2Sam 22 - Hdi

Laha Dawuda

¹ Baɗ fitika katapta Yawe ta Dawuda ma dzva inda ghumaha ni, nda ya ma dzva Sawulu, ka fanaftá tsi ta ya laha ya ta Yawe.

² Kaʼa mantsa: « Ari Yawe, kagha kutumba ɗa, matsaka huzla ɗa, mnda mba iʼi.

³ Ar Lazglafta, kagha kutumba ɗa, vli ta ɗifi yu ta ɗifa, zalama ɗa, nda mbraku ya ta mba iʼi, matsaka vla ɗifa ɗa. Mnda mba iʼi, kagha ta kata iʼi da gwal ta kurɗivata.

⁴ Nda ra Yawe ka zləzləvay! Hgaŋta ɗa ya, katapta ni ta iʼi da ghumaha ɗa.

⁵ Si bukwaɗim bukwa mtaku manda vavalakwa imi, si dzaʼa klagha kla ta iʼi manda zalaha.

⁶ Si kiʼa ka tsamta tɓaŋa mtaku ta iʼi ma haɗik, si pərɗa dəɓəla mtaku ksutá iʼi.

⁷ Ma ɓəɓəlakwa ɗa, ka hgaŋtá yu ta Yawe, Lazglafta ɗa hgaŋ yu. Daga ma həga ni, ka snaŋtá tsi ta lwa ɗa, ka slramtá waha ɗa da sləməŋa ni.

⁸ Ka gigɗavaftá haɗik ka ghudzaku, ka gugtsavaftá tughwa luwa, ka ghudzavaftá həŋ kabga gufatá ŋuɗufa ni.

⁹ Ka vusl tsi ta ɗiŋ ma htsiŋa ni, ka sab vu ta driŋtá mndu ma wa ni, nda lanzəŋa vwa ni laŋaŋ.

¹⁰ Ka gwitsaganatá tsi ta luwa, ka saha tsi, ta dəkata ghwayak mista səla ni.

¹¹ Ka ŋlaftá tsi ta keruba turtuk ka ndəru, ka zlagaptá tsi ta zlambaka falak.

¹² Ka mbəɗiŋtá tsi ta grum ka skwa bukwa ni, ghwayaka ima matətɗu ya.

¹³ Ka tsaftá zləghakwa lanzəŋa vu, ma tsuwaɗak ta kəma ni.

¹⁴ Ka ŋəzlatá Yawe daga ta luwa, lwa Lazglafta Dagala ta ghudzagata.

¹⁵ Ka hagatá tsi ta havaha, ka siskanatá ghumaha. Ka slragatá tsi ta wuɗa luwa, ka zlaɓanaftá həŋ.

¹⁶ Ka zlagaptá mndəra drəf, ka guniŋtá lu ta tughwa ghəŋa haɗik, ma dvata Yawe ta dvu, nda ya ma vuslagapta ni ta hafu ma htsiŋa ni.

¹⁷ Daga ta luwa, ka fagatá tsi ta dzva ni ksaftá iʼi, ka tɗagaɗipta ma lata drəf.

¹⁸ Ka kataptá tsi ta iʼi ma dzva ghuma ɗa ta mbruta, tsa gwal husaŋ yu ta həŋ, malaghu mbrata həŋ ka iʼi ya.

¹⁹ Ka liɗistá həŋ ma fitika slaɗighata ghuya ɗaŋwa, ama ka nzakw Yawe ka mnda diha vgha ɗa.

²⁰ Ka kligiɗtá tsi da vli flaʼu, ka mbaɗiftá tsi dabga ɗvuta ni ta iʼi.

²¹ Plaɗim pla Yawe taɓta tɗukwata iʼi, magiha maga taɓta kwala dzva ɗa gatá dmaku,

²² kabga ŋana ŋa yu ta tviha Yawe, magana a yu ta ghwaɗaka skwi ta Lazglafta ɗa wa.

²³ Inda tva skwiha mnaf tsi ŋa magay ná, ma ghəŋa ɗa həŋ, zluŋ a yu ta zlahuha ni wa.

²⁴ Nza nza yu ka ŋərma mndu ta kəma ni, nghu ngha yu ta ghəŋa ɗa da dmaku.

²⁵ Plaɗim pla Yawe taɓta tɗukwata iʼi, kabga haɗ dmaku ga yu ta nghadaptá tsi wa.

²⁶ Nda mndu ka ŋərma ya, ka ŋərma mndu ka kagha nda tsi. Nda vərɗa mndu ya, ka vərɗa mndu ka kagha nda tsi.

