Mbsak 23 - Hdi

Tfa wa Bilgham ŋa la Israʼila

¹ Ka Bilgham nda Balak mantsa: « Dzihwaɗif dzihwa ta gwirha ndəfáŋ hadna, ka payifta ka hadna ta lghəŋha ndəfáŋ, nda maŋazakha ndəfáŋ, » kaʼa.

² Ka magatá Balak manda tsa mnana Bilgham ya. Hahəŋ his his, ka vlata həŋ ta lghəŋ turtuk nda maŋazak turtuk ta inda gwir.

³ Ka Bilgham nda Balak mantsa: « Slada slada ta vata na pla ghəŋa gha ŋa dray tsuh tsuh na, ta diʼiŋaghutá iʼi, kawayaka skwi dzaʼa sagha sa Yawe da guyaku nda iʼi. Gwaɗa ya dzaʼa sniɗimta tsi dər kinawu nzakwa ni, dzaʼa mna gha mna yu, » kaʼa. Ka laghu tsi ta sana kuɗuŋur dɗay.

⁴ Ka maravatá Lazglafta ta vata Bilgham, ka Bilgham nda tsi mantsa: « Dzagwa dzagwa yu ta na gwirha ndəfáŋ na, ka vlatá yu ta lghəŋ turtuk nda maŋazak turtuk ta inda gwir, » kaʼa.

⁵ Mantsa tama, ka fanamtá Yawe ta gwaɗa ma wi ta Bilgham. Kaʼa nda tsi mantsa: « Vra da Balak, ka mnanata ka ta gwaɗa mna gha yu, » kaʼa.

⁶ Ka vradaghatá tsi da tsi, ka slanaghatá tsi ta sladu ta vata skwa pla ghəŋa ni ŋa dray tsuh tsuh, nda inda maliha la Muwav.

⁷ Ka tsaftá tsi ta laha ni, kaʼa mantsa: « Ma Aram klakta Balak ta iʼi, ta ghwá nda təv safa fitik hgafta mghama Muwav ta iʼi: “Sawi! Ka ksiʼiɗifta ka ta la Yakubu! Sawi! Ka ɓadziŋta ka ta tsa la Israʼila ya.”

⁸ Waká yu dzaʼa ksiʼa mndu kul ksiʼaftá Lazglafta na? Waká yu dzaʼa ɓadziŋtá mndu kul ɓadziŋtá Yawe na?

⁹ Daga ta bɗəma ghwá ka nghə yu ta həŋ, daga ta kuɗuŋur ka vits yu. Mamu mnduha ya ta nzaghuta ndaghŋa taŋ, Tskəm klafta həŋ ta ghəŋa taŋ mataba mndəra sanlaha ma mnduha.

¹⁰ Wa dzaʼa mbəɗaftá rgitika Yakubu na? Dər turtuk ma dgatá la Israʼila fwaɗ, wa dzaʼa mbəɗafta na? Ka mta vərɗa iʼi ta mtakwa gwal tɗukwa, ka nzakwa kɗavakta ɗa manda ŋa taŋ! » kaʼa.

¹¹ Ka Balak nda Bilgham mantsa: « Nu na magiha ka na? Hgagaghaghaha yu ŋa ksiʼaftá ghuma ɗa ná, wana kagha ta bukwa həŋ nda tfa wi! » kaʼa.

¹² Ka Bilgham mantsa: « Nza a tkweʼ ka mnigiŋta ɗa ta skwi manda va ya fiɗim Yawe ma wa ɗa wu ra? » kaʼa.

Mahisa tfay Bilgham ta wi ŋa la Israʼila

¹³ Ka Balak nda Bilgham mantsa: « Kdəkkdək, sawi kawadaga nda iʼi da sana vli dzaʼa kəl ka ka nghaŋtá tsa mnduha ya, sana zlərma dzaʼa ka da nghaŋta, nghaŋta a ka həŋ demdem wa. Ma tsa vli ya dzaʼa ksiʼiɗifta ka ta həŋ! » kaʼa.

