Gwal tsa guma 4 - Hdi

I Debura nda Barak

¹ Tahula mtuta Ihut, ka vrəglanaftá la Israʼila ta maga ghwaɗaka skwi ta wa ira Yawe.

² Ka vlata Yawe ta həŋ ma dzva Yaviŋ, mghama Kanʼana ta ga mgham ma Hatsur. Hga mala gwal vula ni ná, tsaya Sisəra, ta nzakw ma Harusetʼguyim.

³ Ka wahu la Israʼila ta wahu da Yawe, kabga Yaviŋ ná, təmbay dərmək (900) mwata plisha ni ka kfur ka kfur. Hisambsak vakwa ni ta ghuya ɗaŋwa katakata ŋa la Israʼila.

⁴ Ma tsa fitik ya, anabi Debura, markwa Lapidut ta tsa guma ta ghəŋa la Israʼila.

⁵ Mista fwa zlizlama Debura, ma takataka Rama nda Betel ta kwakwar ta ghwá Ifrayim ta gɗata tsi ta nzata. Da hada ta lafa la Israʼila da tsi ŋa tsanata ni ta guma ta həŋ.

⁶ Ma sana fitik, ka ghunaftá tsi ta mndu hganaktá Barak zwaŋa Avinugham ma Kedes ta haɗika Naftali, kaʼa nda tsi mantsa: « Wya skwi ta mnaghafta Yawe, Lazglafta la Israʼila: “La ta ghwá Tavur, ka hlafta ka kawadaga nda kagha ta mnduha dəmbuʼ ghwaŋ (10.000) mataba la Naftali nda la Zəvuluŋ.

⁷ Dzaʼa gataghak gata yu ta Sisəra da lika Kisuŋ, mala gwal vula Yaviŋ, nda mwata plisha ni nda bakwa mnduha ni tani, dzaʼa vla vla yu ta həŋ ma dzva gha,” » kaʼa.

⁸ Ka Barak nda Debura mantsa: « Ka ta dzaʼa ka kawadaga nda iʼi, ta dzaʼa yu. Ama ka la a ka kawadaga nda iʼi wu, la a yu guli wu, » kaʼa.

⁹ Ka Debura mantsa: « Aray, ta dzaʼa yu kawadaga nda kagha, ama ta inda tvi ya dzaʼa mbaɗ ka, ŋa gha a dzaʼa nzakwa glaku wu, kabga ma dzva marakw dzaʼa vlata Yawe ta Sisəra, » kaʼa. Ka sliʼaftá Debura ka laghwi da Kedes kawadaga nda Barak.

¹⁰ Ka hgaftá Barak ta mndəra la Zəvuluŋ nda la Naftali ma Kedes. Ka laf mnduha dəmbuʼ ghwaŋ (10.000) mista ni, ka laf Debura guli kawadaga nda tsi.

¹¹ Si dga dga Hever, mnda la Keŋ ta vgha nda sanlaha ma la Keŋ mndəra la Huvav, la dzidza Musa. Ka dzugwatá tsi ta tumpula ni ta vata halalaya fu ma Tsaghananim, ndusa nda Kedes ya.

¹² Ka mnanatá lu ta Sisəra kazlay na, laghu la Barak zwaŋa Avinugham ta ghwá Tavur kəʼa.

¹³ Ka hagaftá Sisəra ta inda mwata plisha ni təmbay dərmək (900) ka kfur ka kfur, nda inda mnduha hada kawadaga nda tsi ma Harusetʼguyim, ŋa laha da lika Kisuŋ.

¹⁴ Ka Debura nda Barak mantsa: « Sliʼaf sliʼa gha, kabga wana fitik kəl Yawe ka vlatá Sisəra ma dzva gha. Mantsa nzakwa ni, Yawe ta klaghatá kəma, » kaʼa. Ka saha Barak ta ghwá Tavur nda mnduha dəmbuʼ ghwaŋ (10.000) mista ni.

¹⁵ Mantsa tama, ka dɗanaghatá Barak nda vulu ta Sisəra, ka zlaɓanaftá Yawe nda kafaya Barak ta Sisəra nda bakwa mnduha ni demdem tani. Ka valagatá Sisəra ta mwata plisa ni ta kəl tsi ka vulu ka hwayaghuta nda səla.

¹⁶ Ka hwayiŋtá Barak ta mwata plisha, nda gwal vulu ha da Harusetʼguyim. Ka rwanatá lu ta inda gwal vula Sisəra nda kafay, haɗ mndu ta pɗata dər turtuk wa.

¹⁷ Ka hwayaghutá Sisəra nda səla da ɗifaghuta ma tumpula Yaghel, markwa Hever mnda la Keŋ, kabga mamu zɗaku mataba i Yaviŋ, mghama Hatsur, nda la ga Hever mnda la Keŋ.

¹⁸ Ka sab Yaghel da tsuʼaftá Sisəra, kaʼa nda tsi mantsa: « Saghu sa gha, rvera ɗa, saghu sa gha da ini, ma ksagha zləŋ, » kaʼa. Ka lam tsi da taŋ da tumpul, ka bukwanaghatá tsi ta guntu.

¹⁹ Kaʼa nda tsa marakw ya mantsa: « Kdəkkdək taɗif ta ta imi ya kiʼa ŋa say, ndala ta kuzlihata, » kaʼa. Ka gunatá tsi ta zliba huta nda uʼa mida, ka vlaŋtá tsi ŋa say. Tahula tsa, ka bukwuglamtá tsi.

²⁰ Kaʼa nda tsa marakw ya guli mantsa: « Slada slada ta wa tgha tumpul. Ka sagha sa lu da ɗawaghata kazlay: “Mamu mndu hadna ra?” kəʼa ya, “Haɗ wu” ka ka dazlay, » kaʼa.

²¹ Hərfu hərfa Sisəra katakata, meʼ dza dza hani. Ka klaftá Yaghel markwa Hever ta silika tumpul, nda nduvul, ka kɗikadaghata ta vata ni, ka dalanamtá tsa silik ya ma ghəŋ tes da haɗik, ka mtuta Sisəra.

²² Ka ɓhadaghatá Barak ta hwayiŋtá Sisəra ya kay. Ka sab Yaghel da tsuʼay, kaʼa nda tsi mantsa: « Sawi ka maraghata yu ta tsa mndu ta zbə ka ya! » kaʼa nda tsi. Ka lam tsi da taŋ, kəʼa kəʼa ná, zərnaʼa Sisəra, nda mta, nda dalatá silik ma ghəŋ.

²³ Baɗ tsa fitik ya raghwanata Lazglafta ta Yaviŋ, mghama Kanʼana ta kəma la Israʼila.

²⁴ Ka sgaku mbrakwa la Israʼila nda sga, ka ghuya ɗaŋwa katakata ŋa Yaviŋ, mghama la Kanʼana, ha ka zaɗiŋta.