2Sam 7 - Hdi

Imi tanaf Lazglafta ta sləməŋ ta Dawuda

¹ Lama mgham Dawuda nzata ma həga gá mghama ni, vlaŋ vla Yawe ta nzakw ləŋləŋ nda ma katagapta ni da inda ghumaha ni ya ta wanafta,

² kaʼa nda anabi Nataŋ mantsa: « Ngha ɓa! Ma həga udza sedra nzamta yu, ama ma tumpula patak nzamta akwata Lazglafta, » kaʼa.

³ Ka Nataŋ nda mgham mantsa: « La ka dzaʼa ka da maga inda skwi ya ndanaŋ ka ma ghəŋa gha, kabga kawadaga Yawe nda kagha, » kaʼa.

⁴ Ama ga rviɗik baɗ va tsaya, ka gwaɗganatá Yawe ta Nataŋ, kaʼa mantsa:

⁵ « La da mnanatá kwalva ɗa Dawuda: “Ka Yawe na: Kagha dzaʼa baɗiftá həga ŋa nzakwa ɗa ra?

⁶ Ta nzam a yu ma həga daga baɗ hlagapta ɗa ta la Israʼila ma Masar ha ka sagha ta gita wa. Ta waway yu ta wawakwa ɗa, ma tumpul vla nzakwa ɗa.

⁷ Ma inda tsa fitik pghaf yu ta la Israʼila ya ná, walaŋ a yu ta mnanatá ya dər turtuk ma maliha ma mndəra la Israʼila ya mnanaf yu ta nghapta ka mnduha ɗa kazlay na: Kabgawu kwal kuni baɗiftá həga nda udza sedra na? kəʼa wa.”

⁸ Ndanana tama, mnana mna ta kwalva ɗa Dawuda: Wya ka Yawe mghama gwal vulu mnata: Iʼi ta klagaghutá kagha ta ngha rini ma mtak, mista tuwakha, ŋa nzakwa gha ka mali ta ghəŋa mnduha ɗa, la Israʼila.

⁹ Nza nza yu kawadaga nda kagha ma inda vli mbaɗ ka ta mbaɗa, ka zaɗanatá yu ta inda ghumaha gha ta kəma gha. Dzaʼa kapanaf kapa yu ta hga gha manda ŋa gwal dagaladagala ta ghəŋa haɗik.

¹⁰ Dzaʼa zbanaf zba yu ta vla nzaku ta mnduha ɗa la Israʼila, vli dzaʼa dihanata yu ta həŋ ŋa nzakwa taŋ hada, ŋa kwala zləŋ ksaŋtá həŋ ɗekɗek. Haɗ ghwaɗaka mnduha dzaʼa lagha ghuya ɗaŋwa ŋa taŋ manda ya ghalya,

¹¹ ta fitika pghanaghata ɗa ta gwal tsa guma ta ghəŋa mnduha ɗa la Israʼila ya wa. Dzaʼa vlagha vla yu ta nzata ləŋləŋ nda ma kataghata dzaʼa katagha yu da inda ghumaha gha. “Ta mna gha mna iʼi Yawe kazlay na: Dzaʼa vlagha vla yu ta zivir ŋa ga mgham, kəʼa.

¹² Tahula hɗamta fitika gha, laghu la ka da dzidzíha gha ya, dzaʼa zlaganap zlaga yu ta mndu turtuk mataba zivirha gha, ya dzaʼa sabi ma kagha. Dzaʼa dihana diha yu dar ta ga mghama ni.

¹³ Tsatsi dzaʼa baɗiftá həga nda hga ɗa, ŋa sladanafta ɗa ŋa ɗekɗek ta dughurukwa ga mghama ni.

¹⁴ Dzaʼa nzakway yu ka da ka ŋa ni, ta nzatá tsatsi guli ka zwaŋ ka ŋa ɗa. Ka maga maga tsi ta ghwaɗaka skwi, dzaʼa klaf kla yu ta mnduha ŋa zlahay, ŋa nzakwa mnda səla ka saraka zlahay.

¹⁵ Ama haɗ yu dzaʼa klaghutá zɗakwa ɗa da tsi, manda ya klaghu yu da Sawulu kliŋ yu ka tsaghaŋtá vli ya wa.

