Gwal tsa guma 11 - Hdi

Zbaftá Yifta ka mali ta ghəŋa la Israʼila

¹ Yifta mnda la Gilghat ná, bikwira vulu ya. Zwaŋa sana karwa ya. Da ni guli ná, sana Gilghat ya.

² Ka yayanatá markwa taŋ ta zwani ta Gilghat guli, ka galaftá həŋ, ka ghəzliŋtá həŋ ta Yifta. Ka həŋ nda tsi mantsa: « Haɗ ka dzaʼa mutsaftá za həga ma həga da ŋni wu, kabga zwaŋa sana marakw kagha, » ka həŋ.

³ Ka hwayaghutá Yifta diʼiŋ nda zwana da ni, ka laghu tsi nzata ta haɗika Tuv. Ka tskadaghatá falayha ta vgha ta vata ni, ka sliʼi həŋ da zləɗa vli kawadaga nda tsi.

⁴ Lab la fitik mida tama, guk sliʼaf sliʼa la Ghamuŋ da vulu nda la Israʼila.

⁵ Na tsa guk lagha la Ghamuŋ slanaghatá la Israʼila nda vulu ya, ka laghu la galata mnduha ma Gilghat da zbaktá Yifta ma haɗika Tuv.

⁶ Ka həŋ nda Yifta mantsa: « Sawi, nza nza gha ka mala ŋni, dzaʼa laviŋ lava mu ta zata ghwa ta ghəŋa la Ghamuŋ, » ka həŋ.

⁷ Ka Yifta nda galata mnduha la Gilghat mantsa: « Kaghuni a husaghuna yu ka ghəzlaptá iʼi ma həga da ɗa kay ra? Kabgawu kəl kuni ka sagha da iʼi ndana slaghunaghər ghuya ɗaŋwa na? » kaʼa.

⁸ Ka galata mnduha la Gilghat nda Yifta mantsa: « Mantsa nzakwa ni, ama sagha sa ŋni da kagha ndanana, ŋa dzaʼa gha kawadaga nda aŋni, ka vula ka ta vulu nda la Ghamuŋ, ka nzakwa ka ka mala ŋni, nda ya ta ghəŋa inda la Gilghat, » ka həŋ.

⁹ Ka Yifta nda galata mnduha la Gilghat mantsa: « Ka vradaɗip vra kuni ŋa vulu nda la Ghamuŋ, ka vlihatá Yawe ta həŋ katsi, iʼi dzaʼa nzakway ka mala ghuni, » kaʼa.

¹⁰ Ka galata mnduha la Gilghat nda Yifta mantsa: « Yawe masləmtsək mataba amu. Ta taghaftá ŋni ta imi ta sləməŋ ŋa maga skwi ya ta mnə ka, » ka həŋ.

¹¹ Ka laghu Yifta kawadaga nda galata mnduha la Gilghat. Ka fatá mnduha ka ghəŋ ta ghəŋa taŋ, ka mali ta ghəŋa gwal vula taŋ. Ka vrəglanaftá Yifta ta mnatá inda tsa gwaɗaha ya ta kəma Yawe, ma Mitspa.

Kwalaghuta Yifta ta tsuʼaftá gwaɗa la Ghamuŋ

¹² Ka ghunaftá Yifta ta gwal ghunay da mghama la Ghamuŋ, kaʼa nda tsi mantsa: « Nahgani mataba gha nda iʼi, kəl ka ka sagha da vulu nda iʼi ma haɗika ɗa na? » kaʼa.

¹³ Ka mghama la Ghamuŋ zlghanaftá wi ta tsa gwal ghunadap Yifta ya mantsa: « Ma fitika safa la Israʼila ma Masar ná, ka hlaghutá həŋ ta haɗika ɗa daga ma Arnuŋ dikw da Yabuk, ha da Yardeŋ. Ndanana tama, vraɗiva vra nda zɗaku, » kaʼa.

