Gwal tsa guma 9 - Hdi

Pslata Avimelek ta zwana da ni ŋa zba ga mgham ma Səkem

¹ Ka laghu Avimelek, zwaŋa Yərubaghal da Səkem slanaghatá zwana ma ni ma ma ni, nda inda la ma ni ta uʼa taŋ, kaʼa nda həŋ mantsa:

² « Kdəkwakdək, mnanawa mna ta inda maliha la Səkem, ka kuni nda həŋ na: “Mal gay zwana Yərubaghal ndəfáŋ mbsak ta mgham ta ghəŋa kaghuni re, ari mal gay mndu turtuk a na?” ka kuni. Havakwa hava, iʼi ná, sluʼuvgha ghuni yu, usa ghuni yu, » kaʼa.

³ Ka mnanatá zwana ma ni ma ma ni ta inda tsa gwaɗaha ya ta inda maliha ma Səkem. Ka ɗvutá ŋuɗufa taŋ ta dzaʼa mista Avimelek. « Zwaŋama mu a tsawa! » ka həŋ.

⁴ Ka klaʼatá həŋ mataba tsedi ma həga Baghalʼbərit ta sulay ndəfáŋ mbsak ka vlaŋta. Ka klaftá Avimelek ta tsa tsedi ya ka dzawatá la falay nda gwal kul haɗ rga taŋ ŋa dzaʼa mista ni.

⁵ Ka lagha tsi da həga ga da ni ma Ghufra, ka pslatá tsi ta zwana da ni, zwana Yərubaghal ndəfáŋ mbsak ta kutumba turtuk. Ka pɗatá Yutam kweŋkweŋ, zughuva ma zwana Yərubaghal, kabga ɗifaghu ɗifa.

⁶ Ka tskavatá inda maliha la Səkem, nda inda maliha la Betʼmilu, mista halalaya fu ta vata pala dzugwa lu ma Səkem. Ka famtá həŋ ta Avimelek ka mgham.

Rusay Yutam ta mahdihdi

⁷ Ka snanaghatá tsi ta Yutam. Ka laghu tsi da nzagata ta bɗəma ghwá Gərizim. Ka gugɗatá tsi nda lwi dagala dagala, kaʼa mantsa: « Ariwa maliha ma Səkem, fihawa fa ta sləməŋ, dzaʼa faghuna fa Lazglafta guli ta sləməŋ!

⁸ Ma sana fitik, ka tskavatá fuha ŋa famtá mghama taŋ nda ma pghanaghatá rɗi, ka həŋ nda zaytuŋ mantsa: “Kagha dzaʼa ga mgham ta ghəŋa aŋni,” ka həŋ.

⁹ Ama ka zaytuŋ nda həŋ mantsa: “Waká yu dzaʼa zlanavatá rɗa ɗa ya ta vlə lu ta sgit nda tsi ŋa Lazglafta nda mnduha tani, ka laghwa ɗa da ghamanaku nda ga mgham ta ghəŋa fuha na?” kaʼa.

¹⁰ Ka fuha nda ghuraf mantsa: “Sawi, kagha dzaʼa ga mgham ta ghəŋa aŋni,” ka həŋ.

¹¹ Ama ka ghuraf nda həŋ mantsa: “Waká yu dzaʼa zlanavatá klufuɗata iʼi, nda zɗakwa yakwa ɗa, ka laghwa ɗa da ghamanaku nda ga mgham ta ghəŋa fuha na?” kaʼa.

¹² Ka fuha nda inabi mantsa: “Sawi, kagha dzaʼa ga mgham ta ghəŋa aŋni,” ka həŋ.

¹³ Ama ka inabi nda həŋ mantsa: “Waká yu dzaʼa zlanavatá ima ɗa ta vla rfu ŋa Lazglafta, nda mnduha, ka laghwa ɗa da ghamanaku nda ga mgham ta ghəŋa fuha na?” kaʼa.

¹⁴ Mantsa tama, ka inda fuha nda mubukwa teki mantsa: “Sawi, kagha dzaʼa ga mgham ta ghəŋa aŋni,” ka həŋ.

