Gwal tsa guma 5 - Hdi

Fanafta Debura ta laha

¹ Baɗ tsa fitik ya, ka faftá i Debura nda Barak zwaŋa Avinugham ta laha, ka həŋ mantsa:

² « Rfawa rfa ta Yawe, ma klay maliha la Israʼila ta kəma, ma fatá mnduha ta ghəŋa taŋ ŋa vulu.

³ Ariwa mghamha, snawa sna! Ariwa maliha, fawa fa ta sləməŋ! Iʼi ná, ŋa Yawe dzaʼa fa yu ta laha, dzaʼa fay yu ta laha ŋa vlaŋtá sgit ta Yawe, Lazglafta la Israʼila.

⁴ Yawe, ma saba gha ma haɗika Seghir, ma gavagaghata gha ta sagha ka ta kwakwara Idum, ka gigiɗavaftá haɗik, ka mbəzaku luwa, ka pghəgiŋtá ghwayakha ta ima taŋ.

⁵ Ka nuʼutá ghwáha ta kəma Yawe, nduk nda Sinay tani ta kəma Yawe, Lazglafta la Israʼila.

⁶ Ta fitika Samgar zwaŋa Ghanat, ta fitika Yaghel, zlana zla lu ta pazlala husam, ka tsaghatá lu warawara nda ma zivak.

⁷ Zlanava zla lu ta luwaha la Israʼila, ha ka sagha ta fitika zlagapta iʼi Debura, ha ka zlagapta ma, ma Israʼila.

⁸ Ka zbaptá la Israʼila ta sana lazglaftaha ka lfiɗ, gi ta wa tghaha luwa na vulu. Ngha a lu ta dər zalam, dər gupa, da mnduha dəmbuʼ fwaɗ mbsak (40.000) ma Israʼila wa.

⁹ Kawadaga ŋuɗufa ɗa nda maliha la Israʼila, nda gwal mataba mnduha ta fatá ghəŋa taŋ nda ɗvafta taŋ. Rfawa Yawe!

¹⁰ Kaghuni gwal ta ŋla kəɗihha ka ŋusliŋ ka ŋusliŋ ta nzaku ta karmiskin, kaghuni gwal ta mbaɗa ta tvi, fawa laha!

¹¹ Ndusa nda wa ghwa ta rusa gwal ta dga imi ta gwaɗa ta slna tɗukwa maga Yawe, skwi tɗukwa ya magana tsi ta maliha la Israʼila! Mantsa tama, ka laha mnduha Yawe nda ta wa tghaha luwa.

¹² “Sliʼava sliʼa gha, sliʼava sliʼa gha, Debura! Sliʼava sliʼa gha, sliʼava sliʼa gha! Faf fa ta laha! Sliʼaf sliʼa gha, Barak, zwaŋa Avinugham, hla ta vuʼaha gha!”

¹³ Mantsa tama, ka laha gwal ta pɗaku nda hafu təv gwal dagaladagala, ka tskavatá mnduha Yawe ta vata iʼi nda hbatá vgha ŋa vulu.

¹⁴ Daga ma Ifrayim sagha mnduha nda diha ma Ghamalek, ta hula gha Biŋyamiŋ mataba bakwa gha. Daga ma Mahir sliʼagata maliha, daga ma Zəvuluŋ sagha gwal kla dafa mgham.

¹⁵ Ka pghaftá maliha la Yisakar ta Debura. Ka laghwi la Yisakar mista Barak. Ka tsaŋtá həŋ ta səla mista ni ma didiŋa. Ama mataba la Rubeŋ, tsiŋ a həŋ ta ghəŋa gwaɗa ta lagha wa.

¹⁶ Kabgawu kəl ka ka nzata ndusa nda kalakala tuwakha, ka sna vya siŋlaka gwal ngha rini ta hga braha rina taŋ na? Ama mataba la Rubeŋ ta uʼa taŋ ná, tsiŋ a lu ta ghəŋa gwaɗa ta lagha wa!

