Gwal tsa guma 10 - Hdi

Nzakwa Tula ka mnda tsa guma

¹ Tahula mtuta Avimelek, ka zlagaptá Tula zwaŋa Puʼa, zigha Dudu ma mndəra la Yisakar ŋa katagaptá la Israʼila. Ma Samir ma kwakwar ta ghwá Ifrayim ta nzakwa tsi.

² Ka nzakw tsi ka mnda tsa guma da la Israʼila ka vaku hisambsak hkən mida, ka mtutá tsi, ka paɗamtá lu ma Samir.

Nzakwa Yaʼir ka mnda tsa guma

³ Tahula Tula, ka zlagaptá Yaʼir mnda la Gilghat tsa guma ta ghəŋa la Israʼila ha ka vaku hisambsak his mida.

⁴ Hkən mbsak zwana ni ta ŋla kəɗihha hkən mbsak guli. Hkən mbsak luwaha taŋ ta kwakwara Gilghat. Ha gita guli, luwaha Yaʼir ta hga lu ta tsa vliha ya.

⁵ Ka mtutá Yaʼir, ka lamtá lu ma Kamuŋ.

Vula la Amuru nda la Israʼila

⁶ Ka zlrəglaftá la Israʼila ta maga ghwaɗaka skwi ta wa ira Yawe. Ka tsəlɓu həŋ ta tsəlɓu ŋa Baghalha nda Ghasturetha lazglaftaha la Aram, nda la Tsiduŋ, nda la Muwav, nda la Ghamuŋ, nda la Filisti. Ka zlanavatá həŋ ta Yawe, ka kwalaghutá tsəlɓu ŋa ni.

⁷ Ka gufaftá ŋuɗufa Yawe ta ghəŋa la Israʼila. Ka vlatá tsi ta həŋ ma dzva la Filisti, nda la Ghamuŋ.

⁸ Daga ta tsa vaku ya, ka dul həŋ ta la Israʼila, ka huʼa vgha ŋa taŋ. Ghwaŋpəɗ tghas vakwa taŋ ta sa duni ŋa inda la Israʼila ta nzakway ta sana ɓla Yardeŋ ta haɗika la Amuru, nda la Gilghat.

⁹ Ka tsughwaɗaptá la Ghamuŋ ta Yardeŋ guli ŋa dzaʼa da vulu nda la Yuda, nda la Biŋyamiŋ, nda ya nda guyatá ghəŋa la Ifrayim. Ka fərtuta ghuya ɗaŋwa la Israʼila.

¹⁰ Ka wahu la Israʼila ta wahu da Yawe, ka həŋ mantsa: « Gagha ga ŋni ta dmaku, kabga zlanava zla ŋni ta Lazglafta ŋni, ka laghwi da tsəlɓanatá tsəlɓu ta Baghalha, » ka həŋ.

¹¹ Ka Yawe nda la Israʼila mantsa: « Ma gay la Masar, nda la Amuru, nda la Ghamuŋ, nda la Filisti tiri ŋa ghuni ná, si katagaghunap a yu ra?

¹² Ma ghuyay la Tsiduŋ, nda la Ghamalek, nda la Maghuŋ ta ɗaŋwa ŋa ghuni, ka wahu kuni ta wahu da iʼi ná, si katagaghunap a yu ma dzva taŋ wu ra?

¹³ Ama kaghuni, ka zlaɗivatá kuni, ka laghu kuni tsəlɓanatá tsəlɓu ta sanlaha ma lazglaftaha. Tsaya tama, haɗ yu dzaʼa katəgəltá kaghuni wa.

¹⁴ Lawa la! Wahawa waha ta wahu da tsa lazglaftaha zabap kuni ya. Ka kata həŋ ta kaghuni ma fitika ghuya ɗaŋwa ghuni! » kaʼa.

¹⁵ Ka la Israʼila nda Yawe mantsa: « Gaga ŋni ta dmaku. Maga ta skwi ŋa ŋni manda ya ta zɗəgaghata, ama katap kata ta aŋni gita! » ka həŋ.

¹⁶ Ka hlíŋtá həŋ ta tsa sanlaha ma lazglaftaha mataba taŋ ya, ka tsəlɓu həŋ ta tsəlɓu ŋa Yawe. Ka suʼuftá ŋuɗufa ni ta ghəŋa tsa ghuya ɗaŋwa ta ghuy la Israʼila ya.

¹⁷ Ka tskavatá la Ghamuŋ, ka fatá həŋ ta ghuɓa taŋ ma Gilghat. Ka tskavatá la Israʼila guli, ka fatá ŋa taŋ ghuɓu ma Mitspa.

¹⁸ Ka maliha la Gilghat mataba taŋ mantsa: « Tiŋəl wa dzaʼa laha da ghwa da zlraftá vulu nda la Ghamuŋ na? Tsa mndu ya dzaʼa nzakway ka mali ta ghəŋa inda la Gilghat, » ka həŋ.