2Sam 8 - Hdi

Zata Dawuda ta mndəra mnduha ndusa ndusa

¹ Tahula tsa, ka zatá Dawuda ta ghwa ta ghəŋa la Filisti ka ŋursanatá həŋ. Ka hlaghutá Dawuda ta mghama wudəma luwa la Filisti.

² Ka zatá tsi guli ta ghwa ta ghəŋa la Muwav. Ka hananatá həŋ ta haɗik, ka garaftá tsi ta dzatá vgha taŋ nda tɓaŋ. Tɓaŋ his ya, ŋa pslatá həŋ, tɓaŋ turtuk ya ŋa zlanatá həŋ nda hafu. Ka nzakw la Muwav ka vuʼa mista Dawuda ka pla dzumna ŋa ni.

³ Ka zatá Dawuda guli ta ghwa ta ghəŋa Hadadghezer, zwaŋa Rehuv, mghama Tsuva, ma fitika lagha ni da nzəglanaghatá kwakwara zala Yufratis.

⁴ Ka hlugudunustá Dawuda ta gwal ta ŋla plis dəmbuʼ nda ndəfáŋ dərmək (1.700), nda gwal vulu dəmbuʼ hisambsak (20.000). Ka ratsiŋtá tsi ta dzalakwa plisha ta tɗa mwata plis demdem, ka pɗanatá tsi ta həŋ dərmək (100) kweŋkweŋ.

⁵ Ka sliʼadaghatá la Aram ma Damas da katá Hadadghezer, mghama Tsuva. Ama ka rwanatá Dawuda ta mnduha dəmbuʼ hisambsak his mida (22.000) mataba taŋ.

⁶ Ka pghanamtá tsi ta guvnaha ta la Aram ma Damas. Ka vraganatá la Aram ta ghəŋ mista Dawuda ka pla dzumna ŋa ni. Ta vlaŋ vla Yawe ta zatá ghwa ta Dawuda dər lagha da vli ga tsi.

⁷ Ka hlaghutá Dawuda ta ghwadziha ka dasu ta hlə sludziha Hadadghezer, ka hlaghata da Ursalima.

⁸ Ka hlagaghutá mgham Dawuda guli ta ghuva tili ŋulum katakata ma luwa Beta nda Berutay, luwaha Hadadghezer.

⁹ Ka snaŋtá Tughi, mghama Hamat kazlay na, za za Dawuda ta ghwa ta ghəŋa inda gwal vula Hadadghezer kəʼa.

¹⁰ Ka ghunaftá Tughi ta zwaŋa ni Yuram da mgham Dawuda ŋa ganaghatá zgu, nda ya ŋa rfanaghata ta ghəŋa laba ni vulu nda Hadadghezer ka zatá tsi ta ghwa, kabga ghuma Tughi na Hadadghezer. Ka hlədanaghatá Yuram ta Dawuda ta huzla ka dasu, nda ya ka kfura tsedi, nda ya ka ghuva tili.

¹¹ Ka pghanatá mgham Dawuda ta tsaha ya guli ta Yawe, manda ya pghana tsi ta kfura tsedi, nda dasu ya hlagaghutá tsi da inda mndəra mnduha ya za tsi ta ghwa ta ghəŋa taŋ,

¹² da la Idum, nda la Muwav, nda la Ghamuŋ, nda la Filisti, nda la Ghamalek, nda skwiha zləɗa tsi da Hadadghezer, zwaŋa Rehuv, mghama Tsuva.

¹³ Manda vrakta Dawuda ta zatá ghwa ta ghəŋa la Idum dəmbuʼ ghwaŋpəɗ tghas (18.000) ma didiŋa Slughul, ka sgavaghata laghwa hga ni da zərwa.

¹⁴ Ka fafatá Dawuda ta guvnaha ma Idum. Ma inda Idum fafata tsi ta guvnaha. Ka nutá inda la Idum ka vuʼa Dawuda. Ta vlaŋ vla Yawe ta zatá ghwa ta Dawuda ma inda vli ta lagha tsi.

Gwal ksanatá slna ta Dawuda

¹⁵ Ka gə Dawuda ta mgham ta ghəŋa inda la Israʼila. Ka tsanatá tsi ta guma nda ra, tɗukwa ta inda mnduha ni.

¹⁶ Yuʼav, zwaŋa Tseruya mali ta ghəŋa gwal vulu. Yəhusafat, zwaŋa Ahilut ka mnda tskanatá ɗelewera gwaɗa ga mgham.

¹⁷ I Tsaduk, zwaŋa Ahituv, nda Ahimelek, zwaŋa Aviyatar gwal dra skwi ŋa Lazglafta. Səraya mnda vindi.

¹⁸ Benaya, zwaŋa Yəhuyada, mali ta ghəŋa la Kəret nda la Pəlet. Zwana Dawuda gwal dra skwi ŋa Lazglafta.