Gwal tsa guma 3 - Hdi

¹ Wya mndəra mnduha zlana Yawe ŋa dzəgha la Israʼila, inda gwal si kul vulaŋtá dər wati ma vulu ma Kanʼana.

² Nda nza ŋa snaŋta zivira la Israʼila si kul walaŋta vulaŋtá vulu, ŋa snaŋta taŋ ka taghay taŋ ta vulu.

³ Tsa mndəra mnduha ya na: Mghamha la Filisti hutaf həŋ, inda la Kanʼana, nda la Tsiduŋ, nda la Hiv ta nzata ta ghwá Ləvanuŋ, daga ta ghwá Baghalʼhermuŋ ha ta wa tgha lami da Hamat.

⁴ Nda nza hahəŋ ŋa famtá Israʼila da dzəghu, ŋa snaŋta ka dzaʼa sna sna re, snata a wa la Israʼila ta zlahuha vlaŋ Yawe ta dzidzíha taŋ nda ma dzva Musa ya.

⁵ Ka nzatá la Israʼila mataba la Kanʼana, nda la Het, nda la Amuru, nda la Periz, nda la Hiv, nda la Yəbus.

⁶ Ka hlaftá həŋ ta kwagha tsa mnduha ya ka miʼa taŋ, ka vlatá hahəŋ ta kwagha taŋ ŋa zwana tsa mnduha ya, ka tsəlɓu həŋ ta tsəlɓu ŋa lazglaftaha taŋ.

Katapta Yawe ta la Israʼila nda ma dzva Utniyel

⁷ Ka magatá la Israʼila ta ghwaɗaka skwi ta wa ira Yawe. Ka zanaptá həŋ ta Yawe, Lazglafta taŋ, ka tsəlɓu həŋ ta tsəlɓu ŋa Baghalha nda udza Asera.

⁸ Ka gufaftá ŋuɗufa Yawe ta ghəŋa la Israʼila ka dzawaptá tsi ta həŋ ŋa Kusaŋʼritsghatayim, mghama Mesuputami. Ka magatá la Israʼila ta vaku tghas ta skwa htsiŋ da Kusaŋʼritsghatayim.

⁹ Ka wahu la Israʼila ta wahu da Yawe, ka zlaganaptá Yawe ta mndu ŋa kataptá həŋ: Ghutniʼel zwaŋa Kənaz, zwaŋama ni ma Kalep ka sagəŋ.

¹⁰ Ka lagha Sulkuma Yawe ta ghəŋa ni, ka nzakw tsi ka mnda tsa guma ma Israʼila. Ka laghu tsi da vulu, ka vlatá Yawe ta Kusaŋʼritsghatayim, mghama Mesuputami ma dzva ni, ka kwaraftá tsi.

¹¹ Tahula tsa, ka nzatá tsa haɗik ya ta vaku fwaɗ mbsak ma zɗaku. Ka mtutá Ghutniʼel, zwaŋa Kənaz.

Katapta Yawe ta la Israʼila nda ma dzva Ihut

¹² Ka zlrəglaftá la Israʼila ta magəgəltá ghwaɗaka skwi ta wa ira Yawe. Ka vlaŋtá Yawe ta mbraku ta Ghegluŋ mghama Muwav ŋa vulu nda la Israʼila, kabga ghwaɗaka skwi ta mag həŋ ta wa ira Yawe.

¹³ Ka mbalaftá Ghegluŋ mista ni ta la Ghamuŋ nda la Ghamalek. Ka lab həŋ zatá la Israʼila, ka klaghutá həŋ ta Yeriku ta nzakway ka luwa zlizlamha ka ŋa taŋ.

¹⁴ Ka magatá la Israʼila ta vaku ghwaŋpəɗ tghas ta skwa htsiŋ da Ghegluŋ, mghama Muwav.

¹⁵ Ka wahu la Israʼila ta wahu da Yawe, ka zlaganaptá Yawe ta mndu ŋa hlagaptá həŋ. Ihut tsa mndu ya, zwaŋa Geraʼ, mnda la Biŋyamiŋ, ka zlaɓa. Ka ghunaftá la Israʼila ta Ihut ŋa klaŋtá mbəhuha ta Ghegluŋ, mghama Muwav.

¹⁶ Ka slraftá Ihut ta kafay nda za wa ni his his, ta maga rita mitər, ka hbamtá tsi ma lgutha ni ta tataya ni nda ga zeghwi.

¹⁷ Ka vlaŋtá tsi ta mbəhuha ta Ghegluŋ, mghama Muwav. Tsaw Ghegluŋ ná, sana mndu ya káka nda glakwa ni.

