2Sam 2 - Hdi

Ma Hevruŋ famta lu ta Dawuda ka mgham

¹ Tahula tsaya, ka ɗawaŋtá Dawuda da Yawe, kaʼa mantsa: « Ka lafa yu da ya turtuk ma luwaha la Yuda ra? » kaʼa. Ka Yawe nda tsi mantsa: « Ŋla, » kaʼa. Ka Dawuda mantsa: « Da wati vli dzaʼa ŋladafta yu na? » kaʼa. Ka Yawe nda tsi mantsa: « Da Hevruŋ, » kaʼa.

² Ka ŋladaftá Dawuda kawadaga nda miʼa ni his, i Ahinugham makwata Yizrəghel nda Abigayel si markwa Naval mnda la Karmel ya.

³ Ka hladanaftá Dawuda ta gwal kawadaga nda tsi, inda taŋ ka həga ka həga, ka nzatá həŋ ma luwaha Hevruŋ.

⁴ Ka sliʼadaghatá mnduha la Yuda da hada, ka famtá həŋ ta Dawuda nda ma pghanaghatá rɗi ŋa nzakway ka mgham ta ghəŋa la Yuda. Ka lagha lu mnanatá Dawuda kazlay na mnduha la Yaves ma Gilghat ta paɗamtá Sawulu, kəʼa.

⁵ Ka ghunadaptá Dawuda ta mnduha da la Yaves ma Gilghat. Kaʼa nda həŋ mantsa: « Ka tfaghunagha tfa Yawe ta wi, kabga maganata ghuni ta zɗaku ta daŋahəga ghuni Sawulu nda ma paɗamtá ghuni ya.

⁶ Ndanana, ka maraghunaŋ mara Yawe ta zɗakwa ni nda nzakwa ni ka ŋərma. Iʼi guli, dzaʼa magaghuna maga yu ta va tsa zɗaku ya, dabga tsa skwi maga kuni mantsa ya.

⁷ Nzawa nza nda dra ŋuɗuf, ka dihavata kuni! Aŋ mnda ni nda mta daŋahəga ghuni Sawulu, zbap zba la Yuda ta iʼi nda ma pghaɗighatá rɗi ŋa nzakwa ɗa ka mgham ta ghəŋa taŋ, » kaʼa.

Famtá Isbuset ka mghama la Israʼila

⁸ Mataba tsaya, ka klaghatá Avner zwaŋa Ner, mali ta ghəŋa gwal vula Sawulu ta Isbuset zwaŋa Sawulu da Mahanayim.

⁹ Ka famtá tsi ka mgham ta ghəŋa la Gilghat, nda la Asur, nda la Yizrəghel, nda la Ifrayim, nda la Biŋyamiŋ, klata ghəŋa ná, ta ghəŋa inda la Israʼila.

¹⁰ Fwaɗ mbsak ima Isbuset zwaŋa Sawulu ta nzatá tsi ka mgham ta ghəŋa la Israʼila. His vakwa ni ta ga mgham. Ama la Yuda yeya mista Dawuda.

¹¹ Ka magatá Dawuda ta vaku ndəfáŋ nda tili mkuʼ ta ga mgham ta ghəŋa la Yuda ma Hevruŋ.

Vulu ma Givghuŋ

¹² Ka sliʼaftá Avner zwaŋa Ner ma Mahanayim, nda sludziha Isbuset zwaŋa Sawulu ka laghwi nda ma Givghuŋ.

¹³ Ka sliʼaftá Yuʼav zwaŋa Tseruya guli kawadaga nda sludziha Dawuda ka laghwi. Ka gəmatá həŋ wa ghwa tsap lu ma Givghuŋ, ka nzatá həŋ sani nda təv sana slərpa tsa ghwa ya, sani nda təv sana slərpu.

¹⁴ Ka Avner nda Yuʼav mantsa: « Ka sliʼaf sliʼa duhwalha u ka gmata həŋ nda lmu ta kəma u, » kaʼa. « Aray, » ka Yuʼav.

¹⁵ Ka sliʼaftá mbsaka tsa duhwalha ya ka gragra: Ghwaŋpəɗ his ŋa la Biŋyamiŋ ta nzakway mista Isbuset, zwaŋa Sawulu. Ghwaŋpəɗ his mataba sludziha Dawuda.

¹⁶ Dər wa ma həŋ, ta ksaftá mnda vula ni ta ghəŋ, ka sliglata nda kafay ma ŋwazliɓ, mantsa ya ka rwutá həŋ ka magurambazl demdem. Ka tsanaftá lu ta hgu ta tsa vli ma Givghuŋ ya, ka Helkat Hatsurim.

