2Sam 23 - Hdi

Kɗavakta gwaɗa Dawuda

¹ Wya kɗavakta gwaɗa Dawuda: « Gwaɗa mna Dawuda, zwaŋa Yisay, gwaɗa mna mndu nda kapa dagala, mndu ya zbap Lazglafta Yakubu nda ma pghanaghatá rɗi, mndu ta fa laha zɗa zɗa da la Israʼila.

² Gwaɗa gwaɗa Sulkuma Yawe ta gwaɗa nda ma iʼi, ta ghanika ɗa nzafta gwaɗa ni.

³ Gwaɗa gwaɗa Lazglafta la Israʼila ta gwaɗa. Ka kutumba la Israʼila mnihata na: “Mndu ya ta ga mgham tɗukwa mataba mnduha, ta ga mgham nda zləŋa Lazglafta ná,

⁴ ta gra vgha nda tsuwaɗaka sərɗək, nda wuɗakwa fitik ga sərɗək kul haɗ ghwayak. Nda nza manda hənzaya ta wuninik, tahula tsaɗaghuta imi, ya ta hligiŋtá kuzuŋ ma haɗik.”

⁵ Wya ká Lazglafta magata nda həga ɗa: Dzraf dzra ta wi nda iʼi ŋa ɗekɗek, ka fatá tsi, ka payanata ɗina demdem. Dər ma fitika wu tsi, ta vliha vla ta zatá ghwa, ta hɗiɗim hɗa ta inda skwi ya ta kum yu.

⁶ Ama nda nza mnduha ka falay manda teka ghwenzi ta wuɗidiŋta lu, kabga haɗ lu ta hlay nda dzvu wa.

⁷ Ka ta hlay mndu ná, klafta ni ta skwi ka kfur ka ya ka udza gupa a tsi, ka driŋta nda vu ma va tsa vla ni ya, » kaʼa.

Bikwirha vula Dawuda

⁸ Wya hga mnduha ka bikwira vulu ta maganatá slna ta Dawuda: Taŋtaŋa ni, tsaya Yusev Basevet, mnda la Tahkemuŋ, tsatsi mali ta ghəŋa maliha. Tsatsi ta rwanatá mnduha tghas dərmək (800) baɗ turtuk nda gwadama ni.

⁹ Mahisa ni tsaya, Ilghazar, zwaŋa Dudu, zigha Ahuhi. Tekw tsatsi mataba tsa gwal bikwira vulu hkən si kawadaga nda Dawuda, ta hərtata ta la Filisti ta tskavata ŋa vulu. Ta vraptá la Israʼila ya,

¹⁰ ta sladatá tsa Ilghazar ya ka kwaraftá la Filisti ha ka hurfutá dzva ni ka ndiʼafta ta kafay ni ya. Ka hɗamtá Yawe ta zata ghwa katakata baɗ tsa fitik ya. Tsa gwal vulu ta hwahwayaghuta ya ná, da hla huzla gwal rwana tsi kweŋkweŋ varadaghata hahəŋ.

¹¹ Tahula tsatsi, ka fiŋtá Samaʼ, zwaŋa Ageʼ, mnda la Harar. Ka tskavata la Filisti ma Lehi. Hada, mamu sana vwah ləgdaʼ mndərga sana vara mida. Ka hwayaftá mnduha ta kəma la Filisti,

¹² ama ka dihavatá Sama ma takataka tsa vwah ya, ka katatá tsi. Ka rwanatá tsi ta la Filisti. Ka hɗamtá Yawe ta zatá ghwa katakata.

¹³ Ta fitika tsaka skwi ta vwah, ka sliʼadatá maliha hkən mataba bikwira vulu hkən mbsak slanaghatá Dawuda ma galigha Ghadulam, kabga ta nzaku ghuɓa la Filisti ma didiŋa la Rafa.

¹⁴ Ma tsa fitik ya, ma vla ɗifa ni Dawuda, ta fatá la Filisti ta sana bakwa vula taŋ ma Betʼlehem.

¹⁵ Ka dzə ndala ta Dawuda, kaʼa mantsa: « Wa suɗustá a imi ma vavrəm ta wi tgha Betʼlehem a ɓa! » kaʼa.

¹⁶ Mantsa tama, ka lam tsa mnduha hkən ka bikwira vulu ya ka mbraku da ghuɓa la Filisti, ka tagistá imi ma tsa vavrəm ta wi tgha Betʼlehem ya. Ka kladaghatá həŋ ka vlaŋtá Dawuda. Ama ka kwalaghutá tsi ta say, ka pghiŋtá tsi ka skwa mbəhu ŋa Yawe.

