2Sam 17 - Hdi

Mbəɗanafta Husay ta hiɗakwa Ahitufel

¹ Ka Ahitufel nda Avsalum mantsa: « Zliha zla wya dzvu, ka zbapta yu ta mnduha dəmbuʼ ghwaŋpəɗ his (12.000), ka dzaʼa yu zbiŋta Dawuda ta va na rviɗik na.

² Dzaʼa dukwanagha dukwa yu ma hərfata ni kul haɗ mbrakwa ni ya. Dzaʼa ŋwaŋuɗatanaf ŋwaŋuɗata yu, ŋa gazlata mnduha ta pghay nda hwaya. Mgham turtukwa ni yeya dzaʼa dzata yu.

³ Dzaʼa hlak hla yu ta inda mnduha da kagha. Ka nda mta tsa mndu kumaŋ ka ya ná, dzaʼa vrak vra inda mnduha, ŋa nzata mnduha demdem ma zɗaku, » kaʼa.

⁴ Ka zɗəganatá tsa gwaɗa ya ta Avsalum nda inda galata mnduha la Israʼila.

⁵ Ama ka Avsalum mantsa: « Hgagaghawa hga ta Husay mnda la Arki guli, ka snanata mu ta skwi dzaʼa tsatsi da mnay, » kaʼa.

⁶ Lagha Husay, ka mnatá Avsalum ta skwi ya mna Ahitufel, kaʼa nda tsi mantsa: « Ka maga mu ta skwi mna tsi rí, ari ki? Ka mantsa a tsi wu, mna mna ta manaka ŋa gha, » kaʼa.

⁷ Ka Husay zlghanaftá wi ta Avsalum mantsa: « Ma nana ná, zɗa a tsa hiɗaku vla Ahitufel ya wa. »

⁸ Ka Husay sganaghata mantsa: « Nda sna kagha ta da gha nda mnduha ni tani, bikwira vulu həŋ, nda ga sida taŋ ma mtak manda ziŋa hləgudunus lu ta zwana ni. Mnda vulu da gha, hanata a kawadaga nda bakwa mnduha wa.

⁹ Ndanana ná, zlah ta ɗifa tsatsi ma galigha, ka ma sana vli a tsi. Ma zlrafta vulu, ka rwavaghu rwa sanlaha ma sludziha mu katsi, inda gwal dzaʼa snaŋta na: “Nda badza sludziha mista Avsalum,” ka lu dzaʼazlay.

¹⁰ Dzaʼa fam fa tsaya ta gwal ka bikwira vulu nda ŋuɗuf manda ŋa rveri, ŋa rwanata ni ta vgha ta həŋ. Nziya nza tsi ná, nda sna inda la Israʼila kazlay bikwira vulu da gha, gwal dra ŋuɗuf gwal kawadaga nda tsi guli kəʼa.

¹¹ Wya hiɗaku ta vlata iʼi: Ka tskava tska inda la Israʼila ta vata kagha, daga ta kwakwara la Daŋ ha ta kwakwara la Bəʼerseva, manda wutak ta wa drəf ka həŋ, ka dzaʼa vərɗa kagha da vulay.

¹² Dzaʼa ɓhanava ɓha mu dər ma vəl ga nzata tsi. Dzaʼa pghaf pgha mu ta vgha tida manda pghakwa wuninik ta haɗik. Haɗ ya dər turtuk dzaʼa pɗata wu, dər tsatsi, dər gwal mista ni wa.

¹³ Ka hwayam hwaya tsi da sana luwa, dzaʼa hladagha hla inda la Israʼila ta tɓaŋ da tsa luwa ya, ha ŋa tsəhaghatá tsa luwa ya da lika ha ŋa kwal sləglanaghatá dər maviŋa turtuk, » kaʼa.

¹⁴ Ka i Avsalum nda inda la Israʼila mantsa: « Mal tsa hiɗaku vla Husay mnda la Arki ya, ka tsa ŋa Ahitufel ya, » ka həŋ. Tsaw, Yawe ta mnafta zləmbiŋtá tsa hiɗaku si vla Ahitufel ɗina ya, kada dɗanaghata zləmnda ta Avsalum.

Tsughwaɗapta Dawuda ta Yardeŋ ka hwayaghuta

¹⁵ Ka Husay nda i Tsaduk nda Aviyatar, gwal dra skwi ŋa Lazglafta mantsa: « Yeya nda yeya hiɗaku vlaŋ Ahitufel ta i Avsalum nda la galata mnduha la Israʼila. Yeya, nda yeya ŋa iʼi guli ta vlaŋta.

