Gwal tsa guma 1 - Hdi

Nzata la Israʼila ma Kanʼana

¹ Tahula mtuta Yəhusuwa, ka ɗawaŋtá la Israʼila da Yawe, ka həŋ mantsa: « Tiŋəl la wa mataba ŋni dzaʼa lafi da gəmata nda vulu nda la Kanʼana na? » ka həŋ.

² Ka Yawe mantsa: « Tiŋəl la Yuda dzaʼa lafi. Wana yu ta vlatá tsa haɗik ya ma dzva taŋ, » kaʼa.

³ Ka la Yuda nda zwana ma taŋ la Simghuŋ mantsa: « Ŋlawa mista ŋni da vulu ŋa zaktá kwakwar ya vlaŋna lu nda ma vza vindima, ka zakta mu ta la Kanʼana. Tahula tsa ŋa dzaʼa ŋni mista ghuni da zaktá kwakwar vlaghuna lu, » ka həŋ. Ka lab la Simghuŋ mista taŋ.

⁴ Ka laf la Yuda, ka vlatá Yawe ta la Kanʼana, nda la Periz ma dzva taŋ. Ka pslatá həŋ mataba taŋ ta mnduha dəmbuʼ ghwaŋ (10.000) ma Bezek.

⁵ Hada ma Bezek, ka slanaghatá həŋ ta mgham Adunibezek, ka liŋtá həŋ nda vulu, ka zatá həŋ ta la Kanʼana nda la Periz.

⁶ Ka hwayaghutá Adunibezek, ama ka hwayiŋtá həŋ, ka ksaftá həŋ, ka ɗatsaghutá həŋ ta dadana dzvuha ni nda səlaha ni.

⁷ Ka Adunibezek mantsa: « Mamu si mghamha ndəfáŋ mbsak ɗatsaghu lu ta dadana dzvuha taŋ, nda səlaha taŋ, si ta tska wiwsa skwi mista tabəla ɗa. Skwi maga yu plaɗim Lazglafta, » kaʼa. Ka klaghatá lu da Ursalima, hada, ka mtuta tsi.

⁸ Ka liŋtá la Yuda ta Ursalima nda vulu, ka klaghutá həŋ. Ka rwanatá həŋ ta mnduha nda kafay, ka driŋtá tsa luwa ya.

⁹ Tahula tsa, ka laha la Yuda da vulu nda la Kanʼana ta ghwá, ma kwakwar ma Negev, nda kwakwarha ta kuɗuŋur.

¹⁰ Ka liŋtá la Yuda ta la Kanʼana ta nzakw ma Hevruŋ, ta hgə lu ghalya ka Kiriyatʼarba, ka pslatá həŋ ta i Sesay, nda Ahimaŋ, nda Talmay.

¹¹ Ka sliʼaftá həŋ hada, ka laghwi da liŋta guk nda vulu ta la Dəvir, luwa ta hgə lu ghalya ka Kiriyatʼsefer.

¹² Ka Kalep mantsa: « Mndu dzaʼa zatá Kiriyatʼsefer, ka klaghuta ná, dzaʼa vlaŋ vla yu ta makwa ɗa Ghahsa ŋa nzakwa ni ka markwa taŋ, » kaʼa.

¹³ Ka zatá Ghutniʼel, zwaŋa Kənaz, sagəŋa Kalep ta tsa luwa ya. Ka klaftá Kalep ta tsa makwa ni Ghahsa ya ka vlaŋta ka markwa taŋ.

¹⁴ Manda lagha Ghahsa da Ghutniʼel, kaʼa nda tsi mantsa: « Kdəkkdək zəʼala ɗa, ɗawa ta vwah da da ɗa, » kaʼa. Tahula tsa ka saha tsi ta kəɗiha ni. Ka Kalep nda tsi mantsa: « Nahgani ya ta kum ka na? » kaʼa nda tsi.

¹⁵ Ka makwa ni nda tsi mantsa: « Zɗəɗiŋ zɗa ta huɗi. Ya wya vliha vla ka ta vwah ma Negev kul haɗ imi mida ya, vliha vla guli ta dzuɓayha, » kaʼa. Ka vlaŋtá Kalep ta dzuɓayha nda ta ghəŋ, nda ya nda ma mndər.

¹⁶ Ka sliʼaftá la Keŋ, mndəra la dzidza Musa, ka lafi kawadaga nda la Yuda daga ma Yeriku ta nzakway ka luwa zlizlamha, ha ta mtaka Yuda, ma Negev ndusa nda Gharat. Ka lagha həŋ nzata mataba tsa mnduha ya.

¹⁷ Ka sliʼaftá la Yuda kawadaga nda la Simghuŋ, zwana ma taŋ, ka zatá həŋ ta la Kanʼana ta nzakw ma Tsəfat. Ka zaɗanatá həŋ nekw nekw ta tsa luwa ya, ka hgu lu ka Hurma, tsaya zaɗaku.