¹⁴ Ka ghunəgladaptá Yifta ta gwal ghunay da mghama la Ghamuŋ,

¹⁵ ŋa mnanata: « Wya ka Yifta: Hlaghu a la Israʼila ta haɗika Muwav, dər haɗika la Ghamuŋ wa.

¹⁶ Nziya nza tsi, ma fitika safa la Israʼila ma Masar ná, ta mtak ta mtak tsughwaɗaghata həŋ ha da drəfa Zaŋwafi, ka ɓhadaghata da Kades.

¹⁷ Ka ghunaftá la Israʼila ta gwal ghunay da mghama Idum nda mnay kazlay na: “Vlaŋna vla ta tvi ka laba ŋni nda ma haɗika gha,” kəʼa. Ama ka kwalaghutá mghama la Idum. Ka ghunaftá həŋ guli da mghama Muwav, ka kwalaghutá tsaya guli. Mantsa tama, ka nzatá la Israʼila ma Kades.

¹⁸ Ka mbaɗ həŋ ta mbaɗa ma mtak, ka tsanaghatá warawara ta haɗika Idum nda haɗika Muwav, ka ɓhadaghatá həŋ nda təv safa fitik ta haɗika la Muwav. Ka fatá həŋ ta ghuɓa taŋ ta ɓla Arnuŋ, lam a həŋ da haɗika Muwav wu, kabga Arnuŋ ná, mukuma nda la Muwav ya.

¹⁹ Ka ghunaftá la Israʼila ta gwal ghunay da Sihuŋ, da mghama la Amuru ta ga mgham ma Hesbuŋ. Ka la Israʼila nda tsi mantsa: “Vlaŋna vla ta tvi, kdəkkdək ka laba ŋni nda ma haɗika gha, ha ŋa laghwa ŋni da vli ya ta dzaʼa ŋni,” ka həŋ.

²⁰ Ama sləgadanaghu a tsa laba la Israʼila nda ma haɗika ni ya ta Sihuŋ wa. Ka tskanatá tsi ta inda mnduha ni. Ka fatá tsi ta ghuɓa ni ma Yahtsa. Ka vulu tsi ta vulu nda la Israʼila.

²¹ Ka vlatá Yawe, Lazglafta la Israʼila ta Sihuŋ nda inda mnduha ni tani ma dzva la Israʼila, ka zatá həŋ ta ghwa ta ghəŋ taŋ. Ka klaghutá la Israʼila ŋa taŋ ta inda haɗika la Amuru ta nzakw ma tsa haɗik ya.

²² Ka hlaghutá həŋ ta inda kwakwara la Amuru, sliʼafta ni daga ma Arnuŋ ha da Yabuk, daga ma mtak ha da Yardeŋ.

²³ Yawe, Lazglafta la Israʼila ta ghəzlaftá la Amuru ta kəma mnduha ni, la Israʼila. Ndanana ta kumay kagha ta klaghuta da aŋni ka ŋa gha ta haɗika taŋ ra?

²⁴ Haɗ kagha ta ŋanatá ya vlagha Kəmus, lazglafta gha, ka ŋa gha wu ra? Haɗ aŋni dzaʼa klaghuta ka ŋa ŋni guli ta ya vlaŋna Yawe, Lazglafta ŋni ta kəma ŋni, ka laviŋta ŋni ta klaghuta ŋa ŋa ŋni wu ra?

²⁵ Mal kagha ka Balak, zwaŋa Tsipur, mghama la Muwav ra? Zlurgaŋ a ta la Israʼila wu kiʼe? Vulaŋ a ta vulu nda həŋ wu kiʼe?

²⁶ Wya mahkən dərməka (300) vakwa la Israʼila na ta nzakw ma Hesbuŋ, nda ya ma Gharugher nda vliha ta wanafta həŋ, nda ya ma luwaha ta wa zala Arnuŋ. Kabgawu kwal kuni hləglaghuta daga ma tsa fitikha ya na?

