2Sam 21 - Hdi

Maya ta haɗik, nda pslatá zivira Sawulu

¹ Ta fitika gay Dawuda ta mgham, ka slatá maya ka vaku hkən ta ghəŋ ta ghəŋ. Ka ɗawu Dawuda da Yawe. Ka Yawe nda tsi mantsa: « Nda nza dabga Sawulu, nda la ga taŋ gwal pghiŋtá us, kabga vəl pslata taŋ ta la Givghuŋ, » kaʼa.

² Nza a la Givghuŋ ka la Israʼila wu, nda nza hahəŋ ka pɗakwa la Amuru. Si waɗa waɗa la Israʼila ta kwal kul pslatá həŋ, ama ka ŋavatá Sawulu ŋa rwanatá həŋ, ka draku draku ŋa la Israʼila nda la Yuda. Mantsa tama, ka hgaŋtá mgham Dawuda ta la Givghuŋ ŋa dzərku nda həŋ.

³ Ka Dawuda nda la Givghuŋ tama mantsa: « Nahgani dzaʼa magaghunata yu na? Kinawu dzaʼa slərɓapta yu ta zughu ma ghwaɗaka skwi suʼu kuni, kada tfanaghata kuni ta wi ta mnduha Yawe, skwa za həga ka ŋa ni na? » kaʼa.

⁴ Ka la Givghuŋ mantsa: « Nza a skwi mataba aŋni nda Sawulu nda la ga taŋ ŋa payakwa ni nda tsedi nda ya nda dasu, dər ka dzata mndu ma Israʼila wu, » ka həŋ. Ka mgham mantsa: « Nahgani ta kum kuni ta magaghunata ɗa tama ɓa? » kaʼa.

⁵ Ka həŋ nda mgham mantsa: « Tsəhala si kumaŋ kuma tsa mndu ya ta zaɗaŋnata ya, ka payaftá tsi ta kɗaŋnata ka zaɗaŋnata ta inda kwakwara Israʼila ya,

⁶ vlaŋna vla ta mnduha ndəfáŋ mataba zwana ni, ka hahagata ŋni ta mbla taŋ ta udzu ta kəma Yawe ma Givgha, luwa Sawulu, tsa mndu si zbap Yawe ya, » ka həŋ. Ka mgham nda həŋ mantsa: « Dzaʼa vlaghuna vla yu ta həŋ, » kaʼa.

⁷ Ka zlanatá mgham ta Məfivuset, zwaŋa Yunataŋ, zigha Sawulu, dabga waɗu ya waɗana Dawuda ta Yunataŋ ta kəma Yawe.

⁸ Ka hlaftá mgham ta zwani his si yayana Ritspa, makwa Aya ta Sawulu, i Armuni nda Məfibuset, nda zwani hutaf yayana Merav, makwa Sawulu ta Adriʼel zwaŋa Barzilay mnda la Məhula.

⁹ Ka vlatá tsi ta həŋ ma dzva la Givghuŋ, ka laghwi həŋ hahagatá həŋ ta ghwá ta kəma Yawe. Ndəfáŋ ndəfáŋ rwuta həŋ ka skwa turtuk. Ka pslatá lu ta həŋ baɗ taŋtaŋ fitika zlra tska urz ta vwah.

¹⁰ Ka hlaftá Ritspa, makwa Aya ta gərzaŋha ka zlatafta ŋa nzakwa ni ta kutumba, daga zlraftá tska skwi ta vwah ha ka sagha ima rkwit ta ghəŋa tsa mbliha ya. Ka pyaftá tsi ta zarakha ta lagha tsukwafta ta həŋ gifitik. Girviɗik ya, ghəzlay ni ta tsuɗayha ta lagha ta ghəŋa taŋ.

¹¹ Ka mnanaŋtá lu ta Dawuda ta skwi maga Ritspa, makwa Aya, markwa sanagha Sawulu.

¹² Ka laghu Dawuda da hlakta ghudzifa Sawulu, nda ŋa Yunataŋ zwaŋa ni da la Yaves ma Gilghat. Tsaw si hlaf hla tsaha ya ta badawa ma Betʼsaŋ, ma tsa vli hahaga la Filisti tahula zata ghwa ta ghəŋa Sawulu ma Gilbuwa ya.

¹³ Ka hlaftá tsi hada ta ghudzifa Sawulu nda ŋa zwaŋa ni Yunataŋ. Ka tskanatá lu guli ta ghudzifa tsa gwal ndəfáŋ hahaga la Givghuŋ ya.

¹⁴ Ka paɗamtá lu ta ghudzifa Sawulu nda ŋa Yunataŋ ta kwakwara la Biŋyamiŋ, ma Tsela, ma kula Kis, da ni ma Sawulu. Ka magatá lu ta inda skwi mnaf mgham. Tahula tsa, ka nzatá ŋuɗufa Lazglafta zɗa ta ghəŋa tsa haɗik ya.

Zəglata la Israʼila ta ghwa ta ghəŋa la Filisti

¹⁵ Ka slatá vulu kay guli mataba la Israʼila nda la Filisti. Ka laha Dawuda nda sludziha ni, ka zatá həŋ ta la Filisti. Ka hərfutá Dawuda katakata.

¹⁶ Ka kuratá Yisbiʼbənuv, zivira la Rafa si ta dzatá Dawuda. Gupa ta magay ndəgakwa ni ta kiluʼ hkən nda rita ka ghuva tili da tsi, nda hbatá vgha ni nda huzla vula ni ka lfiɗ.

¹⁷ Ama ka lagha Avisay, zwaŋa Tseruya katatá Dawuda, ka dzatá tsi ta tsa mnda la Filisti ya. Mantsa tama, ka waɗatá mnduha Dawuda, ka həŋ mantsa: « Ləgəlta a ka da vulu kawadaga nda aŋni wu, dá dzaghatá lu, dá mtutá pitirla ga mghama la Israʼila, » ka həŋ.

¹⁸ Tahula tsaya, ka sliʼiglaftá vulu nda la Filisti ma Guv. Ma tsaya, ka dzatá Sibəkay mnda la Husa ta Saf, sana mndu ya ma mndəra la Rafa.

¹⁹ Ka vrəglanaftá lu ta vulu nda la Filisti ma Guv. Ka dzatá Ilhanaŋ, zwaŋa Yaghreʼurgim, mnda la Betʼlehem ta Guliyat, mnda la Gat, ka guram gupa ni nda matala ga lgut.

²⁰ Ka sliʼiglaftá vulu ma Gat. Mamu sana mndu hada nda slra, mkuʼ mkuʼ zwana dzva ni, nda səlaha ni tani, hisambsak fwaɗ mida gwagwata ni. Sab ma mndəra la Rafa tsatsi guli.

²¹ Ka gag tsi ta la Israʼila. Ka dzatá Yunataŋ, zwaŋa Simghaʼ, zwaŋama ni ma Dawuda.

²² Tsa mnduha la Gat fwaɗ fwaɗ ya ná, ma mndəra la Rafa saba həŋ. I Dawuda nda sludziha ni ta pslata həŋ.