¹⁷ Ka nzəvavaftá lmu baɗ tsaya. Ka zatá sludziha Dawuda ta ghwa ta ghəŋa i Avner nda mnduha la Israʼila.

¹⁸ Hada zwana Tseruya hkən hkən, i Yuʼav, nda Avisay, nda Ghasaʼel. Ka ka nda dzirata Ghasaʼel manda madva ma mtak.

¹⁹ Ka ndriŋtá Ghasaʼel ta Avner, mbəɗaŋ a ta vgha dər nda ga zeghwi, dər nda ga zlaɓa wa.

²⁰ Ka mbəɗavatá Avner, kaʼa mantsa: « Kagha ri, Ghasaʼel? » kaʼa. « Iʼi ya, » kaʼa.

²¹ Ka Avner nda tsi mantsa: « Mbəɗadap mbəɗa ta vgha nda ga zeghwi ka nda ga zlaɓa a tsi, ka ksafta ka ta ya turtuk ma tsa duhwalha ya, ka zluʼaghuta ka ta huzla vula ni, » kaʼa. Ama va a Ghasaʼel ta zliŋtá tsatsi wa.

²² Ka Avner nda Ghasaʼel kay guli mantsa: « Gavaghu gava gha ta vata iʼi, va a yu ta dzaghata wa. Ka dzagha dza yu ní, waká ŋni dzaʼa gmaku nda hula nda zwaŋama gha Yuʼav na? » kaʼa.

²³ Ama ka kwalaghutá Ghasaʼel ta zliŋta. Mantsa tama, hək vlaŋ vla Avner ma huɗi nda mndəra gupa ni. Ka zlagaptá tsa gupa ya nda ta hul, ka zləmbatá tsi hada ka mtuta. Ɓhadaghata inda mndu da tsa vli zləmba Ghasaʼel ka mtuta ya ná, sladavata ni.

²⁴ Ka ndriŋtá i Yuʼav nda Avisay ta Avner. Ta dɗaku dɗaku fitik ta ɓhadaghata həŋ ta kuɗuŋura Amah ta nzakway mbəŋ nda Giyah ta tva dzaʼa da mtaka Givghuŋ.

²⁵ Ka tskadaghatá la Biŋyamiŋ ta vgha nda ta hula Avner ka tskavata tuts, ka sladata ta bɗəma sana kuɗuŋur.

²⁶ Ka gugɗadapta Avner ka Yuʼav, kaʼa mantsa: « Dzaʼa kɗaŋ kɗa u ta vulu ma mataba u nda kafay ŋa kɗekedzeŋər ki na? Nda sna kagha kazlay na ka manda na ka u kɗaŋta ná, ɗina a dzaʼa kɗakwa tsi wu, kəʼa ra? Yawu dzaʼa mnanata ka ta sludziha gha ka zlanata həŋ ta zbiŋta zwana ma taŋ na? » kaʼa.

²⁷ Ka Yuʼav mantsa: « Ta waɗa waɗa yu nda hga Lazglafta nda hafu mida! Ka má gwaɗa a ka wu katsi, má zlanata a sludziha ɗa ta zbiŋta zwana ma taŋ ha ga sərɗək wu, » kaʼa.

²⁸ Ka vyata Yuʼav ta duli, ka sladaghutá inda mndu ka kwal zbiŋtá la Israʼila ka zlanatá həŋ ta vulu.

²⁹ Ka han i Avner nda mnduha ni ta mbaɗa petsuweɗ vli ma Gharava, tsaya daɓa ghwa Yardeŋ. Ka tsughwaɗapta həŋ ta Yardeŋ, ka kɗə həŋ ta mbaɗa taŋ ga sərɗək, ka ɓhadaghatá həŋ da Mahanayim.

³⁰ Ka zlanatá Yuʼav ta zbiŋtá Avner, ka tskanatá tsi ta inda sludziha ni. Ka mbəɗaftá tsi ta həŋ, nghava a sludziha Dawuda ghwaŋpəɗ təmbay wu, nghava a Ghasaʼel guli wa.

³¹ Tsaw psla psla sludziha Dawuda ta la Biŋyamiŋ nda mnduha Avner hkən dərmək nda mkuʼ mbsak (360).

³² Ka klaghatá həŋ ta mbla Ghasaʼel ka laghwi da paɗamta ma kula da ni ma Betʼlehem. Ka han Yuʼav nda mnduha ni ta mbaɗa petsuweɗ vli, ka ɓhadaghatá həŋ da Hevruŋ watata tsaɗakwa vli.