¹⁶ Dzaʼa ŋana ŋa mndu turtuk ma zivira gha ta gá mghama gha ŋa ɗekɗek tahula gha. Dzaʼa dihava diha dughurukwa gá mghama gha ŋa ɗekɗek,” » kaʼa.

¹⁷ Mantsa ya ka Nataŋ mnanatá inda tsa gwaɗaha ya, nda inda tsa skwiha manda skwi ma suni ya ta Dawuda.

Duʼa Dawuda

¹⁸ Ka lagha mgham Dawuda nzata ta kəma Yawe, kaʼa mantsa: « Wa iʼi ni mghama ɗa Yawe, wa la ga ini ha ŋa ɓhagaɗighata gha da na vli mida yu na na?

¹⁹ Tsaw ta nda hta na maga ka na ta wa ira gha rki ní, a mghama ɗa Yawe, ta wana ka ta mna gwaɗa ta la ga kwalva gha guli, ya kəʼa dzaʼa nzakway dazlay. Manda tsaya ta maga kagha nda mnda səla a mghama ɗa Yawe!

²⁰ Nahgani ta dzaʼa mnəglaghata iʼi Dawuda, wya nda sna kagha ta kwalva gha ní, mghama ɗa Yawe!

²¹ Dabga tatá imi taf ka ta sləməŋ, manda va ya ndanaŋ ka hɗanamta ka ta inda tsa skwiha dagaladagala ya, ka maranaŋtá ka ta kwalva gha.

²² Dagala kagha mghama ɗa Yawe! Haɗ mndu taɓta kagha wa! Kahwathwata haɗ sana Lazglafta ta ghəŋa kagha, manda ya ta gɗata ŋni ta snaŋta wa!

²³ Mamu sana mndəra mndu dər turtuk ta ghəŋa haɗik manda mnduha gha, la Israʼila ra? Ar Lazglafta, sasa ka da varatá həŋ ŋa nzakwa taŋ ka mnduha gha, ŋa tsaftá hga gha, ŋa hɗamtá skwiha ta raghata, nda skwiha ta raŋtá haɗika gha, ka makwitkwit nda mandərmimiha, ka ghazliŋtá ka ta kəma mnduha gha varagap ka ma haɗika Masar ta mndəra sanlaha ma mnduha nda lazglaftaha taŋ.

²⁴ Ka dihanatá ka ta mnduha gha la Israʼila ŋa nzakwa taŋ ka mnduha gha ŋa ɗekɗek, ta nzatá kagha Yawe guli ka Lazglafta taŋ.

²⁵ Ndanana tama Yawe, Lazglafta, hɗam hɗa ŋa ɗekɗek ta gwaɗa ya mna ka ta ghəŋa kwalva gha nda ya ta ghəŋa la ga taŋ, ka maga ka manda ya mna ka.

²⁶ Ka ŋla hga gha ŋa ɗekɗek, ka mna dər wati ma mndu kazlay: “Yawe mghama gwal vulu, na Lazglafta la Israʼila kəʼa.” Ka nza la ga kwalva gha Dawuda nda diha ta kəma gha!

²⁷ Vərɗa kagha Yawe mghama gwal vulu, Lazglafta la Israʼila ta maravata da kwalva gha kazlay na: “Iʼi dzaʼa banaftá həga,” kəʼa. Tsaya kəl kwalva gha ka mutsaftá ufata vgha ŋa maga na duʼa na da kagha.

²⁸ Ndanana mgham Yawe, kagha Lazglafta! Kahwathwata gwaɗa gha, ka tanaftá ka ta imi ta sləməŋ ta kwalva gha ŋa ŋatsa tsa zɗaku ya.

²⁹ Ndanana, ka zɗəgagha zɗa tsi, tfanagha tfa ta wi ta zivirha kwalva gha kada gɗavata tsi ŋa ɗekɗek ta kəma gha! Kagha, mgham Yawe ta mnata, əŋkaʼ a ka tfa wa gha, dzaʼa kəl ga mghama kwalva gha ka nzakway nda tfatá wi ŋa ɗekɗek ha ma zivira ni, » kaʼa.