2Sam 3 - Hdi

¹ Nzəɗava nzəɗa vulu mataba gwal mista la Sawulu nda gwal mista la Dawuda. Sgavagha nda sga mbrakwa Dawuda, ama htavaghu nda hta ŋa gwal mista la Sawulu.

Zwana Dawuda ta yayata ma Hevruŋ

² Yaya yaya Dawuda ta zwana zgwana ma Hevruŋ. Zumala ni ná, tsaya Amnuŋ, Ahinugham makwa la Yizrəghel ma ni.

³ Mahisa ni, tsaya Kilʼav, Abigayel, si markwa Naval mnda la Karmel ya ma ni. Mahkəna ni, tsaya Avsalum, Maghaha ma ni, makwa Talmay, mghama la Gesur.

⁴ Mafwaɗa ni, tsaya Aduniya, Hagit ma ni. Mahutafa ni, tsaya Səfatya, Avital ma ni.

⁵ Mamkuʼ a ni, tsaya Yitrəgham, Ghegla, sana markwa Dawuda ma ni. Tsaha ya zwana zgwana yaya Dawuda ma Hevruŋ.

Dzrafta Avner ta wi nda Dawuda

⁶ Ma fitika si vulay mnduha Sawulu ta vulu nda mnduha Dawuda, ka dihavatá Avner, ka dzaʼa mbrakwa ni ta kəma ta kəma mataba mnduha Sawulu.

⁷ Tsaw mamu markwa sanagha Sawulu, Ritspa hga ni, makwa Aya. Ka Isbuset nda Avner mantsa: « Kabgawu kəl ka ka hanata da markwa sanagha da ɗa na? » kaʼa.

⁸ Snaŋta Avner ta gwaɗa Isbuset, ka gufaftá ŋuɗufa ni katakata, kaʼa mantsa: « Kri yu ta maganatá slna ta la Yuda ra? Ha ka sagha ta gita, magana maga yu ta zɗaku ta həga ga da gha Sawulu, nda zwana ma ni tani, nda graha ni tani. Vla a yu ta kagha ma dzva Dawuda wu, ka dva ka ta iʼi ta gwaɗa ta krughuvi ta maguta nda tsa marakw ya?

⁹ Ka tsaɗigha tsa Lazglafta ta guma katakata, ka kataŋ a yu ta Dawuda ŋa mutsaftá skwi ya waɗana Yawe:

¹⁰ Kaʼa mnata na: “Dzaʼa klap kla yu ta ga mgham ga Sawulu ka vlaŋtá Dawuda, ka fatá dughurukwa ga mghama Dawuda ta ghəŋa la Israʼila nda ya ta ghəŋa la Yuda, daga ma Daŋ dikw da Bəʼerseva,” kaʼa » kaʼa.

¹¹ Walglaŋ a Isbuset ta psləglanaftá wi ta Avner wu, kabga ta zləŋay.

¹² Ka ghunaftá Avner ta gwal ghunay nda hga ni da Dawuda. Kaʼa mantsa: « Ŋa wa haɗik na? Dzraf dzra ta wi nda iʼi, dzaʼa highisha yu ta dzvu ŋa katsaktá ghəŋa inda la Israʼila dista gha, » kaʼa.

¹³ Ka Dawuda mantsa: « Aray! Dzaʼa dzraf dzra yu ta wi nda kagha. Ama mamu skwi turtuk ta ɗawaŋta yu da kagha. Yaha ka sagha da kəma ɗa kul klanakta ka nda markwa ini Mihal, makwa Sawulu ya, » kaʼa.

¹⁴ Ka ghunaftá Dawuda ta gwal ghunay da Isbuset, zwaŋa Sawulu, kaʼa mantsa: « Vraɗiva vra ta markwa ɗa Mihal, ya wuma yu nda fafaɗa la Filisti dərmək (100) ya, » kaʼa.

¹⁵ Ka ghunaftá Isbuset ta mnduha ŋa klagaghutá Mihal ga zəʼala taŋ Paltiʼel, zwaŋa Layis.

¹⁶ Ka dzaʼa zəʼala taŋ nda taw mista ni ha da Bahurim. Ka Avner nda tsi mantsa: « Laghu la gha, vra dzagha, » kaʼa. Ka vraghutá tsi dzagha ni.

¹⁷ Ka dzərkuvtá i Avner ta dzrəku nda galata mnduha la Israʼila, kaʼa nda həŋ mantsa: « Nda kɗa fitika ghuni ta kuma nzata Dawuda ka mgham.

¹⁸ Ndanana tama, nda maga fitika ni, kabga ka Yawe mnata ta ghəŋa Dawuda na: “Nda ma dzva kwalva ɗa Dawuda dzaʼa katafta yu ta mnduha ɗa la Israʼila ma dzva la Filisti nda ya ma dzva inda ghumaha ni,” kaʼa, » kaʼa.

¹⁹ Ka mananamtá Avner ma sləməŋ ma sləməŋ ta la Biŋyamiŋ guli. Ka lagha tsi da Hevruŋ mnanamtá Dawuda ma sləməŋ ma sləməŋ ta skwi ya kura la Israʼila nda inda la Biŋyamiŋ ta magay.

²⁰ Ka lagha Avner da Dawuda ma Hevruŋ kawadaga nda mnduha hisambsak, ka maganatá Dawuda ta skwa zay gagaʼ ta həŋ.

