Gwal tsa guma 21 - Hdi

Mutsanaftá miʼaha mndəra la Biŋyamiŋ

¹ Ma Mitspa, si ka waɗatá la Israʼila ka həŋ na: « Yaha dər wa tsi mataba mu da vla makwa ni ŋa wumatá la Biŋyamiŋ, » ka həŋ.

² Ka lagha la Israʼila da Betel, ka nzatá həŋ hada ha ga hawu ta kəma Lazglafta. Ka wahu həŋ ta wahu nda hərɓa ima taw,

³ ka həŋ mantsa: « Ari Yawe, Lazglafta la Israʼila, kabgawu kəl lu ka pɗatá gita ta mndəra mndu turtuk ma la Israʼila na? » ka həŋ.

⁴ Ga mahtsima ni, ka tsavaftá mnduha ga sərɗək, ka baftá həŋ ta gwir hada, ka vlatá həŋ ta skwa pla ghəŋha ŋa dray tsuh tsuh, nda skwa pla ghəŋha zɗaku.

⁵ Ka ɗaɗawavustá la Israʼila mataba taŋ kazlay na: « Wa na gwal mataba inda mndəra la Israʼila, kul lafi da vla guyatá ghəŋa mnduha ta kəma Yawe na na? » ka həŋ. Tsaw si mamu mghama waɗu waɗa lu kazlay, dər wati ma mndu dzaʼa kwal kul lafi ta kəma Yawe ma Mitspa ná, dzaʼa dza dza lu, ka lu.

⁶ Ka hag la Israʼila ta madər ndanaŋər həŋ ta la Biŋyamiŋ, zwaŋama taŋ, ka həŋ mantsa: « Gita, zaɗana zaɗa lu ta mndəra mndu turtuk mataba la Israʼila!

⁷ Waká lu dzaʼa magay ŋa vlaŋtá marakw ta gwal ta pɗaku nda hafu, ya wya waɗa waɗa mu nda hga Yawe, yaha mu da vla dər ya turtuk ma kwagha mu ka marakw ŋa taŋ kəʼa na? » ka həŋ.

⁸ Ka həŋ mantsa tama: « Mamu mndu mataba mndəra la Israʼila, kul lafi ta kəma Yawe ma Mitspa ra? » ka həŋ. Tsaw haɗ mndu mataba la Yaves ma Gilghat kul lafi da ghuɓu, da guyatá ghəŋa mnduha wa.

⁹ Lama lu da mbəɗa mbsaka mnduha, ngha a lu hada dər turtuk ta mnduha la Yaves ma Gilghat ta lagha wa.

¹⁰ Ka ghunaftá guyata ghəŋ ta gwal vulu dəmbuʼ ghwaŋpəɗ his (12.000) da həŋ. Ka lu mnanaftá həŋ mantsa: « Lawa ka pslata kuni ta la Yaves ma Gilghat nda kafay, nda miʼaha tani, nda zwani tani!

¹¹ Wya ká kuni dzaʼa da magay: Ka pslata kuni nekwnekw ta inda zgwana, nda inda miʼaha ta snaŋtá zgun, » ka lu.

¹² Mataba la Yaves ma Gilghat, ka mutsaftá həŋ ta daghala kuʼaha fwaɗ dərmək (400) ta kul walaŋta snaŋtá zgun. Ka hlaktá həŋ ta həŋ da ghuɓu ma Silu ma haɗika Kanʼana.

¹³ Ka ghwanaftá inda guyata ghəŋ ta gwal ghunay mnanatá pɗakwa la Biŋyamiŋ ma kutumba Rimuŋ ya, ŋa mnanatá zɗaku ta həŋ.

¹⁴ Ma tsa fitik ya, ka vraktá la Biŋyamiŋ, ka valaŋtá lu ta həŋ ta kwagha la Yaves ma Gilghat gwal zlana lu nda hafu. Ama slaghu a həŋ ŋa rafta ta həŋ demdem wa.

¹⁵ Ka hag mnduha ta madər ta ghəŋa la Biŋyamiŋ, kabga zlana zla Yawe ta mahtafa ma mndəra la Israʼila.

¹⁶ Ka la galata mndu mataba guyatá ghəŋ mantsa: « Waká mu dzaʼa magay kada mutsafta na gwal ta pɗaku na ta marakw, ya wya zaɗana zaɗa lu ta miʼa la Biŋyamiŋ na? » ka həŋ.

¹⁷ Ka həŋ guli mantsa: « Ɗina ka mutsafta pɗakwa la Biŋyamiŋ ta nzulanatá zivir ŋa za həga, yaha mndəra mndu dər turtuk dá zwaɗavaghutá ma Israʼila.

¹⁸ Ama amu, lavgliŋ a amu ta vlaŋtá həŋ ka marakw ta kwagha mu wu, » ka həŋ. Waɗa waɗa amu la Israʼila kazlay na: « Nda ksiʼa mndu dzaʼa vlaŋtá makwa ni ta la Biŋyamiŋ! » kəʼa.

¹⁹ Ka havaktá həŋ tama kazlay na mamu həŋ nda skala Yawe inda vaku ma Silu kəʼa, nda ma mazlaya Betel, nda təv safa fitik ta tvi ŋa dzaʼa da Betel ma Səkem, nda ya təv suda Ləvuna.

²⁰ Ka həŋ mnanaftá la Biŋyamiŋ mantsa: « Lawa la da pghatá buɗukwa ma vwaha inabi.

²¹ Ɗasuwa ká kuni, na sliʼagapta kwagha la Silu da skalu ya ná, ka sliʼagapta kuni ma vwaha inabi, ka ksaʼata dər wati ma kaghuni ta makwa mataba kwagha la Silu ŋa nzakwa ni ka markwa taŋ, ka vraghuta ghuni ta haɗika la Biŋyamiŋ.

²² Ka sagha sa dadaha taŋ, ka zwana ma taŋ a tsi, dá mnay kabgawu na kəʼa katsi, ka aŋni dzaʼazlay nda həŋ na: “Zɗanaŋwa zɗa ta huɗi ta həŋ, zlanaŋwa zla ta həŋ, kabga klanaf a ŋni ta marakw ta inda taŋ ma vulu wa. Tsəhala kaghuni a ta vlaŋtá həŋ ya wu ná, ksəta a dmakwa ni ta kaghuni wu,” ka aŋni dzaʼazlay, » ka həŋ.

²³ Ka magatá la Biŋyamiŋ mantsa ya. Ka zbaʼatá dər wati ma həŋ ta həŋ ta həŋ ka marakw mataba kuʼaha ta sliʼagapta da skalu ma Silu, ka kasaghata ka miʼa taŋ taɓta mbsaka taŋ. Ka vraghatá həŋ ta kwakwara za həga taŋ. Ka babəglaftá həŋ ta luwaha taŋ ka nzata mida.

²⁴ Ma tsa fitik ya, ka gazlatá la Israʼila hada, dər wa da mndəra taŋ, ta uʼa taŋ. Ka vraghatá dər wati ma həŋ ta kwakwara za həga ni.

²⁵ Ta tsa zamana ya ná, haɗ si mgham da la Israʼila wa. Dər wa si ta maga skwi ta zɗəganata.