Rut 1 - Hdi

Laghwa Ilimelek nda həga da Muwav

¹ Ghalya, ta fitika gay gwal ta tsa guma ta mgham ta ghəŋa la Israʼila, ka slatá maya ta haɗik. Ka laghu sana mnda la Betʼlehem ta haɗika Yahuda, nda markwa taŋ nda zwana zgwana ni his, da nzata ta haɗika la Muwav.

² Ilimelek hga tsa mndu ya, Naghumi hga markwa taŋ. Hga tsa zwana ni his ya guli, i Mahluŋ nda Kilyuŋ. Mnda la Ifrata si ma Betʼlehem ta haɗika Yahuda həŋ. Ka ɓhadaghatá həŋ ta haɗika Muwav, ka nzatá hada.

³ Tahula tsa, ka mtuta Ilimelek zəʼala Naghumi, ka nzatá tsi turtukwa ni nda tsa zwana ni his ya.

⁴ Ka hlaftá tsa zwani ya ta kwagha la Muwav. Ghurpa hga sani, Rut hga sani. Ka nzatá həŋ hada wər ta kla vaku ghwaŋ.

⁵ Ka rwuta i Mahluŋ nda Kilyuŋ his his guli, ka nzatá tsa marakw ya, haɗ zwana ni his wu, haɗ zəʼala taŋ wa.

Vraghata i Naghumi nda Rut da Betʼlehem

⁶ Mantsa tama, ka sliʼaftá Naghumi ŋa zlanatá haɗika Muwav kawadaga nda ghwaʼaliha ni, kabga sniŋta ni ta mnay ta haɗika Muwav kazlay zɗanaŋ zɗa Yawe ta huɗi ta mnduha ni ka vlaŋtá skwa zay ta həŋ kəʼa.

⁷ Ka sliʼaftá tsi kawadaga nda tsa ghwaʼaliha ni his ya, ma tsa vli si nza tsi ya. Ka ksaftá həŋ ta tvi ŋa vru ta haɗika la Yahuda.

⁸ Ama ka Naghumi nda tsa ghwaʼaliha ni his ya mantsa: « Lawa la, ka vra dər wati ma kaghuni da ma ni. Ka nza zɗakwa Yawe kawadaga nda kaghuni, manda ya nza kaghuni nda zɗaku kawadaga nda tsa gwal ta rwuta, nda ya nda iʼi ya.

⁹ Ka vlaŋ vla Yawe ta dər wati ma kaghuni ta vli ŋa mutsafta mbiʼaptá vgha ma həga ga zəʼal, » kaʼa. Tahula tsa, ka brusatá tsi ta həŋ. Ka hərɓ həŋ ta taw.

¹⁰ Ka tsa ghwaʼaliha ya nda tsi mantsa: « Mantsa a wu, ta dzaʼa mista gha ŋni da mnduha gha! » ka həŋ.

¹¹ Ama ka Naghumi mantsa: « Vrawa vra kwagha ɗa. Kabgawu dzaʼa kəl kuni ka dzaʼa mista ɗa na? Ta mamu zwani ma huɗa ɗa ŋa nugəlta ŋa zəʼala ghuni ra?

¹² Vrawa vra kwagha ɗa. Lawa! Nda hala yu ka kləglaftá zəʼal, dər má ka yu mantsa: “Ta nda fa ghəŋa ɗa, dər má ta na hawu gita na lagha yu da mndu ka yayglata yu ta zwani,”

¹³ dzaʼa kəzləglaf kəzla kuni ta galafta taŋ ra? Dzaʼa kwalaghu kwala kuni dabga tsaya ta kləgəltá zəʼal ra? Kwalaghu a kuni kwagha ɗa wa. Mal ghuya ɗaŋwa iʼi ŋwilahata ni ka ŋa ghuni, Slaf sla dzva Yawe ta iʼi, » kaʼa.

¹⁴ Ka hərɓgəltá həŋ ta taw kay guli. Tahula tsa, ka brusata Ghurpa ta midza ni ŋa dga vgha, ama ka ndiʼaftá Rut ta vgha tida.

¹⁵ Ka Naghumi mantsa: « Nda ngha ka re, waʼa vraghu vra waɗa gha da la taŋ, nda ya da lazglaftaha ni, vra kagha guli manda waɗa gha, » kaʼa.

¹⁶ Ama ka Rut mantsa: « Ma sliŋwu ka ta iʼi ŋa zlavaghata, ŋa mbəɗaghata ɗa ta hul. Da vli ta dzaʼa ka, ta dzaʼa iʼi, ma vli dzaʼa hanata ka, hada dzaʼa hanata yu, la ghuni dzaʼa nzakway ka la ini, Lazglafta gha, Lazglafta ɗa.

¹⁷ Ma vli dzaʼa mtuta ka, hada dzaʼa mtuta yu, hada dzaʼa lamta lu ta iʼi. Nahgani dzaʼa dgihata nda kagha, ka mtaku a tsi wu na! Ka mantsa a tsi wu, ka sgiɗigha sga Yawe ta ghuya ɗaŋwa katakata ya ta malaghuta, » kaʼa.

¹⁸ Nghanata Naghumi kazlay va kura kura ta dzaʼa mista ni kəʼa, gwaɗglanaf a wa.

¹⁹ Ka mbaɗ həŋ tama kawadaga ha ka ɓhadaghata taŋ da Betʼlehem. Manda ɓhadaghata taŋ da Betʼlehem, ka ndərakaʼu inda gwal ma luwa ta həŋ. Ka miʼaha mantsa: « Tsa Naghumi ya na ra? » ka həŋ.

²⁰ Ama kaʼa nda həŋ mantsa: « Ma hgəgəl kuni ta iʼi ka Naghumi, hgawa ta iʼi ka Mara, tsaya “kurak” kabga niɗis na Lazglafta ta Mbruta manda kurak katakata.

²¹ Nda ndəgha yu ta laghu yu, ka vragiɗighata Yawe ka kəfandaŋ. Kabgawu ta hgəgəlta kuni ta iʼi ka Naghumi na? Nda iʼi gwaɗa Yawe, ka tulekiɗtá Lazglafta ta Mbruta! » kaʼa.

²² Mantsa ya vragaghuta Naghumi ta haɗika Muwav kawadaga nda ghwaʼala ni Rut makwa la Muwav. Ta vradaghatá həŋ da Betʼlehem, zlrafta lu yeya ta tska urz ta vwah.