2Sam 20 - Hdi

Ganavata Seva ta sidi ta Dawuda

¹ Mamu sana falaya mndu hada ma Gilgal ta hgə lu ka Seva, zwaŋa Bikri, mnda la Biŋyamiŋ ya. Ka vyatá tsi ta duli, kaʼa mantsa: « Haɗ skwi ta nghaŋnaghatá aŋni nda Dawuda wa. Haɗ aŋni ta zuvustá həga nda tsa zwaŋa Yisay ya wa. Ariwa la Israʼila, ka vra dər wa dzagha ni! » kaʼa.

² Ka zlanatá inda la Israʼila ta Dawuda ŋa dzaʼa mista Seva, zwaŋa Bikri. Ama ka ndiʼanavatá la Yuda ta vgha ta mghama taŋ, ka pghafta daga ma Yardeŋ ha da Ursalima.

³ Ka lagha mgham Dawuda dzagha ni ma Ursalima. Ka hlaftá tsi ta tsa miʼa sanagha ghwaŋ si zlana tsi ta həŋ ŋa ngha həga ga mgham ya, ka pghatá həŋ ma sana həga ta nghə lu nda ngha ɗina. Ka nghaptá tsi ka həŋ ma inda skwi, ama haɗ ta guygəltá vgha nda həŋ wa. Ka hamtá lu ta həŋ ha ka sagha fitika mtakwa taŋ, ka nzata həŋ manda miʼa wadgu.

Dzata Yuʼav ta Ghamasa

⁴ Ka mgham nda Ghamasa mantsa: « Hagaɗik haga ta inda mnduha la Yuda ma fitik hkən, ka nzata kagha guli hadna kawadaga nda həŋ, » kaʼa.

⁵ Ka laghu Ghamasa da haga mnduha la Yuda, ama ka gərɗatá tsi ka malaptá fitik ya mnanaf mgham.

⁶ Ka Dawuda nda Avisay mantsa: « Ndanana, dzaʼa magama maga Seva zwaŋa Bikri ta ghwaɗaka skwi ka malaghutá ŋa Avsalum. Hlaf hla vərɗa kagha ta mnduha ɗa ka zbíŋta ka, dá laghu tsi da luwa ŋam lu ma matsaka huzlu, dá zaɗamaghatá tsi, » kaʼa.

⁷ Ka sab Avisay ka laghwi, nda mnduha la Yuʼav, nda la Kəret, nda la Pəlet mista ni, nda inda bikwira vulu. Ka sab həŋ ma Ursalima ŋa zbíŋtá Seva, zwaŋa Bikri.

⁸ Ndusadaghata taŋ ta vata sana pala dagala ma Givghuŋ, ka lagha Ghamasa ta kəma taŋ. Nda hbatá vgha Yuʼav nda huzla vula ni, nda hbatá kafay guli ma kupak ta ɓanava ta tataya ni. Ta gavadaghatá Yuʼav ka dɗadatá tsa kafay ya ta haɗik.

⁹ Ka Yuʼav nda Ghamasa mantsa: « Zwaŋama ɗa, ta ɗughwana ka ra? » kaʼa. Ka ksaftá tsi ta ghumaya Ghamasa nda dzva zeghwa ni ŋa brusay.

¹⁰ Nghap a Ghamasa ka kafay ma dzva Yuʼav wa. Ka sliglatá Yuʼav ma huɗi. Ka tigiŋtá hara ni ta haɗik, kul sliglanavatá tsi ta mahisa ni. Mantsa tama ka mtuta Ghamasa. Ka zbíŋtá i Yuʼav nda zwaŋama ni Avisay ta Seva, zwaŋa Bikri.

Dzatá ghəŋa gatá sida Seva

¹¹ Ka nzatá sana duhwal mataba mnduha Yuʼav ta vata mbla Ghamasa, kaʼa mantsa: « Ka wa ta ɗvutá Yuʼav, ka wa ka ŋa Dawuda, ka la tsi mista Yuʼav! » kaʼa.

¹² Ta gudumbulaku Ghamasa ma usa ni ta virvira tvi. Nghay tsa duhwal ya ta inda mndu ta lagha sladavata ka nghay ya, ka taŋwalaghutá tsi ta slərpa tvi da vwah, ka fanaghatá lgut ta ghəŋa ni. Tsaya skwi maga tsi nghər tsi ta inda gwal ta lagha da sladanavata.

