2Sam 16 - Hdi

I Dawuda nda Tsiva

¹ Manda zluŋta Dawuda kiʼa ta bɗəma ghwá, ka lagha Tsiva, duhwala Məfivuset da gmaku nda tsi. Ta mba kəɗiha his ta hla buradi his dərmək (200), nda gatuwa ghwalata yakwa inabi dərmək (100), nda gatuwa yakwa ghuraf dərmək (100), nda hulama ima inabi turtuk.

² Ka mgham nda Tsiva mantsa: « Nahgani dzaʼa ka magay nda na skwiha na na? » kaʼa. Ka Tsiva nda tsi mantsa: « Kəɗihha hlagagha yu kabga ŋa ŋlay la ga mgham. Buradi nda yakwa fu ya guli ná, ŋa zay duhwalha tsaha ya. Ima inabi ya guli, ŋa ŋaŋaʼata gwal dzaʼa hərfuta ta mbaɗa tsaya, » kaʼa.

³ Ka mgham mantsa: « Ga zwaŋa daŋahəga gha ɓa? » kaʼa. Ka Tsiva nda mgham mantsa: « Waʼa nzaghuta ma Ursalima, kabga kaʼa ta gray na: “Gita dzaʼa vraɗivata guyata ghəŋa la Israʼila ta ga mghama da ɗa,” kaʼa, » kaʼa.

⁴ Ka mgham nda Tsiva mantsa: « Ŋa gha skwa Məfivuset demdem! » kaʼa. Ka Tsiva mantsa: « Ta tsəlɓa tsəlɓa yu! Má ka mutsaf mutsa yu ta zɗakatahuɗi ta wa ira, mgham rvera ɗa, » kaʼa.

Ksiʼay Simghi ta Dawuda

⁵ Ka ɓhadaghatá mgham Dawuda da luwa Bahurim. Hada, ka sab sana mndu Simghi hga ni, zwaŋa Geraʼ ta uʼa turtuk nda la Sawulu, ka lagha tsi ka dzaʼa nda ksiʼa mgham.

⁶ Ka zlərtsə tsi nda pala ta mgham Dawuda nda kwalvaha ni, kulam nda nzakwa inda mnduha nda inda gwal bikwira vulu nda ga zeghwi nda ya nda ga zlaɓa mgham.

⁷ Wya ka Simghi ta mnay ta dzaʼa tsi nda ksiʼay: « Laghu la gha, laghu la gha, mnda pghiŋtá us, falaya mndu!

⁸ Ta vraghafta ta ghəŋa gha Yawe ta inda usa la ga Sawulu. Kagha ta zluʼaghutá ga mgham da Sawulu, ka klaftá Yawe ka famta ma dzva zwaŋa gha Avsalum. Wana kagha ndanana ka skwa hiɗahiɗa taɓta skwi ta raghata, kabga mndu ta pghiŋtá us ka, » kaʼa.

⁹ Ka Avisay zwaŋa Tseruya nda mgham tama mantsa: « Kabgawu ta kəl ya mtata kri ya ka ksiʼa kagha katək ni mghama ɗa? Zliha zla ka laba yu da tsaghutá ghəŋa ni, wya dzvu, » kaʼa.

¹⁰ Ama ka mgham nda tsi mantsa: « Kaghuni zwana Tseruya, nu gwaɗa kaghuni na? Ka ta ksiʼay tsi, ba Yawe ta mnanata kazlay na: “Ksiʼa ta Dawuda!” kəʼa. Wa tama dzaʼa mnanata kazlay na: Kabgawu ta kəl ka ka magay manda tsa kəʼa na? » kaʼa.

¹¹ Ka Dawuda nda Avisay nda ya nda inda kwalvaha ni mantsa: « Vərɗa zwaŋa ɗa, ya yaga iʼi ta zba hafa ɗa ná, nana mnda la Biŋyamiŋ na yeya katək rke! Zlaŋwa zla ka ksiʼa tsi ta iʼi, ka si Yawe ta mnanatá magay.

¹² Kawayaka skwi dzaʼa nghaŋ ngha Yawe ta tulekata iʼi, ŋa plaɗimta ni nda zɗaku ta na ksiʼay ta ksiʼi Simghi ta iʼi gita na, » kaʼa.

¹³ Ka kɗaŋtá i Dawuda nda mnduha ni ta mbaɗa taŋ. Ka mbaɗ Simghi ta mbaɗa ni brega nda Dawuda ta vata ghwá. Ta mbaɗ tsi ta mbaɗa ya ta dzaʼa nda ksiʼay, ka waɗay nda pala, ka dzaʼa nda wutsay nda haɗik guli.

¹⁴ Ka ɓhadaghatá mgham nda gwal kawadaga nda tsi da vli ta dzaʼa həŋ nda hərfata həŋ katakata ta wa Yardeŋ. Hada, ka hlaptá həŋ ta hafu.

Guyakwa Husay nda Avsalum

¹⁵ Ka lam Avsalum nda inda mnduha la Israʼila mista ni demdem da Ursalima. Kawadaga Ahitufel nda tsi.

¹⁶ Ɓhadaghata Husay mnda la Arki, gra Dawuda slanaghatá Avsalum, kaʼa nda tsi mantsa: « Ta mblam ka hafa gha mghama ɗa! Ta mblam ka hafa gha mghama ɗa! » kaʼa.

¹⁷ Ka Avsalum nda Husay mantsa: « Manda tsaya zɗaku ta mag ka ŋa gra gha Dawuda ɓa? Kabgawu kwal ka pghaghatá gra gha na? » kaʼa.

¹⁸ Ka Husay zlghanaftá wi ta Avsalum mantsa: « Kay! Nda mndu ya zbap Yawe, zbap inda na mnduha la Israʼila na. Kawadaga nda tsatsi ta nzata yu.

¹⁹ Tsaya a va ni wu, wa dzaʼa yu maga slna ŋa ni na? Zwaŋa ni a wu ra? Dzaʼa magagha maga yu ta slna manda ya mag yu ŋa da gha ya guli, » kaʼa.

Hiɗaku vlaŋ Ahitufel ta Avsalum

²⁰ Ka Avsalum nda Ahitufel mantsa: « Zbaŋwa zba ta hiɗaku ta ghəŋa skwi ŋa magay mu, » kaʼa.

²¹ Ka Ahitufel nda Avsalum mantsa: « La hanata nda miʼa sanagha da gha ta zlanata ŋa ngha həga ga mgham ya. Mantsa tama, dzaʼa kəl inda la Israʼila ka snaŋta kazlay nda dma kuni nda da gha, kəʼa. Tsaya dzaʼa kəl inda gwal mista gha ka mutsaftá mbraku, » kaʼa.

²² Ka dzugwanatá lu ta tumpul ta Avsalum ta dədəmatá ghəŋa həga. Ka lam Avsalum hahanata nda miʼa sanagha da ni ta nghay inda la Israʼila.

²³ Tsa hiɗaku ta vlata Ahitufel ma tsa fitikha ya ná, mamu sgita ni, ta snu manda va skwi Lazglafta ta gwaɗata lu. Manda tsaya nzakwa inda hiɗaku ta vlata Ahitufel dər ŋa Dawuda tsi dər ŋa Avsalum a tsi.