¹⁸ Manda kɗakwa Ihut ta vlaŋtá tsa mbəhuha ya, ka ghuniŋtá tsi ta tsa mnduha ta hladaghata ya.

¹⁹ Ama ɓhadaghata Ihut da vla tsatsatá skwa wuyayha ndusa nda Gilgal, dəm turtuk mbəɗavata vərɗa tsatsi tsa ka vraghata slanaghatá mgham, kaʼa nda tsi mantsa: « Mamu skwi nda ɗifa dzaʼa mnaghata yu a mghama ɗa, » kaʼa. « Zlaɗiŋwa zla ta vli sriw, » ka mgham. Ka sliʼagaghutá inda gwal si ta vata ni.

²⁰ Ka gavadaghatá Ihut ta vata Ghegluŋ ta nzaku turtukwa ni ma dzuguvi ta ghəŋa həga ma vli ləŋləŋa, kaʼa mantsa: « Mamu gwaɗa Lazglafta ta mnihata ŋa mnaghata, » kaʼa. Ka sliʼaftá mgham ta dughurukwa nzakwa ni.

²¹ Ka tsəghadapta Ihut nda dzva zlaɓa ni, pay tsəhagaptá tsa kafay ta tataya ni nda ga zeghwi ya, ka sliglatá tsiyaw ta mgham ma huɗi.

²² Tes, laghu la tsa kafay ya nda udza ni nda udza ni, ka gi nuʼamtá ghwaviɗ ta tsa kafay ya. Tsəhagap a Ihut ta tsa kafay ya ma huɗa mgham wu, kabga nuʼam nuʼa ghwaviɗ. Ka sab hari mblaɓaɓ.

²³ Tahula tsa, ka saghwi Ihut nda ta ŋwazla ka hahaftá tsi ta wa tghaha tsa dzuguvi ta ghəŋa həga ya ka ŋəŋərzlafta nda kra wa tgha.

²⁴ Manda saghwa ni, ka lagha kwalvaha Ghegluŋ, kəʼa ka həŋ ná, hahaf haha lu ta wa tghaha nda kra wa tgha. Ka həŋ mataba taŋ mantsa: « Zlah ta kwana ni mgham ma na dzuguvi na, » ka həŋ.

²⁵ Manda nzəɗavata taŋ ha ka hərfuta ta kəzlay, ta guna a mgham ta wa tgha tsa dzuguvi ya wu, ka klaftá həŋ ta skwa gunay, ka gunatá həŋ. Kəʼa ka həŋ ná, wya daŋahəga taŋ nda mta, zərnaʼa ta haɗik.

²⁶ Ma tsa fitika gərɗakwa hahəŋ ya, hwayaghu hwaya Ihut. Tsughwaɗaghu tsughwaɗa ta tsa vla tsatsatá skwa wuyayha ya, ka hwayaghuta da Səghira.

²⁷ Na gi ɓhadaghata ni, ka vyatá tsi ta duli ma kwakwar ta ghwá Ifrayim. Ka sliʼagatá la Israʼila kawadaga nda tsi ta tsa ghwá ya, tsatsi ta kla kəma.

²⁸ Kaʼa nda həŋ mantsa: « Mbaɗwa mista ɗa, kabga vla vla Yawe ta la Muwav, ghumaha ghuni ma dzva ghuni, » kaʼa. Ka valagatá həŋ mista ni. Ka ŋaghutá həŋ ta tvi ta ksə la Muwav ŋa dzaʼa tsughwaɗa Yardeŋ. Zlana a həŋ ta mndu dər turtuk ŋa tsughwaɗadaptá tsa zala ya wa.

²⁹ Ma tsa fitik ya, ka pslatá həŋ ta la Muwav, ta maga mnduha dəmbuʼ ghwaŋ (10.000), duhwalha həŋ demdem, gwal bikwira vulu həŋ guli. Haɗ ya ta ndapta dər turtuk wa.

³⁰ Daga baɗ tsaya, ka sku la Muwav ta htsiŋ da la Israʼila. Ka nzatá tsa haɗik ya ma zɗaku ka vaku tghas mbsak (80).

Katapta Yawe ta la Israʼila nda ma dzva Samgar

³¹ Tahula Ihut guli, ka lam Samgar zwaŋa Ghanat da vla ni. Ka pslatá tsi ta la Filisti mkuʼ dərmək (600) nda dafa ngha sla, ka kataptá tsatsi guli ta la Israʼila.