²¹ Ka Avner nda Dawuda mantsa: « Ta mblam ka hafa gha rvera ɗa! Ka la yu da tskagaghatá inda la Israʼila da rveri, mghama ɗa, ŋa dzrafta taŋ ta wi nda kagha, ŋa gay gha ta mgham ta ghəŋa taŋ ma inda vli ya ndanaŋ ka, » kaʼa. Ka zlanaŋtá Dawuda ta tvi ta Avner, ka laghu tsi ma zɗaku.

Dzata Yuʼav ta Avner

²² Ɓats nzəɗa, ka vragaghatá i Yuʼav nda sludziha Dawuda ta zləɗu, ka hlaganaghatá həŋ ta skwa zləɗu katakata. Ta haɗ Avner ga Dawuda ma Hevruŋ wu, kabga zliŋ zla Dawuda, ka laghu tsi ma zɗaku.

²³ Manda sagha Yuʼav kawadaga nda inda gwal vula ni, ka lagha lu mnanata kazlay na: « Si sagha sa Avner, zwaŋa Ner da mgham, ka zliŋtá mgham, ka laghu tsi ma zɗaku, » ka lu.

²⁴ Ka lagha Yuʼav slanaghatá mgham, kaʼa nda tsi mantsa: « Nahgani tsa maga ka na? Ka sagha Avner da kagha ná, ka zliŋta gha tsəɗek ra?

²⁵ Nda sna ka ta Avner, zwaŋa Ner ná, sagha da nanaftá kagha ŋa snaŋtá tva mbaɗa gha nda inda skwiha ya ta mag kagha tsatsi, » kaʼa.

²⁶ Ka sliʼaftá Yuʼav da Dawuda, ka ghunaftá tsi ta gwal ghunay zbiŋtá Avner. Ka slanaghatá həŋ ta wa vavrəm Sira, ka vranaktá həŋ ama sna a Dawuda wa.

²⁷ Vrakta Avner da Hevruŋ, ka tɗaghatá Yuʼav ta slərpa vli ma ləwa parawala tgha luwa, manda skwi ŋa dzərku. Hada, ka sliglatá tsi ta Avner ma huɗi ŋa plamtá dzata ni ta zwaŋama ni Ghasaʼel.

²⁸ Tahula tsa, ka snaŋtá Dawuda, kaʼa mantsa: « Haɗ dmakwa ɗa ɗekɗek ta kəma Yawe ta ghəŋa usa Avner, zwaŋa Ner wu, manda tsaya mnduha ma luwa ga mghama ɗa guli.

²⁹ Ka lanagha la tsa us ya ta ghəŋa Yuʼav nda la taŋ tani. Má ma ngwaya mndu ɗekɗek ma zivira ni ta ghuya ɗaŋwa mbəzakwa mndər, ka ghwaɗaka lku a tsi, ka mndu ta dzəgiɗi nda dafa a tsi, ka mndu ta kliŋta lu nda kafay a tsi, ka ta pɗa skwa zay a tsi, » kaʼa.

³⁰ Manda tsaya dzata i Yuʼav nda zwaŋama ni Avisay ta Avner, kabga dzata ni ta zwaŋama taŋ Ghasaʼel ma vulu ma Givghuŋ.

³¹ Ka Dawuda nda Yuʼav nda ya nda inda gwal kawadaga nda tsi mantsa: « Kwahiŋwa kwaha ta lgutha ghuni ka pghavata kuni ta buhu ka dzaʼa nda taw ta kəma Avner, » kaʼa. Ka mbaɗ mgham Dawuda ta mbaɗa mista gwal ta kla mbli.

³² Ka paɗamtá lu ta Avner ma Hevruŋ. Ka wah mgham Dawuda ta wahu ta kula Avner, ka taw inda mnduha ta taw.

³³ Ka faftá mgham ta laha ta tawa ghəŋ ta ghəŋa Avner, kaʼa mantsa: « Nda ra mtakwa Avner manda ŋa təkda ra?

³⁴ Habaghu a lu ta dzvuha gha wu, tsam nda tsa a lu ta səlaha gha ma ziɗa ghuva tili wa. Ka zləmbata gha manda ya ta zləmbata lu ta kəma ghwaɗaka mnduha ra? » kaʼa. Ka tawgəlta inda mnduha ta taw ta ghəŋa Avner.

³⁵ Ka sliʼadaghatá inda mnduha ta vata Dawuda da dzədzəɓay ŋa tsaʼata ni ta skwa zay ta kul dɗutá fitik. Ama ka waɗatá Dawuda kazlay na: « Ka tsaɗigha tsa Lazglafta ta guma katakata ka zaŋ za yu ta buradi ka dər mndəra wati skwa zay tsi ma kɗaku fitik ka dɗuta, » kaʼa.

³⁶ Nghanata inda mnduha ta skwi ta maguta ná, ka zɗəganatá tsi ta həŋ, manda ya ta zɗəganata inda skwi ta maganata mgham Dawuda ta həŋ tazlay.

³⁷ Baɗ va tsaya, ka snaŋtá inda sludziha nda inda la Israʼila tani kazlay na: Mgham a ta mnata dzatá Avner, zwaŋa Ner wu kəʼa.

³⁸ Ka mgham nda sludziha ni mantsa: « Sna a kaghuni kazlay na: Lu la mali, mndu dagala gita ma Israʼila kəʼa wu ra?

³⁹ Dər má fa fa lu ta iʼi ka mgham nda ma pghaɗighatá rɗi ná, nda rwa vgha ɗa. Tsa zwana Tseruya his ya ná, mbru mbra həŋ ka ŋa ɗa. Ka vranam vra Yawe da kəma ni taɓta sida ni ta mndu ya ta maga ghwaɗaka skwi! » kaʼa.