Gwal tsa guma 8 - Hdi

Gufatá ŋuɗufa la Ifrayim

¹ Ka la Ifrayim nda Gidghuŋ mantsa: « Mndərga wati ma magaku tsaya magaŋna ka na? Kabgawu kwal ka hgaŋnata ma dzaʼa gha da vulu nda la Midyaŋ na? » ka həŋ. Ka zlərɗanaftá həŋ ta wi katakata nda tsi.

² Ama ka Gidghuŋ nda həŋ mantsa: « Nahgani ya maga yu ka malaghutá ŋa ghuni na? Katu ya klagagha kaghuni la Ifrayim, dər kinawu kiʼata ni ná, malaghu a piw ta skwi ya mutsaf yu nda la Avighezer ta uʼa ɗa wu ra?

³ Ma dzva ghuni pghamta Lazglafta ta maliha la Midyaŋ, i Ghurev nda Zəʼev. Nahgani ya maga yu tama ta malaghutá ŋa ghuni? » kaʼa. Na tsa mnagapta ni ta tsa gwaɗa ya, ka vragatá tsa gufatá ŋuɗufa taŋ ta ghəŋa ni ya.

Pslata Gidghuŋ ta mghamha la Midyaŋ his

⁴ Ka ɓhadaghatá Gidghuŋ da zala Yardeŋ, ka tsughwaɗaptá tsi, tsatsi nda tsa mnduha hkən dərmək kawadaga nda tsi ya. Kulam nda hərfata həŋ ama tata hwayiŋtá ghumaha taŋ həŋ.

⁵ Manda ɓhadaghata taŋ da luwa Sukut, ka həŋ nda mnduha mida mantsa: « Kdəkwakdək, vlaŋwa vla ta zlamblaha buradi ta na mnduha mista ɗa na, kabga nda hərfa həŋ, ta hwayiŋtá i Zeva nda Tsalmuna, mghamha la Midyaŋ yu, » kaʼa.

⁶ Ka maliha la Sukut zlghaftá wa ni mantsa: « Ma dzva gha i Zeva nda Tsalmuna tama, dzaʼa kəl ŋni ka vlaŋtá zlamblaha buradi ta gwal vula gha ra? » ka həŋ.

⁷ Ka Gidghuŋ mantsa: « Mantsa, baɗ dzaʼa vlata Yawe ma dzva ɗa ta i Zeva nda Tsalmuna ya ná, dzaʼa kwahata nda teki nda ya nda madzəfa mtak yu ta kaghuni, » kaʼa.

⁸ Daga hada, ka ŋladaftá tsi da Pənuʼel, ka ɗawaŋtá tsi da la Pənuʼel manda va tsaya. Ka zlghanaftá la Pənuʼel manda va tsa si zlghanaf mnduha la Sukut ta wi ya guli.

⁹ Kaʼa nda la Pənuʼel guli mantsa: « Ka vrak vra yu ma zɗaku katsi, dzaʼa zliŋ zla yu ta na həga nda slra ma luwa ghuni na! » kaʼa.

¹⁰ Waʼa i Zeva nda Tsalmuna ma Karkur kawadaga nda gwal vula taŋ, ta magay mnduha dəmbuʼ ghwaŋpəɗ hutaf (15.000), na gwal ta pɗaku ma inda gwal vula gwal nda təv safa fitik. Psla psla lu nda kafay ta mnduha dəmbuʼ dərmək nda hisambsak (120.000).

¹¹ Ka laf Gidghuŋ nda ta tva gwal ngha rini nda təv safa fitik ma Nuva nda Yugbuha, ka pslatá tsi ta gwal vula la Midyaŋ, kabga si nda ɗifa ɗifa ŋni ka tsaha ya sizlay.

¹² Ka hwayaftá i Zeva nda Tsalmuna, ka hwayiŋtá Gidghuŋ ta həŋ, ka hlaftá tsi ta tsa mghamha la Midyaŋ his, i Zeva nda Tsalmuna ya. Ka vlaŋtá tsaya ta ŋwaŋuɗataku ta inda gwal vula la Midyaŋ.

¹³ Ta vraktá Gidghuŋ zwaŋa Yuʼas ma vla vulu ta ŋla vli ma Heres,

¹⁴ ka ksaftá tsi ta sana duhwala la Sukut, ka ɗawanaptá tsi ta vli, ka vindanaftá tsaya ta hga maliha nda la galata mndu ma Sukut, mnduha ndəfáŋ mbsak ndəfáŋ mida həŋ.

¹⁵ Ka lagha Gidghuŋ slanaghatá mnduha la Sukut, kaʼa nda həŋ mantsa: « Wana i Zeva nda Tsalmunna, na ya gag kuni ta iʼi ta ghəŋa ni ya kay. Ka kuni na: “Ma dzva gha i Zeva nda Tsalmuna tama, dzaʼa kəl ŋni ka vla zlamblaha buradi ŋa mnduha gha ta hərfuta ra?” ka kuni ya kay, » kaʼa.

¹⁶ Ka kasaftá tsi ta la galata mndu ma luwa. Ka slvaptá tsi ta tsa mnduha la Sukut ya nda teki nda ya nda madzəfa mtak.

¹⁷ Ka zləmbiŋtá tsi guli ta bata həga nda slra ma Pənuʼel, ka pslatá mnduha ma tsa luwa ya.

