2Sam 19 - Hdi

Taway Dawuda ta zwaŋa ni

¹ Bur, ka ŋuɗufa mgham, ka ŋladaftá tsi da dzuguvi ta ghəŋa tsa wa tgha ya, ka hərɓa taw. Kaʼa ta dzaʼa nda mnay ta mbaɗ tsi ta mbaɗa mantsa: « A zwaŋa ɗa Avsalum! A zwaŋa ɗa, a zwaŋa ɗa Avsalum! Ma iʼi ta mtuta ma vla gha ɓa! A zwaŋa ɗa Avsalum, a zwaŋa ɗa, a zwaŋa ɗa! » kaʼa.

² Ka lagha lu da mnanatá Yuʼav: « Waʼa mgham ta taw, ta ŋaɗa ghəŋ ta ghəŋa Avsalum, » ka lu.

³ Baɗ tsaya, tsa zata ghwa za lu ya ná, ka mbəɗutá tsi ka ŋaɗa ghəŋ da inda sludzi, kabga ka həŋ ta sna mnay na: « Gurɗu gurɗa ŋuɗufa mgham katakata dabga mtatá zwaŋa ni, » ka həŋ.

⁴ Baɗ tsaya, ka gazlaghutá mnduha sehu sehu sehu da luwa manda sludziha hlu hula vəl hwayafta taŋ ta wa vulu.

⁵ Ka pghamtá mgham ta dzvu ma ghəŋ. Ka va wahu tsi ta wahu nda lwi dagala dagala. « A zwaŋa ɗa Avsalum! Avsalum, zwaŋa ɗa, zwaŋa ɗa! » kaʼa.

⁶ Ka lam Yuʼav da tsa dzuguvi mida mgham ya, kaʼa mantsa: « Ta pgha hula ka gita ŋa inda sludziha gha, gwal ta kataptá hafa gha gita, nda ŋa zwana gha, nda kwagha gha, nda miʼa gha, nda ŋa miʼa sanagha gha.

⁷ Gwal husaŋ ka ta həŋ ta ɗvuta ka, ta husaghatá gwal ta ɗvutá kagha. Ta maray kagha gita kazlay sana skwi a maliha ta ghəŋa mnduha gha, nda sludziha gha da kagha wu, kəʼa. Nda ngha yu ndana tama, ka si má ta nzakw Avsalum nda hafu, ta rwutá aŋni demdem gita katsi ná, má tsaya ta zɗəgaghata.

⁸ Ndanana, sliʼaf sliʼa tama ka laba ka ksanatá ŋuɗuf ta sludziha gha. Ta waɗagha waɗa yu nda hga Yawe, ka lab a ka wu, haɗ mndu dər turtuk dzaʼa nzata kawadaga nda kagha ta na rviɗik gita u na wa. Dzaʼa malay kuzlaghata ni ka zləmndaha ta slaslaghaghata daga ma ga duhwala gha ha gita, » kaʼa.

⁹ Ka sliʼaftá mgham ka sab da nzata ta wi tgha luwa. Ka mnanatá lu ta inda sludziha kazlay: « Waʼa mgham ta nzakw ta wi tgha, » kəʼa. Ka sliʼadaghata sludziha demdem ta kəma mgham. Ma tsaya ma tsaya ka hwahwayaghutá mnduha la Israʼila si ta laghwi mista Avsalum dzagha taŋ.

Vra Dawuda da Ursalima

¹⁰ Ma inda mndəra la Israʼila ná, inda mndu ta zlərɗuta wi katakata. Ka lu na: « Mgham ta kataptá aŋni ma dzva ghumaha mu. Tsatsi ta kataptá amu ma dzva la Filisti. Ama ndanana, ka hwayafta ni ta kəma Avsalum ka zlanatá haɗik.

¹¹ Tsaw tsa Avsalum si fa mu nda ma pghanaghatá rɗi ŋa gay ni ta mgham ta ghəŋa amu ya, nda mta ta wa vulu. Nahgani ta kəzlə kuni ta gwaɗa ta vranaktá mgham Dawuda na? » ka həŋ.

¹² Ka tsəghanaftá mgham Dawuda ta lwi ta gwal dra skwi ŋa Lazglafta, i Tsaduk nda Aviyatar, kaʼa mantsa: « Mnanawa mna ta galata mnduha la Yuda, ka kuni nda həŋ na: “Kabgawu dzaʼa kəl kaghuni ka nzakway ka kwanaha ni ma zba vradanamta mgham dzagha ni na? Tsaw inda skwi ta gwaɗ inda la Israʼila ná, snanagha sna ta mgham ga taŋ.

¹³ Zwana ma ɗa kaghuni, sluʼuvgha ɗa kuni usa ɗa kuni. Kabgawu dzaʼa kəl kaghuni ka nzakway ka kɗavakta ni ŋa vradanamta mgham na?” ka kuni dzaʼazlay nda həŋ.