¹⁸ Ka klaghutá la Yuda ta Ghaza nda kwakwara ni tani, nda Askəluŋ nda kwakwara ni tani, nda Ghekruŋ nda kwakwara ni tani.

¹⁹ Ka nzatá Yawe kawadaga nda la Yuda. Ka hlaghutá həŋ ta vliha ta ghwá, ama ka traptá həŋ ta ghəzlaftá mnduha ma daɓi, kabga mamu hahəŋ nda mwataha plis ka kfur ka kfur.

²⁰ Ka vlaŋtá lu ta Hevruŋ ta Kalep, manda ya mna Musa. Ka ghəzlaftá tsi ta mndəra zwana Ghanak hkən ma tsa luwa ya.

²¹ Ama ka traptá la Biŋyamiŋ ta ghəzlaftá la Yəbus ta nzakw ma Ursalima ya. Ka nzatá tsaha ya ha gita ma Ursalima kawadaga nda la Biŋyamiŋ.

²² Ka laf mndəra la Yusufu guli da liŋtá Betel nda vulu, ka nzatá Yawe kawadaga nda həŋ.

²³ Ka ghunaftá la Yusufu karaku ta mnduha da vitsaptá Betel. Luz si ta hga lu ta tsa luwa ya ghalya.

²⁴ Ka nghaŋtá tsa gwal vitsaptá luwa ya ta sana mndu ta sab ma luwa. Ka həŋ nda tsi mantsa: « Maraŋna mara ta tvi ŋa lama ŋni da na luwa na, dzaʼa maga gha maga ŋni ta zɗaku, » ka həŋ.

²⁵ Ka maranatá tsi ta həŋ ta tvi ŋa lama taŋ da tsa luwa ya. Ka rwanatá həŋ nda kafay ta gwal ma tsa luwa ya, ama ka zliŋtá həŋ nda hafu ta tsa mndu ya nda inda gwal ta uʼa ni tani.

²⁶ Ka sliʼaftá tsa mndu ya ka laghwi ta haɗika la Het. Ka baftá tsi ta luwa ni hada, ka hgə tsi ka Luz. Tsaya hga ni ha gita.

²⁷ Ka traptá la Mənase ta ghəzlaftá la Betseʼaŋ, nda la Taghnak, nda la Dur, nda la Yivlegham, nda la Məgidu, nda luwaha ya ta wawanaftá həŋ. Ka nzata la Kanʼana ka mbraku ma tsa haɗik ya.

²⁸ Mutsafta la Israʼila ta mbraku tama, ka pghatá həŋ ta la Kanʼana ka vuʼa taŋ, ama ghəzlaf a həŋ ta həŋ demdem wa.

²⁹ Ka traptá la Ifrayim ta ghəzlaftá la Kanʼana ta nzakw ma Gezer, ama ka gɗavata tsa la Kanʼana ya ta nzakw hada mataba taŋ ma Gezer.

³⁰ Ka traptá la Zəvuluŋ ta ghəzlaftá la Kanʼana ta nzakw ma Kitruŋ, nda gwal ma Nahalul. Ka nzakw la Kanʼana mataba la Zəvuluŋ, ama ka níŋtá həŋ ta həŋ ka vuʼa taŋ.

³¹ Ka traptá la Aser ta ghəzlaftá gwal ta nzakw ma Ghaku, nda gwal ma Tsiduŋ, nda gwal ma Ahlav, nda gwal ma Ahziv, nda gwal ma Helba, nda gwal ma Afik, nda gwal ma Rehuv.

³² Ka nzatá la Aser mataba la Kanʼana ta nzakw ma tsa haɗik ya, kabga ghəzlaf a həŋ ta həŋ wa.

³³ Ka traptá la Naftali ta ghəzlaftá la Betʼsemes, nda la Betghanat. Ka nzatá həŋ mataba la Kanʼana ta nzakw ma tsa haɗik ya, ama ka níŋtá həŋ ta la Betʼsemes, nda la Betghanat ka vuʼa taŋ.

³⁴ Ka mbəɗadanaftá la Amuru ta mndəra la Daŋ ta kwakwar ta ghwá. Zlana a həŋ ta həŋ ŋa saha da daɓi wa.

³⁵ Ka gɗavatá la Amuru ma Harheres, nda ya ma Ayaluŋ, nda ya ma Saghalvim, ama manda mutsafta mndəra la Yusufu ta mbraku, mbaɗa kəʼa ka ga mgham ta ghəŋa taŋ, ka níŋtá həŋ ka vuʼa taŋ.

³⁶ Kuraghwa kwakwara la Amuru ná, sliʼafta ni ta ŋla vli ma zlərɗa Rdaha, daga ma Sela ka lafa ni.