Rut 4 - Hdi

Klafta Bughaz ta Rut ka marakw

¹ Ka laf Bughaz da nzata ta wa tgha lami da luwa. Ka lab tsa mndu má raŋ varay manda mnə Bughaz ya. Ka Bughaz nda tsi mantsa: « Gavagagha gava, ka nzata ka hadya ɓa! » kaʼa. Ka gavadaghatá tsa mndu ya, ka nzata tsi.

² Ka hagaftá Bughaz ta mnduha ghwaŋ mataba la galata mndu ma luwa, kaʼa mantsa: « Nzawa nza hadna, » kaʼa. Ka nzatá həŋ.

³ Kaʼa nda tsa mndu má raŋ varay ya mantsa: « Tsa Naghumi ta vragaghata si ta haɗika Muwav ya, ta fatá vwaha zwaŋama u Ilimelek ŋa skwapta.

⁴ Tsa kəl yu ka mnay kazlay ka snagham sna yu kəʼa: “Skwa skwa ta wa ira na mnduha na, nda ya ta wa ira la galata mnduha kəʼa.” Ka dzaʼa varay ka, vara vara. Ka vara a ka wu, mniha mna ka snaŋta yu, kabga haɗ sana mndu dzaʼa varay ka kagha a tsi wu. Tahula kagha dzaʼa lagha iʼi, » kaʼa. Ka tsa mndu ya mantsa: « Dzaʼa varay yu, » kaʼa.

⁵ Ka Bughaz mantsa: « Baɗ mutsafta gha ta tsa vwah ya ma dzva Naghumi, mutsafta gha nda Rut makwa la Muwav tani, markwa sləmtaghu, ŋa ŋanatá hga tsa sləmtaghu ya ta haɗika za həga ni, » kaʼa.

⁶ Ka tsa mndu raŋ varay ya mantsa: « Ka mantsa tsi, laviŋ a yu ta varata wu, kabga yaha yu da badziŋtá ŋa ɗa ma haɗika za həga. Vara vara kagha ŋa gha, ta skwi má riha varay, ya laviŋ a iʼi ta varata ya wu, » kaʼa.

⁷ Tsaw si ghalya da la Israʼila ná, ta ghəŋa inda skwi ŋa varay nda vara, ka ŋa mbəɗapta nda mbəɗa a tsi ná, ɓaɓah ta klapta lu ma səla ka vlaŋtá sani. Tsaya ta maray kazlay nda dzra tsa skwi ya kəʼa da la Israʼila.

⁸ Ka tsa mndu má raŋ varay ya nda Bughaz mantsa: « Skwa kagha ta tsa vwah ya, » kaʼa. Ka klaptá tsi ta ɓaɓaha ni.

⁹ Mantsa tama, ka Bughaz nda la galata mndu, nda ya nda inda mnduha mantsa: « Kaghuni masləmtsək gita kazlay na ta skwa skwa yu ma dzva Naghumi ta inda skwi si ka ŋa Ilimelek, nda inda skwi si ta nzakway ka ŋa i Kilyuŋ, nda Mahluŋ kəʼa.

¹⁰ Ta wunanagha wuna yu guli ka markwa ini ta Rut makwa la Muwav, si markwa Mahluŋ ya, kada gɗanata lu ta hga sləmtaghu ta haɗika za həga ni, kada kwala hga sləmtaghu ta zwaɗuta mataba zwana ma ni. Kaghuni masləmtsək gita ta wa tgha lami da na luwa na, » kaʼa.

¹¹ Ka inda tsa mnduha ta wa tgha luwa nda tsa la galata mndu ya mantsa: « Nda nza aŋni ka masləmtsək! Ka vlaŋ vla Yawe ta tsa marakw ta dzaʼa da ghuni ya, ta tva nzakw manda i Rasel nda Leʼa ta baftá Israʼila hahəŋ his his ya. Kagha guli, mutsaf mutsa ta mbraku ma Ifrata, ka snavata hga gha ma Betʼlehem!

¹² Mantsa ya guli, nda ma zivir ya dzaʼa vlaghata Yawe nda ma na daghala marakw na, ka nzata həga gha manda həga Perets yana Tamar ta Yahuda ya, » ka həŋ.

¹³ Mantsa tama, ka klaftá Bughaz ta Rut ka markwa taŋ. Ka lam tsi da tsi, ka zɗanaŋtá Yawe ta huɗi, ka zlghaftá tsi ta huɗi, ka yatá tsi ta zwaŋa zgun.

¹⁴ Ka miʼaha nda Naghumi mantsa: « Rfu ŋa Yawe ta zlaghaŋtá mndu raŋ varay, zlagha a ŋa pɗata gha ta mndu raŋ varata dzaʼa nghapta ka kagha wa. Dzaʼa snava sna hga zigha gha ma Israʼila!

¹⁵ Dzaʼa lɓa gha lɓa ta ŋuɗuf, dzaʼa nghap ngha ka kagha ma halata kagha, kabga ghwaʼala gha ta ɗvutá kagha ta yata, malap mala tsa marakw ya ma kagha ka zwana zgwana ndəfáŋ, » ka həŋ.

¹⁶ Ka tskwaftá Naghumi ta tsa zwaŋ ya ka famta ma ghuva ni, ka glanafta.

¹⁷ Ka mnə miʼa sləvdaha kazlay na: « Yana ya lu ta zwaŋ ta Naghumi! » kəʼa. Ka tsanaftá həŋ ta hga ni ka: « Ghuvet. » Tsatsi da ni ma Yisay, da ni ma Dawuda.

Dzidzíha Dawuda

¹⁸ Wya mndəra la Perets: Perets ta yatá Hetsruŋ,

¹⁹ Hetsruŋ ta yatá Ram, Ram ta yatá Ghaminadav,

²⁰ Ghaminadav ta yatá Nahsuŋ, Nahsuŋ ta yatá Salmuŋ,

²¹ Salmuŋ ta yatá Bughaz, Bughaz ta yatá Ghuvet,

²² Ghuvet ta yatá Yisay, Yisay ta yatá Dawuda.