¹³ Manda kliŋta ta tvi, ka sliʼaftá inda sludziha mista Yuʼav, ŋa dzaʼa zbiŋtá Seva, zwaŋa Bikri.

¹⁴ Ka ranaftá Seva ta inda kwakwara mndəra la Israʼila, ka ɓhadaghatá tsi da Avelbetʼmaghaka. Ka tskavatá la Berim demdem guli ka dzaʼa mista ni.

¹⁵ Ka lagha Yuʼav nda mnduha ni da Avelbetʼmaghaka ka ŋaftá luwa ya nda Seva mida. Ka tərɓanavatá həŋ ta haɗik ta vata matsaka luwa ha ka ksagatá slada ni. Ta ŋavatá inda mnduha kawadaga nda Yuʼav, ka tuzla tsa matsak ya ŋa zləmbiŋta.

¹⁶ Ka gugɗatá sana marakw nda ɗifil ma ghəŋa ni ma tsa luwa ya, kaʼa mantsa: « Sudwa! Sudwa! Mnanawa mna ta Yuʼav, wyawa dzvu, ka gavakta tsi da hadna. Ta kumay yu ta gwaɗganata! » kaʼa.

¹⁷ Ka gavadaghatá Yuʼav da tsi. Ka ɗawaŋtá tsa marakw ya da tsi: « Kagha Yuʼav ra? » kaʼa. « Iʼi ya! » kaʼa. Kaʼa nda tsi mantsa: « Sna ta gwaɗa kurɗa gha, » kaʼa. « Ta snay snay yu, » kaʼa.

¹⁸ Kaʼa mantsa: « Ka lu si ta mnay ghalya na: “Ɗawaŋwa ɗawa ta hiɗaku da la ma Avel!” Dzaʼa kɗu kɗa gwaɗa.

¹⁹ Aŋni ná, tekw aŋni mataba gwal ka ŋərma mndu ta kuma zɗaku ma Israʼila, ama ka zba kagha ta zaɗanatá luwa ta nzakway manda na ma Israʼila! Kabgawu dzaʼa zaɗanata ka ta skwa za həga Yawe na? » kaʼa.

²⁰ Ka Yuʼav mantsa: « Mantsa a wu, va a yu ɗekɗek ta zaɗanata, dər ka niŋta ka kufik wa.

²¹ Tsaya a skwi ta psə yu wa. Ama mnda la ta ghwá kwakwara la Ifrayim, ta hgə lu ka Seva, zwaŋa Bikri, ta ganavatá sidi ta mgham Dawuda. Kligiŋwa kla ta tsatsi turtukwa ni, ka zlanata yu ta luwa, » kaʼa. Ka tsa marakw ya nda Yuʼav mantsa: « Dzaʼa wuɗəgaghap wuɗa lu ta ghəŋa ni nda ta matsak, » kaʼa.

²² Ka laghu tsa marakw ya nda ŋa ni ma ɗifil mnanatá inda mnduha ni. Ka tsaghutá həŋ ta ghəŋa Seva, zwaŋa Bikri, ka wuɗəganapta Yuʼav. Mantsa tama, ka vyatá Yuʼav ta duli. Ka gazlaghutá həŋ diʼiŋ nda tsa luwa ya, ka laghu dər wa dzagha ni. Ka vradaghatá Yuʼav da Ursalima ta vata mgham.

Gwal ta ksanatá slna ta Dawuda

²³ Ka nzakw Yuʼav ka mali ta ghəŋa inda gwal vula la Israʼila. Ta nzakw Benaya, zwaŋa Yəhuyada ka mali ta ghəŋa ŋa la Kəret nda la Pəlet.

²⁴ Ka nzatá Aduram ka mali ta ghəŋa slna ga vuʼa. Ta nzakw Yəhusafat, zwaŋa Ahilut ka mnda tskanatá ɗelewera gwaɗaha ga mgham.

²⁵ Ka nzakw Səwa, ka mnda vindi. Ta nzakw i Tsaduk nda Aviyatar ka gwal dra skwi ŋa Lazglafta.

²⁶ Ka nzakw Ghira, ma mndəra la Yaʼir, ka mnda dra skwi ŋa Lazglafta ka ŋa Dawuda guli.