¹⁴ Ka mnanata kuni guli ta Ghamasa kazlay na: “Sluʼuvgha ɗa nda usa ɗa a ka wu ra? Ka tsaɗigha tsa Lazglafta ta guma katakata, ka fam a yu ŋa ɗekɗek ta kagha ka mali ta ghəŋa gwal vulu ta kəma ɗa, da vla Yuʼav,” ka kuni dzaʼazlay nda tsi, » kaʼa.

¹⁵ Ka tɗaktá tsi ta ghəŋa inda la Yuda. Ka skwa turtuk wa taŋ, ka tsəghanaftá həŋ ta lwi ta mgham, ka həŋ mantsa: « Vragagha vra gha, kagha kawadaga nda inda kwalvaha gha, » ka həŋ.

Zlaŋta Dawuda ta Simghi nda hafu

¹⁶ Ka sliʼaftá mgham ka vru, ka ɓhadaghatá tsi ha da Yardeŋ. Ka sliʼaftá la Yuda ka ɓhadaghatá həŋ da Gilgal ŋa dzaʼa guyaku nda mgham, ŋa tsughwaɗanaptá Yardeŋ.

¹⁷ Ka laha Simghi, zwaŋa Geraʼ, mnda la Biŋyamiŋ ma Bahurim ya, misimmisim kawadaga nda la Yuda da guyaku nda mgham Dawuda.

¹⁸ Dəmbuʼ (1.000) mnduha la Biŋyamiŋ kawadaga nda tsi. Manda tsaya Tsiva, duhwala gwal ma həga ga Sawulu, kawadaga nda zwana ni ghwaŋpəɗ hutaf nda kwalvaha ni hisambsak. Ka ndadatá həŋ misimmisim da Yardeŋ tiŋlaghuta mgham ŋa guyaku nda tsi.

¹⁹ Ka tsughwaɗanaptá lu ta ghwa ta la ga mgham, ka magatá həŋ ta skwi manda ya ta zɗəganatá mgham. Ma tsa fitika dzaʼa mgham tsughwaɗa Yardeŋ ya, ka lagha Simghi zwaŋa Geraʼ zləmbata zlumbruh ta kəma mgham,

²⁰ kaʼa nda tsi mantsa: « Ma gəvalaf rvera ɗa ta krughuva ɗa! Ka zanapta tsi ta ghwaɗaka mbaɗa kwalva ni, ma fitik kəl rvera ɗa ka saghwi ma Ursalima ya. Ma ŋam mgham ta iʼi ma ŋuɗuf.

²¹ Nda sna iʼi kwalva gha, graf gra yu kazlay na, gaga yu ta dmaku kəʼa. Tsaya kəl yu ka sagha gita, ka tiŋlaghutá inda la ga Yusufu ŋa guyaku nda rveri, mghama ɗa, » kaʼa.

²² Ka zlghaftá Avisay zwaŋa Tseruya ta wa ni, kaʼa mantsa: « Simghi ta ksiʼa mndu ya fa Yawe nda ma pghanaghatá rɗi, ra a ka dzata wu ra? » kaʼa.

²³ Ama ka Dawuda mantsa: « Nahgani ta klamtá kaghuni dida ní, a zwana Tseruya? Kabgawu kəl kuni ka nzakway gita ka ghuma ɗa na? Dzaʼa dza dza lu ta mndu ma Israʼila gita ra? Gita a grafta yu kazlay nda nza yu ka mghama la Israʼila kəʼa wu ra? » kaʼa.

²⁴ Ka mbəɗavatá mgham nda təv Simghi, kaʼa mantsa: « Dzata a lu ta kagha wu! » kaʼa. Ka waɗanatá mgham.

Maganata Dawuda ta zɗaku ta Məfivuset

²⁵ Ka laha Məfivuset, zigha Sawulu guli da guyaku nda mgham. Daga ka yawu laghwa mgham ha ka vrakta ni nda zɗaku, taf a Məfivuset ta imi ta səlaha ni wu, faf a ta paka ta ghumay ni wu, ghuɓaŋ a ta lgutha ni wa.

²⁶ Ma sliʼafta ni daga ma Ursalima ka lagha da guyaku nda mgham, ka mgham nda tsi mantsa: « Məfivuset, kabgawu kwal kagha laghwi mista ɗa na? » kaʼa.

²⁷ Kaʼa mantsa: « Ar mgham, rvera ɗa, kwalva ɗa Tsiva ta nanifta, kabga si ka iʼi kwalva gha na: “Ka payaf paya yu ta kəɗiha ɗa, ka lafa yu tida, ka dzaʼa yu kawadaga nda mgham,” ka yu sizlay, kabga nda rwa səlaha kwalva ɗa.

²⁸ Ama tsatsi, ka tsaɗivatá tsi ta gwaɗa ta iʼi kwalva gha, rveri, mghama ɗa. Ama əŋkaʼ tani, rveri, mghama ɗa ná, nda nza manda duhwala Lazglafta. Maga ta skwi ya ta zɗəgaghata,

²⁹ kabga inda la ga dzidza ɗa ná, si má raŋ ra rwanatá həŋ ta wa ira rveri, mgham. Ama kulam nda tsa, ka tsuʼaftá ka ta kwalva gha mataba gwal ta za skwi ma vla za skwa zay gha. Wati zɗaku ya ta dzaʼa ɗawgəlta yu da mgham na? » kaʼa.

