2Sam 24 - Hdi

Mnafta Dawuda ta vindaftá mbsaka la Israʼila

¹ Ka ɓasglaftá Yawe ta ŋuɗuf ta ghəŋa la Israʼila. Ka tiŋwaftá tsi ta Dawuda ŋa dika taŋ, kaʼa mantsa: « La ka mbəɗafta ka ta mbsaka la Israʼila nda la Yuda, » kaʼa.

² Ka mgham nda Yuʼav ka mala gwal vulu, kawadaga nda tsi ya mantsa: « Wya dzvu, la ranaftá inda mndəra la Israʼila daga ma Daŋ ha da Bəʼerseva. Ka vivindafta lu ta mbsaka mnduha, ka snaŋta yu ka kidaghi mndu, » kaʼa.

³ Ka Yuʼav nda mgham mantsa: « Má ka nanaf na Yawe, Lazglafta gha ta mnduha dərmək (100) səla ka malaghuta ndəghata ni, ka nghaŋta rveri, mghama ɗa nda ira ni! Ama kabgawu kəl rveri, mghama ɗa, ka kuma magata manda tsaya na? » kaʼa.

⁴ Ama ka ndiʼatá mgham ka ŋɗaŋɗa ta ghəŋa skwi mnaf tsi, nda i Yuʼav nda maliha gwal vulu. Ka sliʼaftá i Yuʼav nda maliha gwal vulu tama ta kəma mgham, ka laghwi ŋa dzaʼa vindaftá mbsaka la Israʼila.

⁵ Ka tsughwaɗaptá həŋ ta zala Yardeŋ, ka fatá həŋ ta ghuɓa taŋ ma Gharugher, nda ga zeghwa luwa ma zlərɗa Gat, ndusa nda Yaghzer.

⁶ Ka laghu həŋ da Gilghat nda ya ta haɗika Tatim Husi. Ka laghu həŋ da Daŋ Yaʼaŋ ka mbəɗaghatá vgha ta vata Tsiduŋ.

⁷ Ka laghu həŋ da Tir, luwa ya wam lu nda matsak huzlu, nda ya ma inda luwaha la Hiv nda la Kanʼana. Ka kɗiŋtá həŋ ma Negev da la Yuda ma Bəʼerseva.

⁸ Manda tsaya ka həŋ ranaftá inda tsa haɗik ya, ka vradaghatá həŋ da Ursalima tahula tili təmbay nda fitik hisambsak.

⁹ Ka vlaŋtá Yuʼav ta mgham ta mbsaka mnduha vivindaf lu: Dəmbuʼ tghas dərmək (800.000) ŋa la Israʼila, mnduha viɗviɗ prək ka vulu, dəmbuʼ hutaf dərmək (500.000) ŋa la Yuda.

¹⁰ Manda mbəɗafta Dawuda ta mbsaka mnduha, ka snə tsi ta babamakwa ŋuɗufa ni, kaʼa nda Yawe mantsa: « Gaga yu ta dmaku dagala ma magata ɗa ta tsa skwi ya. Ndanana, wya dzvu Yawe, plana pla ta krughuva kwalva gha, kabga ma ga təkda magata yu, » kaʼa.

¹¹ Ta sliʼavatá Dawuda ga sərɗək ná, nda ghada gwaɗganata Yawe ta anabi Gat, slayaŋa Dawuda,

¹² kaʼa mantsa: « La da mnanatá Dawuda: “Wya ka Yawe: Hkən skwiha ta pghaghata yu. Zbaʼa zba ta ya turtuk mataba taŋ, nda tsi dzaʼa dzughusta yu,” » kaʼa.

¹³ Ka lagha Gat da slanaghatá Dawuda, kaʼa nda tsi mantsa: « Nzata ma maya ka vaku ndəfáŋ ta kum ka ma haɗika gha re? Ari tili hkən ta hwaya da ghumaha ghuni ta ghəzla kagha re, ari fitik hkən nda zləmnda ta haɗika gha a na? Ndanap ndana ka nghadapta ka ta skwi dzaʼa yu zləghanaftá wi ta mndu ya ta ghuniɗikta, » kaʼa.

¹⁴ Ka Dawuda nda Gat mantsa: « Nda kəɓa yu katakata. Kay, ta dər zləmbamta mu ma dzva Yawe, kabga dagala tawa hiɗahiɗa da tsi. Ama yaha yu zləmbamta ma dzva mnduha, » kaʼa.