¹⁵ Ka mubukwa teki nda fuha tama mantsa: “Ka kahwathwata ta kumay kuni ta pghaɗighatá rɗi ŋa nzakwa ɗa ka mghama ghuni katsi, sawa da nzamta ma sulkuma ɗa. Ka haɗ tsi mantsa wu, dzaʼa sab sa vu ma mubukwa teki, ŋa driŋtá fuha sedra la Ləvanuŋ,” kaʼa.

¹⁶ Ndanana tama, graf gra kuni, maga maga kuni ta kahwathwata, maga maga kuni ta skwi ta raku ma famta ghuni ta Avimelek ka mgham rki na? Magana maga kuni ta skwi tɗukwa ta Yərubaghal nda gwal ga taŋ tani nda tsa rki? Magana maga kuni ta skwi ta raŋta nda tsa rki na?

¹⁷ Ndanapwa ndana ɗina, vulaghuna vula da ɗa ta vulu, ka fuŋtá tsi ta hafa ni ta wa hɗak, ka katagaghunapta ma dzva la Midyaŋ.

¹⁸ Ama gita, kaghuni ta mbəɗavata mistik mista gwal ma həga ga da ɗa. Ka pslatá kuni ta zwana ni ndəfáŋ mbsak ta kutumba turtuk. Ka famtá kuni ta Avimelek, zwaŋa kurɗa ni ka mgham ta ghəŋa maliha la Səkem, kabga nzakwa ni ka zwaŋama ghuni.

¹⁹ Ka graf gra kuni, magana maga kuni ta kahwathwata nda skwi ta raku ta Yərubaghal nda gwal ga taŋ tani katsi, rfawa ta rfa ghuni kawadaga nda Avimelek, ka rfa tsatsi guli ta rfu kawadaga nda kaghuni!

²⁰ Ka haɗ tsi mantsa wu, ka sab sa vu ma Avimelek ŋa dəghaɗutá maliha la Səkem nda maliha la Betʼmilu! Ka sab sa vu ma maliha la Səkem nda maliha la Betʼmilu, ŋa dəghaɗutá Avimelek guli! » kaʼa.

²¹ Tahula tsa, ka hwayaghutá Yutam, ka laghwi da ɗifaghuta ma Bəʼer. Ka laghwi nzata hada diʼiŋ nda zwaŋa da ni Avimelek.

Ganavata la Səkem ta sidi ta Avimelek

²² Hkən vakwa Avimelek ta ga mgham ta ghəŋa la Israʼila.

²³ Ka ghunagatá Lazglafta ta ghwaɗaka sulkum da taba i Avimelek nda maliha la Səkem. Ka ganavatá maliha la Səkem ta sidi ta Avimelek.

²⁴ Magu maga manda tsaya ŋa plamtá tsa mataray maga tsi nda zwana Yərubaghal ndəfáŋ mbsak psla lu ya. Ta ghəŋa Avimelek usa taŋ nda ya ta ghəŋa maliha ma Səkem ta kataŋta ŋa pslatá tsa zwana da ni ya.

²⁵ Ka gaftá maliha la Səkem ta sidi, ka ghunaftá həŋ ta mnduha pghatá buɗukwa ta bɗəma ghwáha, ka zlaʼuwa inda mnduha ta labi ta tvi. Ka mnanaŋtá lu ta Avimelek.

²⁶ Ma sana fitik, ka lab Gaghal zwaŋa Ghevet nda ma Səkem kawadaga nda zwana ma ni, ka faftá maliha la Səkem ta ghəŋ tida.

²⁷ Ka sliʼaghatá həŋ demdem da vwaha taŋ da ɗaga yakwa inabi, ka hlaktá həŋ ta yakwa ni, ka ɗitsatá həŋ, ka skalu həŋ ta skalu. Ka lam həŋ da həga lazglafta taŋ, ka za skwi, ka sa skwa say, ka razu həŋ ta Avimelek.

²⁸ Ka Gaghal zwaŋa Ghevet mantsa: « Wa Avimelek ma Səkem ŋa gay ni ta mgham ta ghəŋa amu na? Zwaŋa Yərubaghal a tsatsi kay wu ra? Zəvul a mnda maganatá slna wu ra? Maganawa maga ta slna ta la Hamur, da ni ma Səkem! Kabgawu dzaʼa kəl mu ka maganatá slna ta Avimelek na?