¹⁸ Tahula tsa, kaʼa nda i Zeva nda Tsalmuna mantsa: « Kinawu si nzakwa tsa mnduha psla kuni ta həŋ ma Tavur ya na? » kaʼa. Ka həŋ mantsa: « Si manda kagha həŋ. Manda zwaŋa mgham ya si nzakwa taŋ, » ka həŋ.

¹⁹ Kaʼa nda həŋ mantsa: « Si zwana ma ɗa həŋ, zwani ya ya ma ɗa. Ta waɗaghuna waɗa yu nda hga Yawe nda hafu mida, ka má si ta zlanatá kuni ta həŋ nda hafu katsi, má haɗ yu dzaʼa pslatá kaghuni wu, » kaʼa.

²⁰ Kaʼa nda Yeter zumala ni mantsa: « Sliʼaf sliʼa ka pslata ka ta həŋ! » kaʼa. Ama tsəhagap a tsa duhwal ya ta kafaya ni wu, ka zləŋaftá tsi ta zləŋ, kabga ta ka zwaŋ.

²¹ Ka i Zeva nda Tsalmuna tama mantsa: « Psla psla vərɗa kagha ta aŋni, kabga ba ta nzakwa mndu ka zgun kada maga tsi ta slna zgun, » ka həŋ. Mantsa tama, ka pslatá Gidghuŋ ta i Zeva nda Tsalmuna. Tahula tsa ka hlaghutá tsi ta huzla rka si ma ŋurzluŋa ŋalibwaha taŋ.

Kɗavakta fitika Gidghuŋ

²² Ka la Israʼila nda Gidghuŋ mantsa: « Nza nza vərɗa kagha ka mghama ŋni, kagha nda zwaŋa gha, nda zivira gha, kabga katap kata ka ta aŋni ma dzva la Midyaŋ, » ka həŋ.

²³ Ka Gidghuŋ nda həŋ mantsa: « Iʼi a dzaʼa nzakway ka mghama ghuni wu, zivira ɗa a guli wa. Ka nza Yawe ka mghama ghuni! » kaʼa.

²⁴ Tahula tsa, ka Gidghuŋ nda həŋ mantsa: « Ta kumay yu ta ɗawaŋtá sana skwi da kaghuni: Kalaɗifwa kala inda kaghuni ta halagarha mataba skwiha zləɗa kuni! » kaʼa. Mamu halagarha ka dasu si da tsa ghumaha ya, kabga la Yismaghel həŋ.

²⁵ Ka həŋ mantsa: « Yaw, dzaʼa vlagha vla ŋni nda rfu nda rfu! » ka həŋ. Ka zlatatá həŋ ta wupay, ka vladatá inda taŋ tida ta halagarha ma skwiha zləɗa həŋ.

²⁶ Ndəgakwa tsa halagarha ka dasu ɗawaŋ tsi ya ná, ta klay ta kiluʼ a dasu hisambsak. Mbəɗaf a lu ta huzla rka, nda skwa fay ma sləməŋ, nda lgutha ka dva ghuz si ta klə mghamha la Midyaŋ wu, kul mbəɗ lu guli ta miziɗikwha si ma ŋurzluŋa ŋalibwaha taŋ.

²⁷ Ka magaftá Gidghuŋ ta ifut nda tsa dasu ya, ka fatá tsi ma luwa ni, ma Ghufra. Ka nzakw tsi hada ka skwi ŋa maga sliʼiŋ sliʼiŋa inda la Israʼila, ka nzakw tsi ka dəɓəl ŋa Gidghuŋ nda la ga taŋ tani.

²⁸ Ka sku la Midyaŋ ta htsiŋ mista la Israʼila, kapglaŋ a həŋ ta ghəŋ wa. Ka nzatá tsa haɗik ya ma zɗaku ka vaku fwaɗ mbsak, ma fitika nzakwa Gidghuŋ nda hafu.

²⁹ Ka vraghutá Yərubaghal, ta nzakway ka Gidghuŋ zwaŋa Yuʼas ya dzagha ni.

³⁰ Ndəfáŋ mbsak zwana zgwana Gidghuŋ, tsatsi ta yayata demdem, kabga nda ndəgha miʼa ni.

³¹ Markwa sanagha ni ta nzakw ma Səkem ya guli, ka yanatá tsi ta zwaŋa zgun turtuk, ka tsanaftá tsi ta hgu ka Avimelek.

³² Ka mtutá Gidghuŋ, zwaŋa Yuʼas ma haluta ni katakata ma zɗaku, ka paɗamtá lu ma kula da ni Yuʼas ma Ghufra da la Avighezer.

³³ Ama tahula mtuta Gidghuŋ, ka zlrəglaftá la Israʼila ta maga sliʼiŋsliʼiŋ nda ma tsəlɓu ŋa Baghalha. Ka klaftá həŋ ta Baghalʼbərit ka lazglafta taŋ.

³⁴ Havəglap a la Israʼila ka Yawe, Lazglafta taŋ ta katagaptá həŋ ma dzva inda ghumaha taŋ ta wanaftá həŋ ya wa.

³⁵ Magəglana a həŋ ɗekɗek ta zɗaku ta həga ga Yərubaghal ta nzakway ka Gidghuŋ ya, kulam nda inda ŋərma tsa skwi magana tsi ta la Israʼila wa.