³⁰ Ka mgham nda tsi mantsa: « Nahgani hayhaya tsa gwaɗaha ya na? Kura kura yu ta mnata kazlay na, i Tsiva nda kagha dzaʼa dganaptá haɗikha Sawulu kəʼa, » kaʼa.

³¹ Ka Məfivuset nda mgham mantsa: « Laviŋ lava ta klay demdem, tsəhala vrak vra rveri mgham ɗa dzagha ni ɗughwana ya, » kaʼa.

Maganata Dawuda ta zɗaku ta Barzilay

³² Ka laha Barzilay, mnda la Gilghat guli daga ma Ruglim da pghadaptá mgham ta sana ɓla Yardeŋ.

³³ Nda hala Barzilay katakata, tghas mbsak ima ni. Tsatsi si ta klədanaghatá skwa zay ta mgham ma fitika nzakwa ni ma Mahanayim. Si galipa mndu ya katakata.

³⁴ Ka mgham nda Barzilay mantsa: « Sawi ka tsughwaɗapta ka ta ghwa kawadaga nda iʼi ŋa dzaʼa da Ursalima. Dzaʼa nghap ngha yu ka kagha ga ini hada, » kaʼa.

³⁵ Ama ka Barzilay zlghanaftá wi ta mgham mantsa: « Ta kidaghi vakwa ɗa, dzaʼa kəl yu ka ŋlu kawadaga nda mgham da Ursalima na?

³⁶ Wana tghas mbsak ima ɗa gita. Lavgliŋ lava yu ta galəglaptá skwi ɗina nda ya nda badza ra? Lavgliŋ lava kwalva gha ta tapəglaftá skwi zɗa nda ya kul zɗaku ra? Lavgliŋ lava yu ta snaŋtá lwa zgwana nda miʼaha ta falaha ra? Kabgawu dzaʼa kəl kwalva gha ka vləglaŋtá ndəgaku ŋa rveri, mghama ɗa na?

³⁷ Zekw dzaʼa gavadapta kwalva gha ta sana ɓla Yardeŋ kawadaga nda mgham. Sna a yu kabgawu si dzaʼa kəl mgham ka vlihatá tsaya ma zɗaku gərnda tsa wa?

³⁸ Wya dzvu, zlana zla ta kwalva gha ka vra tsi dzagha ni! Ka mtuta yu ma luwa ɗa, ta vata kula i da ɗa nda ma ɗa! Ama wana kwalva gha Kimham. Dzaʼa pghay ta rveri, mghama ɗa. Ka maganata ka ta skwi ya ta zɗəgaghata, » kaʼa.

³⁹ Ka mgham mantsa: « Ka pgha Kimham ta iʼi, dzaʼa magana maga yu ta skwi ya ta zɗəgaghata. Inda skwi ya dzaʼa ɗawaŋta ka da iʼi, dzaʼa maga gha maga yu, » kaʼa.

⁴⁰ Tsughwaɗapta inda mnduha nda mgham tani ta Yardeŋ, ka brusatá mgham ta Barzilay ka tfanaghatá wi. Ka vraghatá Barzilay tama dzagha ni.

⁴¹ Ka ksaftá mgham ta tvi nda təv Gilgal, ka pghaghatá Kimham. Ka pghaftá inda sludziha la Yuda nda rita la Israʼila ta mgham.

Zlərɗa wa la Yuda nda la Israʼila ta ghəŋa mgham

⁴² Ama ka gi sliʼadaghatá inda la Israʼila slanaghatá mgham, ka həŋ nda tsi mantsa: « Kabgawu kəl zwana ma ŋni, la Yuda ka kɗikaghata nda kagha, ka tsughwaɗanaptá Yardeŋ ta mgham, nda la ga taŋ, nda inda mnduha ni na? » ka həŋ.

⁴³ Ka inda la Yuda zlghanaftá wi ta la Israʼila mantsa: « Kabga kutumkuha mgham ŋne! Kabgawu ta kəl kuni ka ɓasa ŋuɗufa ni na? Mamu skwi zu ŋni da mgham ra? Ari mamu a skwi mbəha tsi ta aŋni nda tsi na? » ka həŋ.

⁴⁴ Ka la Israʼila zlghanaftá wi ta la Yuda mantsa: « Mal nzakwa mgham Dawuda ghwaŋ səla ka ŋa ŋni ka ya ka ŋa ghuni. Kabgawu kəl kaghuni ka hərtətata aŋni na? Tiŋəl aŋni a ta mnay: “Vranaktá mghama mu kəʼa wu ra?” » ka həŋ. Ama mal ŋa la Yuda kuzlakwa gwaɗa ka ŋa la Israʼila.