2Sam 6 - Hdi

Kurata Dawuda ta klakta akwata dzratá wi da Ursalima

¹ Ka tskəglanatá Dawuda ta inda bikwirha vulu ma Israʼila, dəmbuʼ hkən mbsak (30.000) həŋ.

² Ka sliʼaftá Dawuda kawadaga nda inda bakwa gwal vulu mista ni, ka laghwi da Baghaleyuda ŋa klagaftá akwata Lazglafta. Ta tsa akwati ya ta hga lu ta hga Yawe mghama gwal vulu, ta nzanaghata ta ghəŋa kerubaha ya.

³ Ka famtá həŋ ta tsa akwata Lazglafta ya ma lfiɗa mwata sla, ka klagaptá ma həga ga Avinadav ta kuɗuŋur ya. I Ghuza nda Ahyu, zwana Avinadav, ta kla tsa lfiɗa mwata sla ya.

⁴ Ka klagaghutá həŋ ma həga ga Avinadav ta kuɗuŋur. Ghuza ya, ta dzaʼa nda ta slərpa akwata Lazglafta tsatsi, ta mbaɗ Ahyu nda ta kəma ni.

⁵ Ka dzaʼa i Dawuda nda inda la Israʼila nda skalu ta kəma Yawe, ka dza inda mndərga huzla skalu magaf lu nda udza bərus, nda kəzliŋkəzliŋ, nda htimbil, nda dewdew, nda kwaleleŋ, nda ndeŋndeŋ.

⁶ Ɓhadaghata taŋ ta blikwa Nakuŋ, ka hədzikatá tsa akwata Lazglafta ya kabga tsəhiŋta skwi ta tsa slaha ya, ka fadaptá Ghuza ta dzvu ka ŋanata.

⁷ Ka gufaftá ŋuɗufa Yawe ta ghəŋa Ghuza, ka dzuŋtá Lazglafta hada hada, dabga krughuva ni. Ka mtutá Ghuza hada hada ta vata akwata Lazglafta.

⁸ Ka ɓasaftá Dawuda ta ŋuɗuf, kabga dzata Yawe ta Ghuza. Ha gita, Perets Ghuza ta hga lu ta tsa vli ya.

⁹ Ka zləŋaftá Dawuda ta Yawe katakata baɗ tsaya, kaʼa mantsa: « Waká akwata Yawe dzaʼa lagha da ini ɓa? » kaʼa.

¹⁰ Ka kwalaghutá Dawuda ta kladaghatá akwata Yawe da taŋ, ma luwa Dawuda. Ama ka faghutá tsi ma həga ga Ghuvetʼidum, mnda la Gat.

¹¹ Ka nzatá tsa akwata Yawe ya ga Ghuvetʼidum, mnda la Gat ka tili hkən. Ka tfanaghatá Yawe ta wi ta Ghuvetʼidum nda inda la ga taŋ.

Ɓhadaghata akwata dzratá wi da Ursalima

¹² Ka lagha lu mnanatá mgham Dawuda kazlay: « Waʼa tfanagha tfa Yawe ta wi ta Ghuvetʼidum nda inda skwa ni tani, dabga akwata Lazglafta kəʼa, » ka lu. Ka sliʼaftá Dawuda ka laha klagafta ma rfu da luwa Dawuda ta akwata Lazglafta ga Ghuvetʼidum.

¹³ Mbəɗapta tsa gwal ta kla tsa akwata Yawe ya ta səla mkuʼ ya ná, vlata Dawuda ka pla ghəŋ ta lghəŋ, nda ya nda sla nda uwasla.

¹⁴ Ka skal Dawuda ta skalu nda kɗavakta mbrakwa ni ta kəma Yawe nda suɗatá ifut ka liŋ.

¹⁵ Ka klagaftá i Dawuda nda inda guyatá ghəŋa la Israʼila ta akwata dzratá wa Yawe, ka dzaʼa nda hayayi, nda ya nda vya duli.

¹⁶ Ta lagha akwata dzratá wa Yawe da tsa luwa Dawuda ya ná, ka nghagapta Mihal, makwa Sawulu nda ta finitir. Ka nghaŋtá tsi ta mgham Dawuda ta skalu ka vavalaku ta kəma Yawe, ka hərtətatá tsi ma ŋuɗufa ni.

¹⁷ Ka ɓhadanaghatá lu ta akwata Yawe, ka fatá lu ma vla ni ma huɗa tumpul ya si dzugwa Dawuda ŋa tsa akwati ya. Ka vlatá Dawuda ta skwa pla ghəŋha ŋa dray tsuh tsuh, nda skwa pla ghəŋha zɗaku ta kəma Yawe.

¹⁸ Manda kɗiŋta Dawuda ta vlatá tsa pla ghəŋha ŋa dray tsuh tsuh ya, nda pla ghəŋha zɗaku ya, ka tfanaghatá tsi ta wi ta mnduha nda hga Yawe mghama gwal vulu.

¹⁹ Ka daganaftá tsi ta inda dəmga la Israʼila, nda zgwana tani, nda miʼaha tani ŋa inda mndu ta tumbura buradi, nda gatuʼa dibinaʼu, nda gatuʼa inabi. Ka vraghutá mnduha demdem, dər wati ma mndu dzagha ni.

²⁰ Ka vradaghatá Dawuda dzagha ni ŋa tfanaghatá wi ta la ga taŋ. Ka sab Mihal, makwa Sawulu da gmay, kaʼa mantsa: « Wati ma glaku na gita ŋa mghama la Israʼila ɓa! Pala pala ta vgha ni gita ka gwana mndər ta kəma kurɗuha kwalvaha ni, manda magakwa falayha! » kaʼa.

²¹ Ka Dawuda nda Mihal mantsa: « Ta kəma Yawe skala yu ta skalu! Tsatsi ta zbaftá iʼi ka malaghutá da gha nda inda gwal ga taŋ tani, tsatsi ta famta iʼi ka mgham ta ghəŋa la Israʼila mnduha Yawe. Dzaʼa kɗaŋ kɗa yu guli ta skalay ŋa vlaŋtá glaku ta Yawe.

²² Dzaʼa vragana vra yu ta ghəŋa ɗa ka malaghutá tsaya, dzaʼa hanagana hana yu ta ghəŋ iʼi ka ghəŋa ɗa, ama haɗ tsaya dzaʼa htanaghutá glakwa ɗa ta kəma kurɗuha ɗa mnə kagha ya wu, » kaʼa.

²³ Ta a Mihal, makwa Sawulu ta mndər, ha ka mtaghata ni wa.