¹⁷ Kaʼa mantsa: « Yawe, kahwathwata ná, haɗ yu dzaʼa magay manda tsa ɗekɗek wa! Dzaʼa laviŋ lava yu ta sa usa tsa mnduha ta laghwi da skwaptá hafa taŋ ya ra? » kaʼa. Ka kwalaghutá tsi ta say. Tsaya skwi maga tsa mnduha hkən ka bikwira vulu ya.

¹⁸ Avisay, zwaŋama ni ma Yuʼav zwaŋa Tseruya, mali mataba tsa hahəŋ hkən ya. Ma sana fitik ka klaftá tsi ta gupa ni ka pslatá mnduha hkən dərmək (300). Manda tsaya, ka laghu hga tsatsi da zərwa mataba tsa mnduha hkən ya.

¹⁹ Mal tsatsi vlaŋ lu ta sgit mataba tsa hahəŋ hkən ya, ka nzakw tsatsi ka mala taŋ, ama nza a tsatsi tekw mataba tsaha hkən ya wa.

²⁰ Benaya, zwaŋa Yəhuyada, bikwira vulu ma Kavtseʼel ya, ka magatá tsi ta ndəghata slnaha dagala dagala. Tsatsi ta pslatá zwana Aryel his mnda la Muwav. Ma sana fitik ta fitika mazlam katakata, tsatsi ta laha dzatá rveri ma vavrəm.

²¹ Tsa Benaya ya guli ta dzatá mnda la Masar gidzaŋ nzakwa ni nda ŋatá gupa ma dzva ni. Ka laha tsi nda sarak valafta ta tsa mnda la Masar ya, ka zluʼaghutá tsa gupa ma dzva ni ya, ka dzata nda tsi.

²² Tsaha ya mndərga skwiha maga Benaya, zwaŋa Yəhuyada. Ka mutsaftá tsatsi guli ta sgit katakata mataba tsa mnduha hkən ka bikwira vulu ya.

²³ Ka malglaghutá lu ta vlaŋtá sgit ta tsatsi ka tsaha hkən mbsak ya, ama nza a tsatsi tekw mataba tsaha hkən ya wa. Ka klaftá Dawuda ka mali ta ghəŋa gwal ta ngha vərɗa tsatsi.

²⁴ Ma tsa mnduha hkən mbsak ya guli ná, mamu i Ghasaʼel, zwaŋama ni ma Yuʼav, nda Ilhanaŋ, zwaŋa Dudu mnda la Betʼlehem.

²⁵ I Sama nda Ilika mnduha la Harut həŋ his his,

²⁶ nda Helets mnda la Palti, nda Ghira, zwaŋa Ghikes mnda la Tekuwa,

²⁷ nda Avighezer mnda la Ghanatut, nda Məvunay mnda la Husa,

²⁸ nda Tsalmuŋ mnda la Ahuhi, nda Mahray mnda la Nətufa,

²⁹ nda Helev, zwaŋa Baghana mnda la Nətufa, nda Itay, zwaŋa Rivay mnda la Givgha ma kwakwara la Biŋyamiŋ,

³⁰ nda Benaya mnda la Pirghatuŋ, nda Hiday mnda la zlərɗaha Gaghas,

³¹ nda Avighalvuŋ mnda la Betʼaraba, nda Ghazmavet mnda la Bahurim,

³² nda Ilyahbaʼ mnda la Saghalbuŋ, nda zwana Yaseŋ, nda Yunataŋ,

³³ nda Sama mnda la Harar, nda Ahiʼam, zwaŋa Sarar mnda la Harar,

³⁴ nda Ilifelet, zwaŋa Ahasbay mnda la Maghaha, nda Iligham, zwaŋa Ahitufel mnda la Gilu,

³⁵ nda Hetsray mnda la Karmel, nda Pagharay mnda la Arap,

³⁶ nda Yigal, zwaŋa Nataŋ mnda la Tsuva, nda Bani mnda la Gat,

³⁷ nda Tselek mnda la Ghamuŋ, nda Nahray mnda la Bəʼerut si ta kla huzla vula Yuʼav, zwaŋa Tseruya,

³⁸ nda i Ghira nda Garev mnduha la Yeter,

³⁹ nda Uriya mnda la Het. Hkən mbsak ndəfáŋ mida gwagwata həŋ.