Gwal tsa guma 12 - Hdi

Dmata nda la Ifrayim

¹ Ka tsəkavatá la Ifrayim nda huzla vula taŋ. Ka tsughwaɗaptá həŋ ta Yardeŋ, ka laghwi da Tsafuŋ. Ka həŋ nda Yifta mantsa: « Kabgawu kəl ka ka laghwi da vulu nda la Ghamuŋ, kul hgaŋtá ka ta aŋni ŋa dzaʼa mista gha na? Dzaʼa driŋ dra ŋni ta həga gha nda kagha tani mida, » ka həŋ.

² Ka Yifta nda həŋ mantsa: « Zlərɗaf zlərɗa ŋni ta wi katakata nda la Ghamuŋ, iʼi nda mnduha ɗa tani. Hgaŋ hga yu ta kaghuni, ama sagha a kuni da kata aŋni da həŋ wa.

³ Nghay ɗa, sagha a kuni da kata iʼi wu, ka vziŋtá yu ta ghəŋa ɗa, ka tsughwaɗaptá yu ta Yardeŋ ŋa vulu nda la Ghamuŋ, ka vlatá Yawe ta həŋ ma dzva ɗa. Kabgawu tama kəl kuni ka safi gita da vulu nda iʼi? » kaʼa.

⁴ Ka tskanatá Yifta ta inda zgwana ma Gilghat, ka vulu nda la Ifrayim. Ka zatá la Gilghat ta ghwa ta ghəŋa la Ifrayim, kabga ka la Ifrayim si mnata na: « Kaghuni la Gilghat ta hwayakta da ɗifa mataba la Ifrayim, nda la Mənase guli na! » ka həŋ.

⁵ Ka ŋaftá la Gilghat ta tvi ta kəl la Yufratis ka tsughwaɗadaptá Yardeŋ. Inda mnata sani mataba la Ifrayim ta hwaya kazlay na: « Zliha zla ka laba yu! » kaʼa ya, « La Ifrata kagha ra? » ka la Gilghat si ta mnay nda tsi. Ka: « Hahəŋ a yu wu, » kaʼa ya,

⁶ « Sibulet, ka ka, » ka həŋ nda tsi. Ka « Zibulet, » kəʼa, kabga laviŋ a ta mnagapta manda ya ta raku ya wu, mantsa tama, ksaftá la Gilghat, ka ghwanafta ndusa nda vla tsughwaɗa Yardeŋ. Dəmbuʼ fwaɗ mbsak his mida (42.000) la Ifrayim ta rwuta ma tsa fitik ya.

⁷ Mkuʼ vakwa Yifta mnda la Gilghat ta tsa guma ta ghəŋa la Israʼila. Ka mtutá tsi, ka paɗamtá lu ma luwa ni ma Gilghat.

Nzakwa i Ivtsaŋ nda Iluŋ, nda Avduŋ ka gwal tsa guma

⁸ Tahula Yifta, ka nzakw Ivtsaŋ mnda la Betʼlehem ka mnda tsa guma ta ghəŋa la Israʼila.

⁹ Hkən mbsak zwana ni, hkən mbsak kwagha ni guli. Ka valaŋtá tsi ta tsa kwagha ni ya ta mndəra sana mnduha, hlakha guli ta kuʼaha hkən mbsak ma mndəra sana mnduha ŋa zwana ni. Ndəfáŋ vakwa ni ta tsa guma ta ghəŋa la Israʼila.

¹⁰ Ka mtutá Ivtsaŋ, ka lamtá lu ma Betʼlehem.

¹¹ Tahula Ivtsaŋ, ka nzakw Iluŋ mnda la Zəvuluŋ ka mnda tsa guma ta ghəŋa la Israʼila ka vaku ghwaŋ.

¹² Ka mtutá Iluŋ mnda la Zəvuluŋ, ka paɗamtá lu ma Ayaluŋ ta haɗika Zəvuluŋ.

¹³ Tahula Iluŋ, ka nzakw Avduŋ zwaŋa Hilel, mnda la Pirghatuŋ ka mnda tsa guma ta ghəŋa la Israʼila.

¹⁴ Fwaɗ mbsak zwana ni, hkən mbsak zighiha ni ta ŋla kəɗihha ndəfáŋ mbsak. Tghas vakwa ni ta tsa guma ta ghəŋa la Israʼila.

¹⁵ Ka mtutá Avduŋ, zwaŋa Hilel, mnda la Pirghatuŋ, ka paɗamtá lu ma Pirghatuŋ, ta haɗika la Ifrayim ta ghwá la Ghamalek.