¹⁶ Ndanana tama, tsghanafwa tsgha ta lwi misimmisim ta Dawuda, ka kuni nda tsi na: “Yaha ka da hanay ma daɓa Yardeŋ. Ka ŋava ka ka tsughwaɗaptá Yardeŋ, dá zaɗanatá lu ta i mgham nda mnduha mista ni tani,” » ka həŋ.

¹⁷ Ta lagha la i Yunataŋ nda Ahimaghats nzata ma Gheŋʼrugel, kabga haɗ həŋ ta walaŋtá maravata wu, dá nghaŋtá lu ta həŋ ta lam həŋ da luwa. Mamu sana kurɗu ta lagha da rusay ŋa taŋ ta skwi ta magaku, ŋa dzaʼa hahəŋ snanamtá mgham Dawuda.

¹⁸ Ama ka nghaŋtá sana duhwal ta həŋ, ka laghwi tsi da mnanatá Avsalum. Ka sliʼaftá i Yunataŋ nda Ahimaghats misimmisim, ka ɓhadaghatá həŋ da sana mndu ma Bahurim nda vavrəm ta daɓi tgha ga taŋ. Ka laha həŋ da ɗifaghuta mida.

¹⁹ Ka klaftá markwa tsa mndu ya ta wupay ka fuŋta ta wa tsa vavrəm ya. Ka tafta dzərzlata zimi tida ŋa kwal kul tsatsafta.

²⁰ Ka lagha kwalvaha Avsalum slanaghatá tsa marakw ya ma wi tgha ni, ka həŋ mantsa: « Ga i Ahimaghats nda Yunataŋ ya na? » ka həŋ. Ka tsa marakw ya zlghanaftá wi ta həŋ mantsa: « Tsughwaɗagha tsughwaɗa həŋ ta zala, » kaʼa. Ka zbə həŋ ta həŋ, slanagha a həŋ ta həŋ wu, ka vraghutá həŋ da Ursalima.

²¹ Tahula laghwa taŋ, ka saf i Ahimaghats nda Yunataŋ ma vavrəm ka laghwi da snanamtá mgham Dawuda. Ka həŋ nda tsi mantsa: « Tsughwaɗapwa zala misimmisim, kabga dzraf dzra i Ahitufel ta kasaftá kaghuni, » ka həŋ.

²² Ka sliʼaftá i Dawuda nda inda mnduha mista ni ka tsughwaɗaptá Yardeŋ. Ta tsaɗaku vli, haɗ ya dər turtuk ta pɗaghuta wu, tsughwaɗap tsughwaɗa həŋ demdem ta Yardeŋ.

²³ Nghay Ahitufel ta kwal kul snatá hiɗaku vla tsi, ka payanatá tsi ta kəɗiha ni ka sliʼafta ka laghwi dzagha ni ma luwa ni. Ka mnanaftá tsi ta gwaɗa ma ghəŋa ni ta la ga taŋ. Tahula tsa ka hagatá tsi ta ghəŋa ni. Manda tsaya kəʼa mtuta, ka lamtá lu ma kula da ni.

Dawuda ma Mahanayim

²⁴ Ɓhadagha ɓha Dawuda da luwa Mahanayim, ta tsughwaɗaptá Avsalum ta Yardeŋ, kawadaga nda inda mnduha la Israʼila.

²⁵ Ka faftá Avsalum ta Ghamasa ka ghəŋ ta ghəŋa gwal vulu ma vla Yuʼav. Ghamasa ná, zwaŋa sana mndu ta hgə lu ka Yitra ya, mnda la Israʼila si ta klaftá Abigayel, makwa Nahas, makuma ni ma Tseruya, ma ni ma Yuʼav ya.

²⁶ Ka fatá la Israʼila nda Avsalum ta ghuɓa taŋ ta haɗika Gilghat.

²⁷ Ɓhadaghata Dawuda da Mahanayim, ka slaftá tsi ta Suvi, zwaŋa Nahas, mnda la Raba wudəma la Ghamuŋ, nda Mahir, zwaŋa Ghamiʼel, mnda la Ludəvar, nda Barzilay, mnda la Gilghat ma Ruglim.

²⁸ Ka hladaghatá həŋ ta ghəzləŋha, nda tasaʼuha, nda tsatsatá huzlaha nda rɓisl, nda alkama, nda urz, nda hpu, nda masula ɓurtsum, nda vara, nda mndərga sana vara, nda fasatá ghəŋa nimaya,

²⁹ nda zuɗum, nda palaka uʼa sla, nda rina fisik, nda rɗa uʼa. Ka hlədanaghatá həŋ ta inda tsa skwiha ya ta Dawuda nda ya ŋa tsa bakwa mnduha mista ni ya ŋa zay taŋ, kabga ka həŋ ma ghəŋa taŋ na: « Ta ŋra maya tsa mnduha ya, nda hərfa həŋ, ndala ta dza həŋ ma mtak, » ka həŋ.