²⁷ Mndu nda tsaɗa ya, nda tsaɗa ka kagha nda tsi. Nda ghwaɗaka mndu ya, maraŋta kagha ta nzakwa gha nda hiɗa.

²⁸ Ta mbay ka ta mnduha ta tulekaku, ta faf fa ka ta iri ta gwal ta gla ghəŋ, ka dzaganatá həŋ.

²⁹ Kahwathwata, kagha pitirla ɗa, Yawe! Yawe ta tsuwaɗaka grusl ta waɗifta.

³⁰ Nda mbraku ta vlihata ka ná, dzaʼa zlaguŋ zlaga yu ta bakwa gwal vulu, Nda Lazglafta ɗa ná, ta valap vala yu ta matsak.

³¹ Tviha Lazglafta ná, tɗukwa həŋ, gwaɗa ta mnata Yawe ná, nda ra. Nda nza ka zalama inda gwal ta ɗifa da tsi.

³² Wa Lazglafta ta ghəŋa Yawe na? Wa kutumba ka Lazglafta mu a tsi na?

³³ Lazglafta matsaka ɗa ta mbruta, ta faftá iʼi ta tva zaɗaku.

³⁴ Ta dziranaf dzira ta səla ɗa manda ŋa ghadigir. Ta sladaɗif slada ta vli tskala.

³⁵ Tsatsi ta taghanaftá vulu ta dzva ɗa, ha ŋa tɗapta dzva ɗa ta lgheɗ ka ghuva tili.

³⁶ Ari Yawe, kagha ta vlihatá zalama mba mnda gha, zɗakwa gha ta kapaɗifta.

³⁷ Kagha ta kla səla ɗa ta tvi bughwa, haɗ tuthun ta dzuŋtá səlaha ɗa wa.

³⁸ Ta ghəzlaf ghəzla yu ta ghumaha ɗa, ka zaɗanatá həŋ. Haɗ yu ta vragaghuta ka ta zaɗana a yu ta həŋ wa.

³⁹ Ta zaɗana zaɗa yu ta həŋ, ta ɓalanap ɓala yu ta həŋ. Haɗ həŋ ta walglaŋta sliʼavata wa. Siy zlambatá həŋ mista səla ɗa.

⁴⁰ Ta vliha vla ka ta mbraku ŋa vulu, ŋa raghwanata ɗa ta ghumaha ɗa.

⁴¹ Ta mbəɗana mbəɗa ka ta ghumaha ɗa, ka hwayafta taŋ ta kəma ɗa. Ta zaɗana zaɗa yu ta ghumaha ɗa.

⁴² Kəʼa ka həŋ waftá vli ta vata həŋ ná, haɗ mndu ŋa kata həŋ wa! Ka wahu həŋ ta wahu da Yawe, ama zlghanaf a ta wi ta həŋ wa.

⁴³ Ka ŋərɗapta yu ta həŋ, ka niŋtá yu ta həŋ manda rgitika haɗik. Ka huʼanaptá yu ta həŋ, ka diŋlanaptá yu ta həŋ manda dzazlak ta pazlala.

⁴⁴ Ta katap kata ka ta iʼi ma gatá sida mnduha, ta fa fa ka ta iʼi ka mali ta ghəŋa mndəra mnduha, mnduha si kul snaŋta yu ta magihatá slna.

⁴⁵ Ta hla səla la mayəm nda zləŋ nda zləŋ da iʼi, tata gunafta nda guna yu ta wi, gi ta sniha sna həŋ.

⁴⁶ Nda rwa vgha la mayəm, nda ghudzaku nda ghudzaku ta saba həŋ ma vla ɗifa taŋ.

⁴⁷ Yawe ná, nda hafu mida! Glaku ŋa kutumba ɗa! Ka mna lu ta glakwa Lazglafta, kutumba mbakwa ɗa!

⁴⁸ Lazglafta ta vlihatá plamta, tsatsi ta pghíŋtá mndəra mnduha mista ɗa.

⁴⁹ Kagha ta kataptá iʼi da ghumaha ɗa! Kagha ta kapaɗifta ta ghəŋa gwal ta hərzla ghuva nda iʼi, Kagha ta katatá iʼi da gwal maga mbraku mbraku.

⁵⁰ Tsaya ta kəl yu ka ghuba kagha mataba mndəra mnduha, a Yawe. Dzaʼa fay yu ta laha zləzləva hga gha.

⁵¹ Ta vlaŋ vla ta zatá ghwa dagala dagala ta mgham ya zbap tsi. Ta magay ta zɗaku ŋa mndu ya faghu tsi nda ma pghanaghatá rɗi, ŋa Dawuda nda zivira ni ŋa ɗekɗek, » kaʼa.