¹⁴ Ka kladaftá tsi da vwah ta wa lilwa ta bɗəma ghwá Pisga. Ka dzihwaftá tsi ta gwirha ndəfáŋ, ka vlatá tsi ta lghəŋ turtuk nda maŋazak turtuk ta inda gwir.

¹⁵ Ka Bilgham nda Balak mantsa: « Slada slada ta vata pla ghəŋa gha ŋa dray tsuh tsuh, ta dzaʼa iʼi da kəzla Yawe hada a, » kaʼa.

¹⁶ Ka maravatá Yawe ta vata Bilgham, ka fanamtá tsi ta gwaɗa ma wi. Kaʼa mantsa: « Vra slanaghatá Balak, ka mnanata ka ta gwaɗa mna gha yu, » kaʼa.

¹⁷ Ka vradaghatá tsi ta vata ni, ka slanaghatá tsi ta sladu ta vata pla ghəŋa ni ŋa dray tsuh tsuh, kawadaga nda maliha la Muwav. Ka ɗawaŋtá Balak: « Wa ka Yawe kay na? » kaʼa.

¹⁸ Ka tsaftá Bilgham ta laha, kaʼa mantsa: « Sliʼaf sliʼa gha Balak, sna! Fiha fa ta sləməŋ, zwaŋa Tsipur!

¹⁹ Mnda səla a Lazglafta ŋa tsakalay ni ta wi wa. Zwaŋa mnda səla a ŋa mbəɗanaftá skwi kura tsi wa. Ta gwaɗay ta gwaɗa ŋa kwal kul magata ra? Ta gwaɗay ta gwaɗa ŋa kwal kul ksa slna nda tsi ra?

²⁰ Tfanagha tfa ta wi ka lu nda iʼi. Tfanagha tfa ta wi, vrəglanakta a iʼi wa.

²¹ Nghaŋta a lu ta zləmnda da la Yakubu wu, nghaŋta a lu ta ghuya ɗaŋwa da la Israʼila wa. Kawadaga Yawe, Lazglafta taŋ nda həŋ. Ga taŋ ta ghudzaga ndəɓa dzva ga mgham.

²² Klagap kla Lazglafta ta həŋ ma Masar, manda duliha sladra nzakwa ni ŋa taŋ.

²³ Laviŋ a lu ta magatá la Yakubu wu, dər vzafta mandaŋ ta la Israʼila wa. Ta ghəŋa la Yakubu, la Israʼila ya, ngha ta ŋərma skwi ta maga Lazglafta!

²⁴ Wana mnduha ta sliʼavata manda markwa rveri, ka sladata manda rveri. Haɗ ta hanata nda hana kada dəghaɗa skwi ksa tsi, ka sa usa skwi dza tsi wu, » kaʼa.

²⁵ Ka Balak nda Bilgham mantsa: « Ka ksiʼa ka ta həŋ ya wu, mantsa tama, ma tfanagha ka ta wi ta həŋ, » kaʼa.

²⁶ Ama ka Bilgham nda tsi mantsa: « Si mna gha a yu wu ra: “Dzaʼa magay yu ta inda skwi dzaʼa mnihata Yawe” kəʼa kay ra? » kaʼa.

Mahkəna tfay Bilgham ta wi ŋa la Israʼila

²⁷ Ka Balak nda Bilgham mantsa: « Kdəkkdək sagha sa! Ka klaghata yu da sana vli, kawayaka skwi dzaʼa zɗəgana zɗa tsa vli ya ta Lazglafta, ŋa ksiʼiɗifta gha ta tsa mnduha ya, » kaʼa.

²⁸ Ka kladaftá Balak tama ta Bilgham ta bɗəma ghwá Pəghur ta nzəganaghatá mtak.

²⁹ Ka Bilgham nda Balak mantsa: « Dzihwaɗif dzihwa ta gwirha ndəfáŋ hadna, ka payiɗifta ka ta lghəŋha ndəfáŋ, nda maŋazakha ndəfáŋ, » kaʼa.

³⁰ Ka magatá Balak manda ya mnana Bilgham, ka vlatá tsi ta lghəŋ turtuk nda maŋazak turtuk ta inda gwir.