Gwal tsa guma 16 - Hdi

Simsuŋ ma Ghaza

¹ Ka laghu Simsuŋ da Ghaza. Hada, ka nghaŋtá tsi ta sana karwa, ka lam tsi da tsi.

² Ka lu nda la Ghaza mantsa: « Ya sagha sa Simsuŋ da hadna, » ka həŋ. Ka wanaftá həŋ ta tsa vli ya, ga rviɗik ka pghatá buɗukwa ta wa tgha tsa luwa ya, ka nzatá həŋ sriw petsuweɗ vli. Ka həŋ mataba taŋ mantsa: « Kəzlafma tsaɗatá vli ŋa dzata mu, » ka həŋ.

³ Ama ka hanutá Simsuŋ ta hana ni ha takala. Ma takala tama, ka sliʼaftá tsi, ka lagha ŋaŋanatá parawala wa tgha luwa nda səlaha ni his his, ka tsagapta nda kra wa tgha nda kra wa tgha, ka fafta ta badzaga ni, ka klaghata ta bɗəma ghwá tsərah nda Hevruŋ.

Skwapta Dəlila ta Simsuŋ

⁴ Tahula tsa, ka ɗvutá tsi ta sana marakw Dəlila hga ni, ma didiŋa Surek.

⁵ Ka laf maliha la Filisti slanaghatá tsa marakw ya. Ka həŋ nda tsi mantsa: « Gataf gata ŋa snaŋta ka ga ta sagha na mbrakwa ni ta fərtuta na, ka kinawu ká ŋni dzaʼa suta ghəŋa ni. Dzaʼa habaf haba ŋni ŋa htanaghutá mbrakwa ni. Dzaʼa vlagha vla inda dər wati ma aŋni ta sulay dəmbuʼ nda dərmək (1.100), » ka həŋ.

⁶ Ka Dəlila nda Simsuŋ mantsa: « Kdəkkdək, mniɗiŋ mna ɓa ka ga ta sagha na ŋa gha mbraku ta fərtuta na, ka ndaw dzaʼa habafta lu ta kagha ŋa htanaghutá mbrakwa gha, » kaʼa.

⁷ Ka Simsuŋ nda tsi mantsa: « Ka dzəɓaf dzəɓa lu ta lfiɗa tɓaŋha ndəfáŋ ta kul ghwalaku, ka habaftá iʼi nda tsi ná, dzaʼa htuhta mbrakwa ɗa, dzaʼa nzakway yu manda hamatá lamndu, » kaʼa.

⁸ Ka klədanaghatá maliha la Filisti ta Dəlila ta mkweneka tɓaŋha ndəfáŋ ta kul ghwalaku. Ka klaftá tsi ka habaftá Simsuŋ.

⁹ Ka pghatá mnduha ta buɗukwa hada ma dzuguvi ga taŋ. Kaʼa nda Simsuŋ mantsa: « Wya la Filisti ta ghəŋa kagha Simsuŋ! » kaʼa. Ka ratsiŋtá tsi ta tsa tɓaŋha ya, manda ratsakwa sləvdza lgut ksaŋər vu. Ama tsatsaf a lu ka ga ta sagha tsa mbrakwa ni ya wa.

¹⁰ Ka Dəlila nda Simsuŋ mantsa: « Nana iʼi ta nan ka, tsakaliha tsakala ka ta wi! Ndanana, kdəkkdək mniha mna, ndaw dzaʼa habafta lu ta kagha na? » kaʼa.

¹¹ Kaʼa nda tsi mantsa: « Ka habaf haba lu ta iʼi nda tɓaŋha ta ka lfiɗ, ya ta kul ksaŋtá lu ta slna nda tsi, dzaʼa htu hta mbrakwa ɗa, dzaʼa nzakway yu manda hamata lamndu, » kaʼa.

¹² Ka hlaftá Dəlila ta tɓaŋha ta ka lfiɗ, ka habafta, ta pgha buɗukwa mnduha hada ma dzuguvi, kaʼa nda tsi mantsa: « Wya la Filisti ta ghəŋa kagha Simsuŋ! » kaʼa. Ama ka ratsiŋtá tsi ta tsa tɓaŋha ta dzva ni ya manda skwi si sləvdzi ya.

¹³ Ka Dəlila nda Simsuŋ mantsa: « Ha ndana ta ghuɓasa iʼi ka, tsakaliha tsakala ka ta wi. Mniha mna tama ka ndaw dzaʼa habaftá lu ta kagha, » kaʼa. Ka Simsuŋ nda tsi mantsa: « Ka gam ga ka ta ɗata swida ghəŋa ɗa ka ndər ndəfáŋ ya, ma wupay, ka nzəɗanata nda kwama ga skwi katsi ná, dzaʼa htu hta mbrakwa ɗa, ŋa nzakwa ɗa manda va hamata lamndu, » kaʼa.

¹⁴ Ka gatanatá Dəlila ta Simsuŋ, ka dzatá hani. Ka gamtá tsi ta ɗata swida ghəŋa ni ka ndər ndəfáŋ ya, ma wupay, ka nzəɗanata nda kwama ga skwi, kaʼa nda tsi mantsa: « Wya la Filisti ta ghəŋa kagha Simsuŋ! » kaʼa. Ka sliʼaftá tsi ta hana ni, ka tsəhiŋtá tsi ta tsa kwam ya nda gatá tsa swidi ni ma wupay ya.

¹⁵ Ka Dəlila nda tsi mantsa: « Waká kagha ta mnay kazlay na: “Ɗvu ɗva yu ta kagha,” kəʼa, ta lam a yu da hya hya ŋuɗufa gha wu na. Wya mahkəna ghuɓasapta gha ta iʼi tsa, ta mnəɗiŋ a ka ka ga ta sagha na mbrakwa gha ta fərtuta na wu, » kaʼa.