²⁹ Kay! Ka má iʼi ta ga mgham ta ghəŋa na mnduha na katsi ná, má dzaʼa sliŋwiŋ sliŋwa yu ta Avimelek. Ka yu má dzaʼazlay nda Avimelek na: “Sganagha sga ta gwal vula gha, ka saba ka da guyata nda iʼi,” ka yu ma dzaʼazlay, » kaʼa.

³⁰ Zəvul ná, mali ta ghəŋa tsa luwa ya ya, ka snaŋtá tsi ta tsa gwaɗaha Gaghal zwaŋa Ghevet ya, ka gufaftá ŋuɗufa ni.

³¹ Ka ghunaftá tsi ma ɗifa ta gwal ghunay da Avimelek ma Aruma ŋa mnanaŋta: « Wana Gaghal zwaŋa Ghevet ta sagha nda zwana ma ni da luwa Səkem, waʼa ta kətsiɗa ghəŋa mnduha ŋa gavaghatá sidi.

³² Ndanana, sliʼaf sliʼa girviɗik, kagha kawadaga nda bakwa mnduha gha, ka pghata ka ta buɗukwa ta hula luwa.

³³ Ga sərɗək, na safa fitik ya, ka dɗanaghata ka ta gwal ma luwa nda vulu. Saba i Gaghal nda mnduha ni da guyata nda kagha ya, ka maganata ka ta skwi ya kumaŋ ka, » kaʼa.

³⁴ Ka sliʼaftá Avimelek nda bakwa mnduha ya kawadaga nda tsi ga rviɗik, ka laghwi da pghatá buɗukwa ndusa nda Səkem. Ka dgavaptá həŋ ka zlərma fwaɗ,

³⁵ Ka sab Gaghal zwaŋa Ghevet, ka sladata ta tva lami ta wa tgha luwa. Mantsa tama, ka sab Avimelek ma buɗukwa nda inda bakwa mnduha ni.

³⁶ Nghaŋta Gaghal ta həŋ, kaʼa nda Zəvul mantsa: « Wana bakwa mnduha ta saha ta bɗəma ghwá, » kaʼa. Ama ka Zəvul nda tsi mantsa: « Sulkuma ghwáha ya klaf kagha ka mnduha, » kaʼa.

³⁷ Ka vrəglanaftá Gaghal ta tsa gwaɗa ya, kaʼa mantsa: « Wana mnduha ta saha ta bɗəma ghwá ma takataka, nda sana bakwa mnduha ta sagha nda ta tvi ma halalaya fwa gwal vza mandaŋ, » kaʼa.

³⁸ Ka Zəvul nda tsi mantsa: « Ga tsa ghanika kagha ta mnay kazlay na: “Sana wu Avimelek ŋa maganata mu ta slna na?” kəʼa ya kay na? Tsaya a tsa bakwa mnduha ta hərtət kagha ya kay ra? Sab sa tama, ka vula ka ta vulu nda həŋ, » kaʼa.

³⁹ Ka klagaptá Gaghal ta kəma ŋa maliha la Səkem da vulu nda Avimelek.

⁴⁰ Ama ka mbəɗanatá Avimelek, ka hwayaftá Gaghal ta kəma ni, ka hwayiŋtá Avimelek. Nda ndəgha mnduha ta rwuta ha ta wa tgha lami da luwa.

⁴¹ Ka nzata Avimelek ma Aruma. Ka ghəzlaftá Zəvul ta Gaghal nda zwana ma ni ŋa kwala taŋ nzəglata ma Səkem.

⁴² Ga mahtsima ni, ka sliʼagaptá mnduha ma Səkem ka laghu da vwah. Ka snanamtá lu ta Avimelek.

⁴³ Ka hlaftá tsaya ta bakwa mnduha ni, ka dganapta ka zlərma hkən, ka laghu həŋ da paghatá buɗukwa ma vwah. Nghay ni ta mnduha la Səkem ta sliʼagapta ma luwa, ka valaftá Avimelek ta həŋ ka pslatá həŋ.