¹⁷ Ta nzaku Gilghat ta ɓla Yardeŋ. Kabgawu kəl Daŋ ka nzata ta vata kwambaluha na? Ta nzakwa ni Aser ta wa drəf, ta mbiʼa vgha ni ma vla tskwa kwambaluha ni.

¹⁸ Ama la Zəvuluŋ ná, mndəra mndu ta gruŋtá mtaku ya, mantsa ya Naftali ta kuɗuŋurha ma ghwata vulu.

¹⁹ Ka sliʼaktá mghamha, ka vulu həŋ ta vulu. Ka vulu mghamha la Kanʼana ta vulu, ma Taghnak ndusa nda ghwa Məgidu, ama mutsaf a həŋ ta zləɗatá tsedi wa.

²⁰ Daga ta luwa vulafta tekwatsaha ta vulu, ta lab həŋ ta tva taŋ, ka vulaftá həŋ ta vulu nda Sisəra.

²¹ Ka faɗaghatá zala lika Kisuŋ ta həŋ, zala lika Kisuŋ ŋa ghalya! Ari hafa ɗa, la ta kəma ta kəma, mbrata vgha!

²² Ka vavalaku plisha Sisəra ta vavalaku ta haɗik, ka hwaya, ka ŋəzlatá ghudzaga takuɗamaha taŋ.

²³ Ka duhwala Yawe mantsa: “Ksiʼawa ksiʼa ta luwa Meruz, ksiʼawa ksiʼa, ksiʼawa ksiʼa ta mnduha ni, kabga sagha a həŋ da kataŋtá Yawe wu, da kataŋtá Yawe mataba gwal bikwira vulu wu,” kaʼa.

²⁴ Nda tfa wi ta ghəŋa Yaghel markwa Hever mnda la Keŋ, mataba miʼaha! Ka nza tsi nda tfa wi ta ghəŋa ni ka malaghuta pɗakwa miʼaha ta nzakw ma tumpulha!

²⁵ Ka ɗawaŋtá Sisəra ta imi, ka vlaŋtá tsi ta uʼa, ka vlaŋtá palaka uʼa ma fighwita gwal dagaladagala.

²⁶ Ka klaftá tsi ta silik ma sana dzva ni, ma zeghwa guli, ka klaftá tsi ta nduvula gwal maga slna. Ka dzuŋtá tsi ta Sisəra, ka tanaptá ghəŋ, ka pslanaptá ghəŋ, ka zlaganapta.

²⁷ Ka ɓukwatá tsi ta kəma ni, ka zləmbatá tsi, ka hanata zərnaʼ mista səla Yaghel. Ma tsa vli la tsi dzuŋwaf ya, hada mtutá tsi.

²⁸ Ka nghagaptá ma ni ma Sisəra nda ta rwiɗ, ka wahu tsi ta wahu nda ma laɓle, “Kabgawu kəl mwata plisa ni ka gərɗata na? Kabgawu kəl mwataha plisa ni ka mbaɗa ɗasuwa na?”

²⁹ Ka zlghanaftá gwal ta malaghuta nda ɗifil ma ghəŋ mataba kwagha rmba ni ta wi, ka vranaftá vərɗa tsatsi, kaʼa mantsa:

³⁰ “Vəl mutsafta taŋ ta skwa zləɗu dagala a kəl həŋ ka laghu da dgay tsa wa? Makwa turtuk, ka kuʼaha his ka vuʼa a tsi ŋa vlaŋtá mnda vulu turtuk, skwa zləɗu ka lgut nda wirtsa a tsi ŋa Sisəra, skwa zləɗu ka lgut gaf lu nda ga wirtsata ni, nda ya gaf lu nda ga his, ŋa da ŋurzluŋa gwal ta zata ghwa,” kaʼa.

³¹ Ari Yawe! Ka zwaɗ zwaɗa ghumaha manda Sisəra. Gwal ta ɗvuta ná, ka nza həŋ guram nda fitik ta zlagapta nda mbrakwa ni, » kaʼa. Fwaɗ mbsak vakwa tsa haɗik ya ma zɗaku.