²⁷ Iʼi taɗa, haɗ dmaku gagha yu wu, ama kagha yeya ta magihatá ghwaɗaka skwi nda ma vulu nda iʼi. Ka nza Yawe ta tsa guma, ka mnda tsa guma mataba i la Israʼila nda la Ghamuŋ! » kaʼa.

²⁸ Ama fa a mghama la Ghamuŋ ta sləməŋ ka sna tsa gwaɗaha mnana Yifta ya wa.

Skwi waɗa Yifta

²⁹ Ka saha Sulkuma Yawe ta ghəŋa Yifta, ka lab tsi nda ma kwakwara Gilghat nda ŋa Mənase. Tahula tsa, ka lab tsi nda ma Mitspe Gilghat, ka sliʼafta ma Mitspe Gilghat, ka tsughwaɗadamtá da la Ghamuŋ.

³⁰ Ka waɗanatá Yifta ta Yawe, kaʼa mantsa: « Kahwathwata ka vliha vla ka ta la Ghamuŋ ma dzva ɗa katsi,

³¹ taŋtaŋa mndu ya dzaʼa sabi ma həga ga ini da tsuʼa iʼi ya, dzaʼa nzakway ŋa Yawe. Ma vrakta dzaʼa vrakta yu ləŋləŋ nda zata ghwa ta ghəŋa la Ghamuŋ ya, dzaʼa vlagha vla yu ka skwa pla ghəŋ ŋa dray tsuh tsuh, » kaʼa.

³² Ka lam Yifta da vulu nda la Ghamuŋ, ka vlatá Yawe ta həŋ ma dzva ni.

³³ Ka zatá tsi ta ghwa ta ghəŋa luwaha hisambsak ka pslatá həŋ daga ma Gharugher ta tva lami da Minit, ha da Avelkəramim. Ka nzakw tsi ka skwa taw katakata, ka sku la Ghamuŋ ta htsiŋ da la Israʼila.

³⁴ Ka vraghatá Yifta dzagha ni ma Mitspa, ka sab makwa ni da tsuʼay nda skalu, ka fa laha nda dza zwaŋa tim. Tsatsi turtuktuk zwaŋa ni. Haɗ sana zwaŋa ni ta ghəŋa tsaya wa.

³⁵ Na gi nghay ni, ka kwahiŋtá tsi ta lgutha ni, kaʼa mantsa: « Kay! Makwa ɗa, ká ŋa gha kəʼa nda iʼi! Tekw kagha mataba gwal ta kəɓa iʼi. Waɗana waɗa yu ta waɗu ta Yawe, lavgliŋ a yu ta vru nda hul wu, » kaʼa.

³⁶ Ama ka tsa makwa ya nda tsi mantsa: « Da ɗa, ka si waɗana waɗa ka ta waɗu ta Yawe, maga nda iʼi manda skwi ya ta sabi ma wa gha, ya wya planam pla Yawe ta ghumaha gha la Ghamuŋ ya, » kaʼa.

³⁷ Kaʼa nda da ni guli mantsa: « Tsuʼaɗif tsuʼa ta ɗaway ɗa. Zliɗiŋ zla ta tili his, ka dzaʼa yu nda magraha da ra vli ta ghwáha, ka tawtá ghəŋa dzaʼa ɗa mtuta ta kul lagha yu da mndu, » kaʼa.

³⁸ Kaʼa nda tsi mantsa: « La! » Ka zlanatá tsi, ka laghwi tsi ka tili his. Ka laghu tsi nda magraha ni, ka taw ta ghwáha, ta ghəŋa dzaʼa ni mtuta ta kul lagha da mndu.

³⁹ Magatá tili his, ka vraktá tsi da da ni, ka hɗamtá tsi nda tsa makwa ya ta skwi ya waɗa tsi. Lagha a tsa makwa ya da mndu wa. Ka nzakw tsaya ka skwa havay ŋa ɗekɗek da la Israʼila.

⁴⁰ Inda vaku, ta laghu la kwagha la Israʼila da zatá fitik fwaɗ ta taw ŋa hava makwa Yifta, mnda la Gilghat.