Gwal tsa guma 15 - Hdi

Planamta Simsuŋ ta la Filisti

¹ Lab la fitik mida tama, ta fitika tska alkama ta vwah, ka lagha Simsuŋ nghanaghatá markwa taŋ nda klatá slaɓalakwa gu, kaʼa mantsa: « Ta kumay yu ta lami da markwa ini ma dzuguva hana ni, » kaʼa. Ama ka pyaftá dzidza ni ka lami,

² kaʼa nda Simsuŋ mantsa: « Husagha husa tsa marakw ya ka yu ndanata, kəl yu ka klafta ka vlaŋtá gra gha hɗeka. Ama mamu sagəŋa ni ta malaghutá markwa ghuni nda ɗinaku. Kdəkkdək kla ka markwa ghuni ŋa da manaka ni! » kaʼa.

³ Ka Simsuŋ nda həŋ mantsa: « Ndana tama, haɗ dmakwa ɗa ma skwi dzaʼa maganata yu ta la Filisti wu, » kaʼa.

⁴ Ka laghu Simsuŋ kasaftá gərhaŋha hkən dərmək (300). Ka pipinaftá tsi ta vu ka hahabanatá tsa gərhaŋha ya his his his, htur nda htur, ka fafuŋtá tsa pipinatá vu ya ta wa tsa nzagwatá hturha ya.

⁵ Ka pipinuŋtá tsi ta vu, ka zlazlidiŋtá tsa gərhaŋha ya da skwi ta vwaha la Filisti. Ka fafiŋtá həŋ ta bəgaha bakərvaha, nda skwiha ta ta sladu ta vwah, nduk nda vwaha inabi nda hbatá ghəŋa zaytuŋ.

⁶ Ka la Filisti mantsa: « Wa ta magatá na na? » ka həŋ. Ka lu nda həŋ mantsa: « Simsuŋ ya, kabga klafta dzidza ni mnda la Timna ta markwa taŋ, ka vlaŋtá gra ni hɗeka, » ka lu. Ka laf la Filisti ka driŋtá tsa marakw ya nda da ni tani.

⁷ Ka Simsuŋ nda həŋ mantsa: « Ka si mantsa ya ta maga kuni, haɗ yu dzaʼa zlanata, ka ta plaghunam a yu wu, » kaʼa.

⁸ Ka valanaghatá tsi ta həŋ, ka rwanatá həŋ katakata. Ka sliʼaftá tsi ka laghwi da nzata ma galigha ta pyam ma Ghetam.

Simsuŋ nda paplama kəɗih

⁹ Ka sliʼaftá la Filisti ka lafi da fatá ghuɓa taŋ da la Yuda, ka dagaptá həŋ ta vgha ŋa vulu ma luwa Ləhi.

¹⁰ Ka la Yuda nda həŋ mantsa: « Kabgawu kəl kuni ka saf da zlurgwa aŋni na? » ka həŋ. Ka la Filisti mantsa: « Saf sa ŋni ŋa ksaftá Simsuŋ, ŋa maganata manda va ya magaŋna tsatsi ya, » ka həŋ.

¹¹ Ka sliʼaftá la Yuda dəmbuʼ hkən (3.000) ka laha da tsa galigha ta pyam ma Ghetam ya, ka həŋ nda Simsuŋ mantsa: « Sna a kagha kazlay na ta maga mbraku mbrakwa taŋ la Filisti ta ghəŋa aŋni kəʼa ra? Nahgani na magaŋna ka? » ka həŋ. Kaʼa nda həŋ mantsa: « Magana maga yu ta həŋ manda va ya magiha hahəŋ, » kaʼa.

¹² Ka həŋ nda tsi mantsa: « Sa da ksa kagha ŋa vlaŋtá la Filisti ŋni, » ka həŋ. Ka Simsuŋ nda həŋ mantsa: « Waɗihawa waɗa ka dzata a vərɗa kaghuni ta iʼi, » kaʼa.

¹³ Ka həŋ nda tsi mantsa: « Dzata a aŋni ta kagha wu, dzaʼa habafta nda haba ŋni ta kagha kweŋkweŋ, ka vlaŋtá kagha ta həŋ, » ka həŋ. Ka habaftá həŋ nda zləɓatá lfiɗa təɓaŋ his, ka klagaptá həŋ ma tsa galigha ya, ka kladafta.

¹⁴ Ɓhadaghata ni da Ləhi, ka sliʼadaghatá la Filisti da guyay nda hla wi. Ama ka saha Sulkuma Yawe suw ta ghəŋa ni, ka nutá tsa təɓaŋ si ta dzva ni ya manda dratá sləvdza liŋ nda vu, ka rdutá tsa tɓaŋha ya ta dzva ni.

¹⁵ Ka mutsaftá tsi ta paplama kəɗih ta ka mkwenek, ka klaftá tsi, ka pslatá mnduha dəmbuʼ (1.000) nda tsi.

¹⁶ Ka Simsuŋ mantsa: « Nda paplama kəɗih, pslata yu ta mnduha dəmbuʼ (1.000). Nda paplama kəɗih, babanata yu ta bəgaha mbliha, » kaʼa.

¹⁷ Kɗiŋta ni ta gwaɗa, ka wuɗiŋtá tsi ta tsa paplam ya, ka hgə lu ta tsa vli ya ka Ramat Ləhi.

¹⁸ Ka dzə ndala imi katakata ta Simsuŋ, ka wahu tsi ta wahu da Yawe, kaʼa mantsa: « Kagha ta vlata na zatá ghwa katakata na nda ma dzva kwalva gha. Ndanana, ka dzaʼa ndala dzatá iʼi, ŋa zləmbamta ɗa ma dzva gwal kul tsaku fafaɗa taŋ rki na? » kaʼa.

¹⁹ Ka tanaptá Lazglafta ta guɗuk ma sana kutumba ma Ləhi, ka sab imi mida. Ka saʼatá Simsuŋ, ka vraktá ghəŋa ni, ka vravaftá mbrakwa ni. Tsaya kəl lu ka tsanaftá hgu ta tsa dzuɓay ya, ka Gheŋʼhakure. Ta takeʼa tsa dzuɓay ya kulam gita ma Ləhi.

²⁰ Ka zatá Simsuŋ ta vaku hisambsak ta tsa guma ta ghəŋa la Israʼila ta fitika la Filisti.