⁴⁴ Ka hwayaftá Avimelek misimmisim nda mnduha ni, ka klapta wa taŋ ta tva lami ta wa tgha luwa. Tsa sanlaha ma zlərmaha his ya, ka valaftá hahəŋ ta inda tsa gwal ma vwah ya, ka pslatá həŋ.

⁴⁵ Tekulemes fitika Avimelek ta vulu nda gwal ma luwa, ka zatá tsi ta tsa luwa ya, ka pslatá inda mnduha mida. Ka dzaɓiŋtá tsi ta tsa luwa ya, ka paghaftá slughul tida.

⁴⁶ Manda snaŋta maliha ma həga nda slra ma Səkem ta tsa skwi ta maguta ya, ka hwayaftá həŋ ka laghwi da dida ma həga Ilbərit.

⁴⁷ Ka mnanatá lu ta Avimelek kazlay waʼa tskava tska inda maliha hada kəʼa.

⁴⁸ Mantsa tama, ka sliʼaftá Avimelek ka lafi ta ghwá Tsalmuŋ, nda bakwa inda mnduha kawadaga nda tsi. Ka klaftá tsi ta slpaɗa ma dzvu ka tsatá zligama fu, ka zləŋafta ta badzaga ni. Tahula tsa, kaʼa nda tsa bakwa mnduha kawadaga nda tsi ya mantsa: « Nda ngha kuni ta skwi maga yu ya kiʼe, magawa maga misimmisim manda ŋa ɗa, » kaʼa.

⁴⁹ Ka ɗatsatá inda taŋ ta zligama fuha, ka dzaʼa mista Avimelek. Ka tskanatá həŋ ta tsa zligamaha fu ya ta wa tsa dida ɗifaghu mnduha ya, ka fiŋtá tsa həga nda slra ya nda mnduha mida tani. Ka rwutá inda mnduha ta ɗifa ma tsa həga nda slra ma Səkem ya. Ta magay mnduha ta dəmbuʼ (1.000) zgwana nda miʼaha tani.

Mtakwa Avimelek

⁵⁰ Tahula tsa, ka sliʼaftá Avimelek ka laghwi dika la Tevets. Ka fatá tsi ta ghuɓa ni ma Tevets, ka ŋamta nda vulu, ka klaghuta.

⁵¹ Ma takataka tsa luwa ya, mamu batá sana həga nda slra ŋa ɗifa. Ka ɗifaghutá inda mnduha ma tsa luwa ya mida, nda zgwana tani, nda miʼaha tani. Ka hamtá həŋ ta ghəŋa taŋ mida, ka ŋlaghata ta daɓaraka tsa həga nda slra ya.

⁵² Ka ɓhadaghatá Avimelek ha da vla tsa həga nda slra ya nda vulu, ka lagha tsi ta wa tgha tsa həga ya ŋa fiŋta nda vu.

⁵³ Ama, ka wuɗagaptá sana marakw ta dughura buna dagala ta ghəŋ ŋa Avimelek, ka pslanaptá bɗəm.

⁵⁴ Ka hgaftá Avimelek ta duhwal ta klanatá huzla vula ni, kaʼa nda tsi mantsa: « Misimmisim tsəhagap tsəha ta kafaya gha ka dzata ka ta iʼi, yaha lu da mnay nda iʼi kazlay na: “Marakw ta dzata,” » kəʼa. Ka sliglatá tsa duhwal ta klanatá huzla vula ni ya, ka mtutá tsi.

⁵⁵ Manda snaŋta la Israʼila kazlay nda mta Avimelek kəʼa, ka vraghutá inda taŋ dzagha taŋ.

⁵⁶ Mantsa ya ká Lazglafta vranamtá Avimelek ta ghwaɗaka skwi magana tsi ta da ni ma pslata ni ta tsa zwana da ni ndəfáŋ mbsak ya.

⁵⁷ Ka vranaftá Lazglafta ta ghəŋa mnduha la Səkem ta inda ghwaɗaka skwi maga həŋ. Mantsa hɗamta ksiʼa Yutam zwaŋa Yərubaghal ta həŋ.