¹⁵ Ka ghunadaghatá Yawe ta zləmnda ta la Israʼila daga ga sərɗək baɗ va tsaya ha ka lagha ta fitik manda ya tsaf Yawe. Daga ma Daŋ ga mazlay dikw da Bəʼerseva ga maghura, ka rwutá mnduha dəmbuʼ ndəfáŋ mbsak (70.000) mataba mnduha.

¹⁶ Ka fadaptá duhwala Yawe ta dzvu nda təv Ursalima ŋa zaɗanata, ama ka hag Yawe ta madər ta ghəŋa tsa zləmnda ya, kaʼa nda tsa duhwala Yawe ta zaɗanatá mnduha ya mantsa: « Prək tsa! Klaghu kla ta dzva gha tama! » kaʼa. Tsaw ndusa nda blikwa Arawna, mnda la Yəbus, nzata tsa duhwala Yawe ya.

¹⁷ Nghay Dawuda ta duhwala Yawe ta rwa mnduha, kaʼa nda Yawe mantsa: « Ngha ɓa! Iʼi ta gatá dmaku, iʼi turtukwa ɗa ta guvtá krughuvi. Mnda ngha tuwak ta guvtá krughuvi, ama nu maga na bra rini na? Wya dzvu dza ta iʼi nda la ga ini, wya dzvu, » kaʼa.

Banafta Dawuda ta gwir ta Yawe

¹⁸ Baɗ va tsa fitik ya, ka lagha Gat da Dawuda, kaʼa nda tsi mantsa: « Laf la ta blikwa Arawna, mnda la Yəbus, ka dzihwanafta ka ta gwir ta Yawe, » kaʼa.

¹⁹ Ka laf Dawuda tama ta blikwi, manda gwaɗa Gat, taɓta skwi mnaf Yawe.

²⁰ Ka nghagatá Arawna ta wa lilwa, ka nghaŋtá tsi ta mgham nda kwalvaha ni ta lagha nda ga taŋ. Ka sab Arawna, ka zləmbata zlumbruh ta haɗik ta kəma mgham.

²¹ Ka Arawna ɗawaŋta mantsa: « Kabgawu kəl rveri, mghama ɗa ka sagha da slaɗighata, ta iʼi kwalva ni na? » kaʼa. Ka Dawuda zlghanaftá wi mantsa: « Sagha da skwatá blikwa gha yu ŋa dzihwanaftá gwir ta Yawe. Tsaya dzaʼa kəl na zləmnda ta rwa mnduha na ka lɓata, » kaʼa.

²² Ka Arawna nda Dawuda mantsa: « Ka kla rveri, mghama ɗa, ta na blikwi na ka vla tsi ta skwa pla ghəŋ manda ya dzaʼa zɗəganata! Ngha ɓa! Laviŋ lava ka ta kla slaha ŋa pla ghəŋ ŋa dray tsuh tsuh. Mbəlaʼuha, nda udza sla ya guli ná, ŋa hasuʼu tsaha ya.

²³ Vlagha vla yu demdem, a mghama ɗa! » kaʼa. Tahula tsa, ka Arawna nda mgham guli mantsa: « Má ka tsuʼaghaf tsuʼa Yawe, Lazglafta gha! » kaʼa.

²⁴ Ama ka mgham nda Arawna mantsa: « Mantsa a wa! Dzaʼa skwata nda skwa yu manda va ya ksaf dzva ni. Haɗ yu dzaʼa vlaŋtá Yawe, Lazglafta ɗa, ta skwiha pla ghəŋ ŋa dray tsuh tsuh, nda skwi kul skwatá yu nda skwa wu, » kaʼa. Ka dzawatá Dawuda ta tsa blikwi nda tsa slaha ya ka sulay hutaf mbsak.

²⁵ Ka dzihwaftá Dawuda hada ta gwir ŋa Yawe. Ka valatá tsi ta skwiha pla ghəŋ ŋa dray tsuh tsuh, nda skwiha pla ghəŋa zɗaku. Mantsa tama, ka maranaŋtá Yawe ta zɗaku ta tsa haɗik ya, ka sladaghutá tsa zləmnda ta rwa la Israʼila ya.