¹⁶ Manda va ya ta mag tsi inda fitik ta hpaɗanatá sliʼiŋ, ka hərfanatá tsi ta Simsuŋ blaw ka mtuta.

¹⁷ Ka gunanatá tsi ta inda ŋuɗufa ni, kaʼa nda tsi mantsa: « Ta laf a paka ta ghəŋa ɗa wu, kabga nda fa yu ka nazir ŋa Lazglafta daga ma huɗa ma ɗa. Ka htsiha htsa lu ta swida ghəŋa ɗa katsi ná, dzaʼa savaghu sa mbrakwa ɗa, ŋa nzakwa ɗa manda va hamata lamndu, » kaʼa.

¹⁸ Kəʼa ka Dəlila ná, gunana guna ta ŋuɗufa ni, ka ghunaftá tsi ta mndu ŋa hgaktá maliha la Filisti, kaʼa mantsa: « Ndana tama, safwa sa ya guniha guna ta inda ŋuɗufa ni, » kaʼa. Ka laf maliha la Filisti da taŋ, nda klatá tsedi ma dzvu.

¹⁹ Ka gatanatá Dəlila ta Simsuŋ, ka dzatá hani ta rkufa ni. Ka hgadaghatá tsi ta sana mndu ka htsiŋtá tsa ndərha swida ni ndəfáŋ ya, ka zlraftá mbrakwa ni ta savaghuta ka dgatá vgha nda tsi.

²⁰ Ka Dəlila mantsa: « Wya la Filisti ta ghəŋa kagha Simsuŋ! » kaʼa. Ka sliʼavatá tsi ta hana ni, kaʼa ma ghəŋa ni mantsa: « Dzaʼa sab sa yu manda ya ghalya, ka pliŋtá vgha, » kaʼa. Ama sna a kazlay na diʼiŋaghu diʼiŋa Yawe nda tsi kəʼa wa.

²¹ Ka ksaftá la Filisti, ka paslanaptá iri. Ka kladatá həŋ da Ghaza, ka habaftá həŋ nda dzəɓatá ziɗa ka ghuva tili. Ka mblə lu ka swa buna huʼa alkama ma gamak.

²² Ama tahula htsatá ghəŋa ni, ka zlraftá swida ni ta ɗyaku.

Mtakwa Simsuŋ

²³ Ma sana fitik, ka tskavatá maliha la Filisti ka vla skwi ŋa pla ghəŋ dagala ŋa Daguŋ, lazglafta taŋ, nda ya ŋa skala rfu. Ka həŋ mantsa: « Vla vla lazglafta mu ma dzva mu ta Simsuŋ ghuma mu, » ka həŋ.

²⁴ Nghaŋta mnduha ta Simsuŋ ná, ka zləzlvu həŋ ta lazglafta taŋ, ka həŋ mantsa: « Vla vla lazglafta mu ma dzva mu ta ghuma mu, tsa mndu ta ɓadza haɗika mu, ka va rwa amu ya, » ka həŋ.

²⁵ Ma tsa zɗavafta ŋuɗufa taŋ ya, ka həŋ mantsa: « Ka hgagap hga lu ta Simsuŋ ka gamata tsi ta gatsuwa! » ka həŋ. Ka klagaptá lu ta Simsuŋ ma gamak, mbaɗa ka gatsuwa ta kəma taŋ. Ka fatá lu ma takataka guguɗiha.

²⁶ Ka Simsuŋ nda tsa duhwal ta klay ta dzvu ya mantsa: « Kla ta iʼi, ka kasavata yu ta guguɗiha ta ŋaŋanatá na həga na, ka dihavata yu ta həŋ, » kaʼa.

²⁷ Hesl ndəghata tsa həga ya nda zgwana nda miʼaha tani. Hada inda maliha mataba la Filisti. Ta daɓaraka tsa həga ya ná, ta magay mnduha ta dəmbuʼ hkən (3.000), zgwana nda miʼaha ta ngha tsa gatsuwa Simsuŋ ya.

²⁸ Ka hgaŋtá Simsuŋ ta Yawe, kaʼa mantsa: « Rvera ɗa, Yawe, havap hava ka iʼi! Mbraɗif mbra. Ari Lazglafta, mbraɗif mbra dər ŋa na fitik na yeya tsi, ka planamta yu turtuktuk ta la Filisti, ŋa pla iriha ɗa his his! » kaʼa.

²⁹ Ka ŋaftá Simsuŋ ta vgha ta tsa guguɗiha his ma takataka ta ŋanatá tsa həga ya, ka kasavata ta həŋ. Dzva zeghwa ni ta sani, dzva zlaɓa ni ta sani.

³⁰ Ka Simsuŋ mantsa: « Ka mtu mta yu kawadaga nda la Filisti! » kaʼa. Ka tiŋwaftá tsi nda inda mbrakwa ni, ka zlanaghatá tsa həga ya ta ghəŋa maliha nda inda mnduha mida. Gwal ta rwuta baɗ mtakwa ni ná, malaghu mala mbsaka ni ta gwal rwana tsi ma nzakwa ni nda hafu.

³¹ Ka laha zwana ma ni nda la ta uʼa taŋ, ka klaghata. Lafa taŋ dzagha, ka paɗamtá həŋ ma kula da ni, Manuwa, ma takataka Tsurgha nda Istaʼul. Hisambsak vakwa ni ka mnda tsa guma ta ghəŋa la Israʼila.