ndusa nda imi.