Gwal tsa guma 14 - Hdi

Ɗvuta Simsuŋ ta makwa la Filisti

¹ Ma sana fitik, ka laha Simsuŋ da Timna, ka nghaŋtá tsi ta sana daghala makwa la Filisti.

² Ma vradaghata ni dzagha, ka mnanatá tsi ta i da ni nda ma ni, kaʼa nda həŋ mantsa: « Mamu sana daghala makwa la Filisti nghaŋ yu ma Timna. Ndanana, lawa da klaɗifta ka marakw, » kaʼa.

³ Ama ka i ma ni, nda da ni nda tsi mantsa: « Haɗ makwa mataba kwagha mndəra amu, nda ya mataba mnduha mu demdem, dzaʼa kəl ka ka dzaʼa kla makwa la Filisti, gwal kul tsaku fafaɗa taŋ wu ra? » ka həŋ. Ama ka vriŋta Simsuŋ ta mnay ŋa da ni, kaʼa mantsa: « Klaɗif kla, kabga tsatsi ta zɗəgihata, » kaʼa.

⁴ Sna a i da ni nda ma ni kazlay na sagha da Yawe tsa gwaɗa ya kəʼa wu, zba fitik ŋa Yawe ŋa tsagatá lmu nda la Filisti. Ma tsa fitik ya, la Filisti ta ga mgham ta ghəŋa la Israʼila.

⁵ Ka laha Simsuŋ tama da Timna, kawadaga nda i da ni nda ma ni. Ɓhadaghata ni ta wa vwaha inabi ma Timna, ka sab sana slaɓalakwa rveri nda hurgu da guyay.

⁶ Ka saha Sulkuma Yawe suw ta ghəŋa Simsuŋ. Haɗ sana skwi ma dzva ni wu, ka kuhwanaptá tsi his ta tsa rveri ya manda kuhwa zwaŋa gu. Mnanaŋ a ta i da ni nda ma ni ta skwi maga tsi wa.

⁷ Laha Simsuŋ da Timna, ka gwaɗganatá tsi ta tsa makwa ya, ka zɗəganatá tsi.

⁸ Kidaghi fitik tahula tsa, ka vrəgladatá tsi da Timna da kla tsa makwa ya. Ka mbəɗavatá tsi ŋa nghanatá mbla tsa rveri dza tsi ya. Ka slanaghatá tsi ta tuvgulata zuɗum nda imi mida ma vgha tsa rveri ya.

⁹ Ka tsaʼatá tsi ta tsa zuɗum ya ma dzvu, ka zə tsi ta dzaʼa nda mbaɗa ta tvi. Ɓhadaghata ni ta vata da i da ni nda ma ni, ka vlaŋtá tsi ta həŋ, ka zutá hahəŋ guli. Ama mnana a ta həŋ kazlay na ma mbla rveri tsagapta yu kəʼa wa.

Mnay Simsuŋ ta gwaɗa ghwezi ŋa la Filisti

¹⁰ Ka lagha da ni ma Simsuŋ da tsa makwa ya. Hada, ka magatá Simsuŋ ta skwa zaya kla makwa, kabga mantsa ya ta snuta zwana duhwal ta magay.

¹¹ Na gi nghay la Filisti, ka hagaftá həŋ ta graha hkən mbsak ŋa nzata kawadaga nda tsi.

¹² Ka Simsuŋ nda həŋ mantsa: « Ka mnaghuna mna yu ta ghwezi ɓa. Ka tsatsaɗif tsatsa kuni ta klatá ghəŋa ni ma na fitikha ndəfáŋ ta za skwa zay na katsi, ka mutsaf mutsa kuni, dzaʼa valaghuna vala yu ta sɗakwha hkən mbsak, nda lgutha hkən mbsa ŋa mbaɗay.

¹³ Ama ka laviŋ a kuni ta tsatsaɗifta wu, kaghuni dzaʼa vlihatá sɗakwha hkən mbsak nda lgutha hkən mbsak ŋa mbaɗay, » kaʼa. Ka həŋ nda tsi mantsa: « Mna ta tsa ghweza gha ya, ta snay snay ŋni, » ka həŋ.

¹⁴ Ka Simsuŋ nda həŋ mantsa: « Da mndu ta zay ta saba skwa zay, da mndu ta mbruta ta saba skwi gunguna, » kaʼa. Hkən fitik, laviŋ a həŋ ta pslagaptá tsa ghwezi ya wa.

¹⁵ Baɗ mandəfáŋa fitik, ka həŋ nda markwa Simsuŋ mantsa: « Gataf gata ta zəʼala ghuni ŋa mnaŋnaŋta ni ta klatá ghəŋa tsa ghwezi ya, ka mantsa a tsi wu, dzaʼa drəghis dra ŋni, kagha nda la ga da gha tani. Ari hagagagha ŋa zlaʼuwaghutá skwa ŋni a kuni ta aŋni katək na? » ka həŋ.

¹⁶ Ka lagha markwa Simsuŋ taw ta vata zəʼala taŋ, kaʼa mantsa: « Husagha husa yu, ɗvu a ka ta iʼi wa. Ka mnanata ka ta ghwezi ta la da ɗa ná, ka kwal ka mnihata klatá ghəŋa ni! » kaʼa. Ka Simsuŋ nda tsi mantsa: « Mnanaŋ a yu ta dər i da ɗa nda ma ɗa wa. Kagha yeya dzaʼa mnaghata yu tama rki? » kaʼa.

¹⁷ Ka nzatá tsi ka taw ta vata ni ha kɗatá tsa fitikha ndəfáŋ ta za skwa zay ya. Baɗ tsa mandəfáŋa fitik ya tama, ka mnanatá tsi ta klatá ghəŋa ni, kabga ndiʼaf ndiʼa tsa marakw ya tida. Ka laghu tsi da mnanaŋta klatá ghəŋa tsa ghwezi ya ta la da ni.

¹⁸ Baɗ mandəfáŋa fitik, makəɗ fitik dɗaghata da həga ma ni, ka sliʼadaghatá mnduha ma luwa da mnanatá Simsuŋ: « Nahgani ya ta malaghutá gunaku ta ghəŋa zuɗum na? Nahgani ya ta malaghutá mbraku ta ghəŋa rveri na? » ka həŋ. Kaʼa nda həŋ mantsa: « Ka má hvap a kuni ta hva nda sla ɗa wu ná, má tsatsaf a kuni ta tsa ghwezi ɗa ya wu, » kaʼa.

¹⁹ Mantsa tama, ka saha Sulkuma Yawe suw ta ghəŋa ni, ka laha tsi da Askəluŋ. Ka pslatá tsi ta mnduha hkən mbsak, ka hlaghutá huzla taŋ. Ka valaŋtá tsi ta lgutha ta tsa gwal ta tsatsafta klatá ghəŋa tsa ghweza ni ya kay. Ma gufatá ŋuɗufa ni, ka laf tsi da da ni.

²⁰ Ka klaftá lu ta markwa Simsuŋ, ka vlaŋtá gra zwaŋamidzi hɗeka ma kla makwa.